АМДЫ ПОЕЗДТІ ИСТІГ ОРЫНДА САҒИРБЫС
20.02.2019
Хабарлар
Проект - чуртасха. Киҷее Ағбанда наа тимір чол вокзалы пайрамни азылған. Ағбан станцияның вокзалы Тилекейдегі хысхы универсиаданың резервтіг вокзалы статузын алғанда, «РЖД» ОАО 2017 чылда пістің республиканың ӧӧн городында наа вокзал павильоны пӱдіриинеңер чарадығ алған.
ПРОЕКТ ХООСТЫРА НАА ПАЗА ИРГІ ТИМІР ЧОЛ ВОКЗАЛЛАРЫ ПІРГЕ ВОКЗАЛ КОМПЛЕКСІ ПОЛЧА. НАА ВОКЗАЛНЫҢ ПӰДІРИИ 2018 ЧЫЛНЫҢ МАЙЫНДА ПАСТАЛҒАН. ТИМІР ЧОЛ ВОКЗАЛЫНЫҢ ТАСТЫН ХАКАС ЧОННЫҢ ОРНАМЕНТІ ЧАЗАПЧА. ПІР ХАДЫЛЛЫҒ ПАВИЛЬОННЫҢ УЛИИ 1400 КВАДРАТ МЕТР. ОЛ АМҒЫ ВОКЗАЛНЫҢ ХЫРИНДА ОРНЫХЧА. ВОКЗАЛДА САҒЫҶАҢ УЛУҒ ЗАЛ, ХАЙЗЫНДА 107 ОДЫРЧЫХ, ИМНЕГ ПУНКТЫ, КИНЕК КІЗІЛЕРГЕ ТЫНАНҶАҢ ОРЫННАР ПАР.
КІЧІГ ПАЛАЛЫҒ ПАССАЖИРЛЕРГЕ ІДӦК ТЫНАНҶАҢ ПӦЛІК КӦРІЛ ПАРҒАН, ХАЙЗЫНДА ЫҢААҶАХТАРНЫ ОРААҶАҢ СТОЛ, КИП-АЗАХ ЧУҒҶАҢ ПАЗА ХУРУТЧАҢ МАШИНАЛАР ТУРЧАЛАР. САҒЫҶАҢ ЗАЛДА ІДӦК 4 ИСКІРІГ ТАБЛОЗЫ, ІКІ ТЕЛЕВИЗОР, НИМЕ-НОО ХАЙРАЛЛАҶАҢ КАМЕРА, САДЫҒ ОРЫННАРЫ ПАР.
КИНЕКТЕРНІҢ РЕГИОНДАҒЫ ПІРІГІЗІНІҢ ЧӦПТЕРІ ХООСТЫРА, НАА ПАВИЛЬОН КИНЕК КІЗІЛЕРНІҢ ПРАЙ КИРЕКСІНІСТЕРІН ТОЛДЫРЧА. ОЛАРҒА КӦРІЛ ПАРҒАН ТЫНАНҶАҢ ІКІ ПӦЛІКТЕ ӦНЕТІН ВЕНТИЛЯЦИЯ СИСТЕМАЗЫ ТУРҒЫЗЫЛҒАН, ХАЙЗЫ ТОЗЫННЫ ПАЗА ХУРТ-ХООСТАРНЫ ИРТІРБИНЧЕ. ІДӦК АНДА САНИТАРНАЙ ПАЗА ЧУУНЫНҶАҢ ПӦЛІК ПАР.
ТАНЫХТИРҒА КИРЕК, ХАКАСИЯ ХЫЗЫЛЧАР КРАЙЫ, ТУВА РЕСПУБЛИКАЗЫ ЧІЛИ «КИМДЕГІ СИБИРЬ» ПРОЕКТТІҢ АРАЛАСЧЫЗЫ ПОЛЧА.
Пу проектті чуртасха кирері ӱс регионның аразындағы чол палғалызын чахсыландырча паза Азиядағы рыноксар сығарға оңдай пирче. Ағбанның наа тимір чол вокзалының пӱдірии - ол «Кимдегі Сибирь» проекттің пастағы чардығы. Амды Хакасияның ӧӧн тимір чол вокзалында иң наа оборудование турча.
Тимір чол вокзалы пайрамни азылғанында араласханнар Хызылчардағы тимір чол устағҷызы Вадим Владимиров, Хакасия пазы орынҷызының тоғызын толдырчатхан Юрий Курлаев, Хакасияның Ӧӧркі Чӧп кнезінің пастағы орынҷызы Юрий Шпигальских, Ағбан город пазы Николай Булакин.
Устағ-пастағ наа вокзалны кӧрче
- Мындағ сіліг паза кӧп тузалығ пӱдіріг Хакас Республикаа сыйых полча. Вокзал пӱдіриинде пассажирлернің кирексіністерін санға алғабыс. Чонға мында истіг полар ӱчӱн, IT-технологияларҷа кӧп тоғыс иділген. Универсиадаа удур пу сыйыхты читірчебіс. Вокзал хысхаҷах тус аразына пӱдіріл парған. Минің кӧрізiмнен, пу сыйых сірерні кӧп чыллар ӧріндірер, - таныхтаан Вадим Владимиров.
Анаң Хызылчардағы тимір чол устағҷызы наа вокзал пӱдіриинде араласхан кізілерге сыйыхтар читірген. «РЖД-строй» АО-ның «Спецмостотрест» филиалының управляющайы Максим Завьялов иң аарлығ сыйыхха - алтын часха - турысхан.
Хакасия пазы орынҷызының тоғызын толдырчатхан Юрий Курлаев вокзалның пайрамни азылғанынаң Хызылчардағы тимір чолның устағ-пастаана алғызын читірген паза чуртағҷыларны алғыстаан.
Піс хаҷанох мындағ сыйых сахтаабыс. Минің кӧрізімнең, ол пістің рреспубликабыстың «визитнай карточказы» полар. Хызылчардағы тимір чолның устағ-пастаана улуғ алғызым читірчем. Хакасияның правительствозы паза Хызылчардағы тимір чол устағ-пастааның аразындағы палғалыс уламох тилізін, - теен Юрий Курлаев.
Хакасия пазы Валентин Коноваловтың чарадии хоостыра Ағбандағы вокзалның устағҷызы Альбина Ефремоваа, Ағбандағы чарытхы пирҷең станцияның ӧӧн инженері Иван Янниковха алғыстастар читірілген.
Хакасияның Ӧӧркі Чӧп кнезінің пастағы орынҷызы Юрий Шпигальских, вокзал азылғанынаң прайзын алғыстап, Ӧӧркі Чӧп кнезі Владимир Штыгашевтің чарадиинаң Хакасияның экономика тилізіне улуғ хозым иткен кізілерге алғыстас пічіктерін читірген.
Вокзал пайрамни азылған соонаң килген кізілер наа вокзалны чапсып кӧріп алғаннар.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде