УСТАРЫНАҢ СЫНАСХАННАР, ПІЛІСТЕРІН КӦЗІТКЕННЕР
05.03.2019
Хабарлар
Марығ. Ирткен неделяда республикада WorldSkills стандарттарынҷа «Чиит устар» регион марии ирткен. Анда ортын профессиональнай ӱгредіг учреждениелерінің студенттері паза ӱгренҷілері марығласханнар.
Пӱӱл регион синінде ирткен марығда маңнаныстығ ӱгренчеткен студенттер устарынаң сыназарға ӱзінҷі хати чыылысханнар. Оларның тоғыстарын эксперттер паалааннар. Таныхтирға кирек, "WorldSkills" марығ тоғысчы специальностьтарҷа ӱгренчеткен студенттерге чарыдылча: тимір хабыстырҷаң,ағаснаң тоғынҷаң ус, идінҷек, састарнаң айғасчатхан ус, ниикке чӧрҷең автомобильлерні тыхтиры, кип-азах тігері, веб-дизайн, пӱдіріг кирее, мал имҷізі, ас-тамах тимнечең ус паза даа пасхазы.
Пис кӱн аразына оол-хыстар устарын эксперттерге чахсы кӧзіт пиргеннер. Аннаңар марығның халғанҷы кӱнінде сыйыхтығ орын алған студенттерге Ағбандағы чииттер ӧргезінін улуғ сценазында дипломнар читіргеннер. Чииттерге аймах чайаачы ӧмелер сарыннар, теелбектер толдырғаннар.
Хакасияның ӱгредіг министрі Лариса Гимазутина «Чиит устар» марығның араласчыларынзар айланған:
- Пӱӱн піс Москвадаң айланғабыс. Анда ортын профессиональнай ӱгредіг учреждениелерінеңер чоох апарғабыс. Аның таңдағызы пар! Марығда араласхан ӱгредіг учреждениелерінің устағҷыларына, ӱгретчілеріне ахчалығ сыйыхтар читірілер. Араласчылар ідӧк ахчалығ сыйыхтар аларлар. (Лариса Николаевнаның сӧстерін ис салып, залдағы чон матап айа сапхан паза «Ура!» хысхырған. - Авт.)
Марығның халғанҷы кӱні пайрамнығ ирткен. Хакасияның пазы Валентин Коновалов чиит устарны алғыстаан.
- Пӱӱнгі кӱнде ортын профессиональнай ӱгредіг алнынзар табырах хаалапча. Аның пӧгіні - пӧзік пілістіг специалисттерні тимнирі. Хакасияа тоғысчы профессиялар киректелче. Ізенчем, «Чиит устар» марығ чахсы специалисттерге чол асча. Араласчылар, сірер чемпионатта пос узын сынаазар. Марығ соонда сірер аннаң андар тилирзер. Чуртаста профессияны чахсы таллиры - нандырығлығ кирек. Тоғыс сірернің кӧңніңерге чадарға кирек. Кізі чӱрекке чатчатхан нименең айғасса, пӧзік чидіглерге читче. Пӱӱн піреезі сыйыхтығ орын албаан даа полза, хынчатхан киреенең айғазып, чидіглерге соонаң чидер.
Мындағ кӧп профессия хоостыра ирткен марығ тоғыс ӱгредіг учреждениезінде ирткен. Оларның пірсі - Ағбандағы чурт хонии паза сервис техникумы. Анда ӱс кӧрімҷе марығ ирткен. Ағаснаң тоғынчаң устар олох техникумда устарынаң сынасханнар. Пӱӱл пу кӧрімде алты оол араласхан. Оларның санында Ағбандағы чурт хонии паза сервис техникумының 2-ҷі курзының студенті Пётр Артонов. Ол эксперттернің паалиинаң пастағы орынға турысхан. Мындағ пӧзік синде иртчеткен марығда ол пастағызын на араласхан.
Пётр Артоновтың тӧреен-ӧскен чирі Таштып аймаандағы Улуғ Арбыт аал полча. Школа тоосханда, оол, ікінҷілебин, ағаснаң узанҷаң профессияны таллап алған. Аның улуғ харындазы Эдуард ағастаң туралар пӱдірче. Олған тузында ол харындастарынаң хада пабазына сиденнер нааҷылнрға удаа полысчаң. Пабазы оолларына полған на ағастаңар чарыда чоохтап турҷаң. Амды ол пілістер ағаа ӱгреністе туза полчалар.
Марығның пастағы кӱннерінде аның ӱгретчізі Лилия Владимировна Юрьева Пётр сыйыхтығ орынға турызар тіп ухаанҷылаан. Студент маңнаныстығ ӱгренче паза ағаснаң чахсы узанча тіп таныхтаан ол. Аның чооғынаң, полған на араласчы ӱгренчеткен ӱгредіг учреждениезін пӧзік синде кӧзіт пирерге кӱстенген.
Мындағ пӧзік синде иртчеткен «WorldSkills Russiа» чемпионатта оол-хыстар пілістерінең, устарынаң сынасчалар. Полғаны ла марығда наа пілістер алып аларға кӱстенче. Пётр марығны иртібіскен, сыйыхтығ орынға турысхан. Амды ол регионнар аразындағы марығда аралазар.
Таныхтирға кирек, «WorldSkills Russiа» марығ пастап регион синінде, анаң регионнар аразында иртче. Соонаң хазнабыстың иң артыхтары тилекей синіндегі марығда аралазарлар. Пӱӱл ол Казаньда августта иртер. Анда чир-суғҷыларыбыс араласса, уғаа чахсы полар.
Автор :
Ольга ТОМОЧАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде