ЧАЛАХАЙ ЧАСХЫ КӰННЕРІ
06.03.2019
Хабарлар
Культура. 1 мартта С.П.Кадышевтің адынаң культура кінінің улуғ залында Регина Тоскоракованың тун ойыны ирткен. Мының алнында ол «Час ханат» олғаннарның эстрада студиязының араласчызы паза солизі полған
Регина Тоскоракованың пастағы ойыны «Чалахай часхы кӱннерім» адалған. Марттың пастағы кӱнін часхы туссар пастағы хаалағ полча тиирге чарир.
Чиит артист «Час ханат» олғаннарның эстрада студиязынаң сыххан, улуғ чуртассар аннаң ханаттанған. Хаҷан-да іҷезі Валентина Геннадьевна пис частығ хызыҷаан пу саблығ студиязар чидін килген. Кічиҷек Регинаның теелбектерге дее, сарнирға даа чайаачы оңдайы пар полған. Пӱӱнгі кӱнде ол Н.Ф.Катановтың адынаң Хакас хазна университедінің музыка колледжінде хореография пӧлиинде ікінҷі курста ӱгренче.
Пу чалахай иирні Хакасияның саблығ артизі Анна Бурнакова апарған. Пастап Регина Тоскоракова Хакасия культуразының саблығ тоғынҷызы Мария Сартыкова устапчатхан «Чылтыс» хакас кӧг тиріглері ӧмезінең хада ырларны толдырған. Ол мының алнында А.А.Кенельнің адынан музыка школазында ӱгренген, ӧменін араласчызы полғанох. Хызыҷахтар, хомыстарнаң ойнап, «Ирке чирімнін сарыннарын» толдырғаннар. Наа альбомның кӧглерін кӧрігҷілер пастағызын на искеннер. «Чирім хайдағ сілігдір», хайҷы П.В.Курбижековтын «Пағаҷах», «Чӱгӱрік аттарым» сарыннарны ырлап пиргеннер.
Мында Регина Тоскоракованың ӧтіг ӱннең сарнапчатханын таныхтирға кирек. Аны Хакасия культуразының саблығ тоғынҷызы Светлана Аткнина кічігдең кӧглирге кӧніктірген. Чиит ырҷының ӱні альт ӱнге килістіре. Мындағ ӱннең фольклор даа, эстрада даа кӧглерін сарнирға чарир.
Ойында Хакасия искусствозының саблығ деятельі, композитор Игорь Боргояковтың чон хынчатхан паза наа кӧглері толдырылған. Ідӧк чиит ырҷы чон ырларын, тахпахтарын читірген.
Ырҷы, Чыл пазы ӱлӱкӱн чағдапчатханда, чонның кӧңнін кӧдіріп, Елена Тагираның сӧстеріне Игорь Боргояков пас салған «Чыл пазы» сарынны сарнаан. Ідӧк «Тун пайрам» кӧг паза теелбек толдырылған. Иирні апарчатханнар Регинаны абахай паза хыйғаҷах тіп махтап турғаннар. Пӱӱнгі кӱнде ол студент полча, че «Час ханат» студиязар он чыл артиинаң чӧрген.
Таныхтирға кирек, пӱӱл «Час ханатха» 25 чыл толар. Пу тус аразына студияның олғаннары хайдағ ла чирлерде полбааннар. Оларның санында Регина Тоскоракова. Ӧменең хада ырлап, теелбектеніп, олар пӧзік чидіглерге читкеннер. Кӧзідімге мындағ чидіглерін аларға чарир: Москвадағы «Утренняя звезда» кӧзідігде таныхтатханнар; Польшада Россия культуразының кӱннері ирткенде, «Час ханат» ӧмее чон, азах узына турып, айа сапхан; «Синеокая Анапа» Россия мариинда ырҷы Иосиф Кобзонның холынаң Гран-при сыйыхты алғаннар; Казахстанда І степеньніг дипломант полыбысханнар... Мындағ махтағлығ кӧзідімнер пу чайаачы ӧменің илееде.
Тун ойында Регина Тоскоракованаң Денис Мамышев, «Чалахай часхы кӱннері» сарынны сарнап, чонның кӧңнін уламох кӧдіргеннер. Чиит хыс ідӧк «Ах-пора адым сарчында» алтай чонның тахпаан толдыр пирген.
Иир тузында Регина паза «Час ханаттың» олғаннары, кип-азахтарын алыстырып, сценазар чазағлығ сых турғаннар. Чиит артисттер теестегі ырны толдырарға тимненчеткен туста, иирні апарчатханнар кӧрігҷілернең ойыннар апар турғаннар. Залда олған-узах кӧп полған. Олар ойыннарда хынып араласханнар. Сурығларға орта нандырғаннарға студияның чарыхха сыххан наа дискін сыйлааннар.
Регина Тоскоракованың «Чалахай часхы кӱннерім» тун ойынын чиит ырҷының «кірӧске тӱскені» тиирге чарир. Солист полып, пір иирге анҷа кӧп сарын толдырарға тыстаныс паза кӱс кирек. «Час ханаттың» олғаннары, теелбектернең иирні чазап, ӧӧрелеріне чахсы полысханнар. Регина оларнаң хада теелбек сал турған.
Концерт тоозылғанда, сценадағы нанҷылары хысты матап алғыстааннар, хуҷахтап, аның ӱчӱн ӧрінчеткеннерін чазырбааннар. Пістің чиит чайаачылар кічіглерге чахсы кӧзідім полчалар. Іди олғаннар ыр-сарынға паза теелбектерге тартылчалар. Піс, тізең, мыннаң мындар Регина Тоскоракова улуғ сценазар удаа сых турарына ізенербіс.
Автор :
Елена САГАТАЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде