СІЛІГ КӰРЕС КӦЗІТКЕННЕР
02.04.2019
Хабарлар
Спорт. Хыстар аразында олаңай кӱресче Сибирьдегі федеральнай округтың первенствозы 30-31 мартта ирткен. Анда 21 часха читкелек чииттер устарын сынааннар.
Хайдағ даа спортсмен, пірее марыға тимненчетсе, чиңіс тударға, прайзын хыра утарға сағынча. Ибзер медаль чох хайди айланҷаң. Пасхазына утырар ӱчӱн арға-мӧрійге ноо парҷаң. Хайдағ даа полза, кӱрес секциязына пастағы ла чылы чӧрбинче нооза. Тренері дее чахсы кізі, маңат спортсменнер тимнепче.
- Хыстарым аразында чиңіске кӧстегліг тоғысты азынадох пастапчам. Хайдағ даа марығ тузында парчан посты утысха саларға кирек тіп кӧӧктірчем, - чоохтапча Хызылчарда чуртапчатхан чир-суғҷыбыс, Россияның саблығ тренері Лидия Карамчакова.
Піди кӧрзе, ағаа чочынҷаң сылтағ чоғылға тӧӧй. Аның кӱресчі хыстары Россия, Европа, тилекей марығларында араласханнар, ибзер сыйыхтығ айлан турғаннар. Олох арада Лидия Алексеевна чахсы пілче, СФО мариинда араласчатхан пасха даа командаларда маңат кӱресчі хыстар пар. Кемеров облазында даа, Тувада даа, Иркутск облазында даа, пасха регионнарда даа олаңай кӱрес хомай нимес тиліпче. Аннаңар, анзы ідӧк тее пілдістіг, хайдағ даа кӧдірімде сыйыхтығ орыннар ӱчӱн харбазығ хазыр иртер. Маңат тимненіс кӧзіткен хыстар Россия первенствозында аралазарлар нооза. Анда сыйыхтығ орын алып алза, улуғ марығларда аралазар алғым чол хайзына даа азылча.
Чииттер харбасчатханын кӧрерге хынығ. Сіліг кӱресчелер. Уламох пӧзік устығ кӱресчілер махалығ микелернең тузаланчатханы кӧрігҷілерге ӧрініс ағылча. Ол даа сылтағнаң Ағбанда Иван Ярыгиннің адынаң Кӱрес туразында суулас ӱр нимеске дее тохтабинчатхан. Пірее ӧктем хылыхтығ тренерлер сала ла кибіссер сығара чӱгӱрбинчелер, ӱгренҷізінің ӱчӱн харбазарға сағынчатхан осхастар. Суум-саам уламох тың кӧдіріл килче, хаҷан пастағы разрядтығ кӱресчі хыс спорт узын саннарнаң утчатса.
Мына кибісте Хызылчардаң килген Регина Миллер паза Тува чонның хызы Алдынай Даржаа китеніс чӧрчелер. Регина кибісте наа кізі нимес, тиң частығлар аразында Россия чемпионы полған, Европа мариинда харбазып, хола медаль утхан. СФО мариинда, нӧӧс, прайзын утып албас. Чох, аның сағызы толбин парған. Ол даа хайдаң пілген кибісте ағаа тилекей чемпионынаң харбазарға киліс парарын. Алдынай Даржаа 2018 чылда андағ чалтырама чидіге читкен, мында даа маңат тимненіс кӧзіткен, позының кӧдірімінде прайзын хыра утхан.
Пістің чир-суғҷыларыбыс санынаң тӧрт кӱресчі азах меетке сығып алған. Оларның хайзы даа сіліг кӱрес кӧзіткен, чиңіске парчан кӱзін салған. Че марығ ол марығ нооза. Ағбандағы кибіссер артыхтарның артыхтары сых турғаннар. Іди Дарья Чебодаеваа пастағы орын ӱчӱн Дарья Хвостованаң харбазарға киліс парған. Чир-суғҷыбыс спорт узына кандидат полза, Хызылчардаң килген кӱресчі спорт узы, тилекей мариинда кӱмӱс медаль утхан. Аннаңар даа Лидия Карамчакованың ӱгренҷізі маңат харбасхан, пірдеезіне чиңіс тудар оңдай пирбин турған.
Мында чир-суғҷыбыс Светлана Бутонаеваны махтирға кирек. Ол Таштып чирінең, пастағы разрядтығ кӱресчі. Че спорт узына кандидаттарнаң тиңнең тиңе харбазып, азах меетке сығып алғаны уғаа маңат чидіг. Алтын медаль ӱчӱн ағаа Иркутск облазынаң килген Марина Акулёнокнаң харбазарға киліскен. Аалҷы хыс чир-суғҷыбыстаң ікі часха улуғ, кӧп аймах марығда араласхан. Ол сылтағнаң Маринаның кӱресчеткені артых пілдірген, ол алтын медальның ээзі полыбысхан.
Андағох ӱлӱс тӱскен Карина Барашковаа. Азах меетсер сығып алып, чиңіске парчан кӱзін салза даа, Иркутсктаң килген Елизавета Чеснокованың узы даа, опыды даа артых полған. Аалҷы ибзер алтын медальлығ айланған.
Амды постарының кӧдірімнерінде сыйыхтығ орыннарға сығып алған кӱресчі хыстарнаң таныстырчабыс:
50 кг - 1 орын -Алдынай Даржаа, Тува;
2 орын - Чайгана Тумат, Тува;
3 орын - Олимпия Чебодаева, Хакасия паза Регина Миллер, Хызылчар;
53 кг -
1 орын - Дарья Хвостова, Хызылчар;
2 орын - Дарья Чебодаева, Хакасия;
3 орын - Нина Абрамова, Хакасия паза Надежда Полозова, Хызылчар;
55 кг
- 1 орын - Елизавета Чеснокова, Иркутск;
2 орын - Карина Барашкова, Хакасия;
3 орын - Виктория Литвинюк, Хызылчар паза Ольга Здоровенко, Кемеров;
57 кг -
1 орын - Марина Акулёнок, Иркутск;
2 орын - Светлана Бутонаева, Хакасия;
3 орын - Милена Кухарева, Новосибирск паза Айрана Ооржак, Тува;
59 кг - 1 орын
- Надежда Спицына, Кемеров;
2 орын - Кристина Кондратьева, Иркутск;
3 орын - Ольга Абрамова паза Камила Кузнецова, ікізі Хакасия;
62 кг -
1 орын - Кристина Тамразян, Иркутск;
2 орын - Урунза Кужугет, Тува;
3 орын - Юлия Артышко, Хызылчар паза Анастасия Тестова, Новосибирск;
65 кг -
1 орын - Алина Климова, Хызылчар;
2 орын - Арина Наумова, Кемеров;
3 орын - Кристина Аншукова, Хызылчар паза Александра Анохина, Иркутск;
68 кг -
1 орын - Валерия Ганусовская, Кемеров;
2 орын - Алеся Донгак, Тува;
3 орын - Дозураш Саая, Тува паза Ангелина Смирнова, Хызылчар;
72 кг -
1 орын - Валентина Тохтаева, Иркутск;
2 орын - Анастасия Новикова, Кемеров;
3 орын - Софья Захарова, Хакасия паза Елизавета Якушева, Хызылчар;
76 кг -
1 орын - Елизавета Вихарева, Хакасия;
2 орын - Людмила Дуденкова, Иркутск;
3 орын - Нури Нуриева, Кемеров паза Елизавета Винник, Хызылчар.
Таныхтирға кирек, Сибирьдегі федеральнай округта саналчатхан 10 регионнаң Ағбанзар 6 команда ла чыылысхан, прай 71 кӱресчі саналған. Амды СФО мариинда сыйыхтығ орыннарға сыххан, марығ тузында маңат тимненіс кӧзіткен кӱресчі хыстар Россия первенствозында аралазарлар. Ізенчебіс, чир-суғҷыларыбыс санынаң анда піреезі хайди даа сыйыхтығ орынға сығып алар, ибзер медальлығ айланар.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде