«БИРЮСАҒА» ПОЛЫС ПИРЕР ОҢДАЙЛАР ТІЛИРЛЕР
17.04.2019
Хабарлар
Аал хонии министрі Сергей ТРУФАНОВ, Хакасия пазы Валентин КОНОВАЛОВ, «Бирюса» ООО-ның устағҷызы Александр ЩЕРБАКОВ паза аның орынҷызы Александр МАРАЧКОВ предприятиенің пӱӱнгі сидіксіністерін ӱзӱрчелер.
Аал хонии. Ирткен неделяда Хакасияның пазы Валентин Коновалов Алтай аймаандағы Киров аалда «Бирюса» ООО-да пол килген.
ПІСТІҢ РЕГИОНДА «БИРЮСА» ООО ТОҢАСТЫҒЛАР ӦСКІРЧЕТКЕН ИҢ УЛУҒ ПРЕДПРИЯТИЕЛЕРНІҢ САНЫНДА. СУЛАДАҢ, ПУҒДАЙДАҢ ПАСХА, ОЛ ІДӦК ГРЕЧКА, РАПС, СОЯ САЛЧА, 400 ПАС ГЕРЕФОРД ТӦЛЛІГ МАЛ ПАЗА 150 ПАС АТ ТУТЧА. АМҒЫ ТУСТА АНЫҢ ТААРЫҒ ЧИРЛЕРІНІҢ УЛИИ 8 МУҢ ГЕКТАРНЫ АС ПАРҒАН.
ХАКАСИЯ ПАЗЫНЫҢ «БИРЮСА» ООО-ның УСТАҒ-ПАСТААНАҢ ТОҒАЗИИНЫҢ ӦӦН СУРИИ -ОЛ ЧАСХЫ ХЫРА ТОҒЫСТАРЫНА ТИМНЕНІС ХАЙДИ ПАРЧАТХАНЫН ПІЛІП АЛАРЫ.
АМҒЫ ТУСТА ПРЕДПРИЯТИЕДЕ ТОҢАСТЫҒЛАРНЫ ХАЙРАЛЛИР ЧАХСЫ ОҢДАЙЛАР ПАР, ЧЕ ТЕХНОЛОГИЯ КОМПЛЕКСІ ТОЛДЫРАЗЫНАҢ ТОҒЫНМИНЧА.
«БИРЮСА» ООО-ның ЧЫЛДА 3 МУҢ ТОННАӋА ТОҢАСТЫҒЛАР СЫҒАРАР ОҢДАЙЫ ПАР, ЧЕ ХАЛҒАНӋЫ ЧЫЛЛАРДА ОЛ 1900 ТОННА ЛА ТОҢАСТЫҒЛАР ӦСКІРІП АЛЧА. «БИРЮСА» ООО-ның ДИРЕКТОР ОРЫНӋЫЗЫ АЛЕКСАНДР МАРАЧКОВТЫҢ ТАНИИНАҢ, АНЗЫ ХАЛҒАНӋЫ ІКІ ЧЫЛҒА ГРЕЧИХАНЫҢ ПААЗЫ 4-5 ХАТИ ТӰС ПАРҒАНЫНАҢ ПАЛҒАЛЫСТЫҒ.
- Пӱӱнгі кӱнге гречиханың паазы сала ӧс парған. Килограмм 18 - 20 салковайға турча. Че амғы туста ол позының сын паазынаң ікі хати ниикке турча. Аның паазы ӧспезе, піс мыннаң мындар хайди тоғынарын пілбинчебіс. Пуғдайнаң паза суланаң тиңнестірзе, гречиханы ӧскіреріне хорадығлар асхынах арах, аннаңар аны таарыпчабыс. Мыннаң мындар ідӧк ӧзімнерні ӱреннерге ӧскірерге пӧгінчебіс, - сағыстарынаң ӱлескен Александр Марачков.
«Бирюса» ООО-ның устағ-пастаа Хакасия пазы Валентин Коноваловха паза аал хонии министрі Сергей Труфановха, тоңастығлар хурутчаң паза хайраллаҷаң комплексті кӧзідіп, аның тоғынчатхан оңдайынаңар чоохтап пирген. Автомат системазы полызиинаң комплекснең пір ле оператор тоғынча. Анда 14 муң тоннаа теере тоңастығларны хайраллирға чарир. Пу комплекс 2015 чылдаң сығара тоғынча. 2008 чылда, наңмырлар удаа чаап, предприятие ӧскіріп алған гречихазын прай чідір салған соонда, оборудование нааҷылирдаңар чарадығ алылған. 2011 чылда комплекс пӱдірерінеңер «Neuero» немец компаниязынаң чӧптезіг иділген. Пӱӱнгі кӱнде пу комплекс полызиинаң суткада 800 тонна тоңастығлар тимнелче. «Бирюса» ООО-да ідӧк чағбан хайахты хайраллачаң оңдай пар. Че Александр Марачковтың чооғынаң, халғанчы ӱс чыл чир тың тустығ пол парғаннаңар, чахсы качестволығ хайах сығарар хузух ӧскіріп аларға киліспинче. Аннаңар аның сығарызы тохтадылған.
Таныхтирға кирек, Ағбанда иртчеткен аал хонии ярмаркаларында «Бирюса» ООО сыбыра араласча. Ағбан чуртағҷылары аның гречказын хынып алчатханын сизінгем.
Аал хонии предприятиезінің устағ-пастаа Хакасия пазы Валентин Коноваловха малларын кӧзіт пирген. Герефорд тӧлліг інектернің саны - 400 пас. Хыстағ соонаң от илееде халтыр, анзы ирткен чылда мал азии кӧп тимнелгеннеңер чоохтапча.
Часхы хыра тоғыстарын пастир ӱчӱн предприятиее ГСМ, удобрение, ӧзімнер арачылаҷаң имнер аларына паза техника тыхтирына хоза ахча киректелче. Амғы туста «Бирюса» ООО-ның алнында мындағ сурығ турча - малларны садыбызарға алай пасха оңдайлар тілирге. Че мал санын хызырыбысса, тоғысчыларның даа санын хызырарға килізер. Пӱӱнгі кӱнде предприятиеде 100-че кізі істенче.
- Кізілерні тоғыс чох артызарға айастығ. Пілдістіг, прайзы кредиттер тӧлепче. Аннаңар пірдеезiн тоғыс чох артызарға хынминчабыс, - теен Александр Марачков.
Хакасия пазы аал хонии паза ас-тамах министерствозына предприятиее полыс пирер оңдайлар тілирге чахығ пирген.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде