КАЗАХ ЧИРІНДЕ УСТАРЫН КӦЗІДЕРЛЕР
19.04.2019
Хабарлар
«Хазыр суғ» ансамбль Казахстанда чоннар аразындағы «Саз пернелі Сарайшык» фестивальда аралазар.
Атырау городта (Казахстан) 26 - 28 апрельде «Саз пернелі Сарайшык» тӱрк чоннарының I фестиваль-марии иртер. Анда устарынаң музыканттар сыназарлар. Хакасияның культура министерствозының таниинаң, фестивальда иң саблығ чайаачы ӧмелер, ансамбльлар, ырҷылар аралазарлар. Республиканың ӱчӱн Хакас драма театрының «Хазыр суғ» ансамбльы турызар.
Чайаачы ӧме 2014 чылда музыкант паза композитор Тамара Давлетованың кӱстенізінең тӧстелген. Ансамбльның кӧглері «Хан Мирген», «Тарынҷах харға», «Алып Пил Тараан», «Пыром таста, чирім», «Алаахтыртхан Хорхло» паза пасха даа ойыннарны чазапчалар. 2014-2015 чылларда «Хазыр суғ» ансамбль, Тувада паза Тағлығ Алтайда ирткен марығларда кӱстерінең сыназып, лауреат атха турысхан. 2016 чылда чайаачы устар гастрольларнаң Хыдатсар чӧргеннер.
Чоохтирға кирек, ансамбль араласчылары пӧзік устығ музыканттар паза ырҷылар. Олар, аймах-пасха синде иртчеткен марығларда аралазып, кӧп хати лауреат атха турысханнар. Ӧменің устағҷызы Тамара Давлетова (чатхан, хомыс) илееде ойынға музыка пас салған. Наталья Сарлина (хомыс) пылтыр «От ыры» чоннар аразындағы марығда сыйыхнаң таныхтаттырған. Вячеслав Албычаков, ыыхнаң ойнап, морсымнығ хайлапча. Анна Куюкова (тӱӱр) чіли Хакасияда хобырахнаң саннығ ла кізі ойнапча полар.
Чир-суғҷыбыс «Саз пернелі Сарайшык» фестивальда пістің чонның культуразын турыстыра кӧзідерлер тіп ікінҷілес чоғыл.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде