АЙА САБЫЗЫ ӰЗӀЛБИНЧЕТКЕН
14.05.2019
Хабарлар
Концерт. Асхыстағы олған искусство школазы сан пирістіг концерт кӧзіткен.
Халғанҷы тустарда Асхыстағы культура туразынзар іҷе-пабалар удаа чыылызадыр. Анда искусство школазының ӱгренҷілері концерт кӧзідедір. Пасха даа кізілер килчелер. Ноға тиирзер. Ол чайаачылар устарына хынчатхан улус полар. Залға чон толдыра поладыр, ол даа кӱн ідӧк полған. Сценаа чағын арах орын таап аларбын тіп сағынғам, че пос орын чохта, хана хоостыра турчатхан одырчыхта одырыбысхам.
Концертті хакас чонның кӧг тиріглерінің ансамбльы пастаан. Олғаннар хандыра ойнапчалар. Пірее музыка оңдайын пілчеткен кізі тиир: «Анда саба ойнааннар, мында алчаас иткеннер». Анзы оларның кӧрізі. Піске, тізең, олаңай чонға, ойнааннары чахсы. Прайзы тӧӧй кип кизібістір, от кӧк ӧңніг.
Аннаң андар олғаннар пісті ырлапчатханнарынаң хайхатханнар. Баянисттер, рояльнаң ойнапчатханнар устарын кӧзіткеннер. Оларны кӧріп, сағынчазың, мындағ кічіг палалар баянның алай фортепьяноның клавишалары аразында хайди астых парбинчалар. Пір дее туртухпин ойнап парчалар. Пір-ікі баянист полза, анҷох. Мында баян ойнапчатханнарның ансамбльы килкімге сценада. Оларның соонаң гитаранаң ойнапчатханнар сыхханнар.
Анаң сценада оолағастар ырлааннар. Олаңай ла сарын, че олар аны хайди чахсы толдырыбысханнар. Хайдағ-да джазовай группаа кӧӧгіп, кӧмес теелбектеніп, холларын пулғап, салааларын тырлат парчалар. Анзы истілбинче, че сизінчезің. Мындағ оолахтар парда, Асхыстың иреннер хоры ырлирын хаҷан даа тохтатпас, хончых чуртапчатхан чонны хайхадар.
Асхыстағы олған искусство школазының устағҷызы Неля Иптышева олғаннарға Аарластығ пічіктер паза сыйыхтар читірген. Ідӧк ол іҷе-пабаларны алғыстаан.
Халғанҷызында теелбекчілернің кічіг класстағылары устарын кӧзіткеннер. Хызыҷахтар тӧӧй кип-азахтығ, сығып, ырлааннар. Оларның хоры чыл сай хозылып одырча. Ӱгреністі тоозыбысханнары парыбысчалар, кічіглері орнына килчелер. Хорнаң устапча Снежана Асочакова. Ол Екатерина хызынаң хада «Часхы пулуттар» сарынны дуэтнең толдырғаннар. Улуғ улусха пу сарын хайда-хайдар хандыра.
Прайзын кӧрігчілер айа сабызынаң алғыстааннар. Баянисттер ансамбльынаң устаан Изольда Тоданова, теелбекчілернең - Лариса Тюльберова. Хоосчы чайаачыларның тоғыстарынаң таныстырған Мадина Ахпашева. Школаның прай ӱгретчілері чахсы тоғыныбысханнар. Аннаңар даа пу концертке чон хынып килче. Алғыс ӱгретчілерге, олғаннарның чайаачы хуттарын кӧдірчеткен ӱчӱн.
Автор :
Михаил ИДИМЕШЕВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде