АЧЫХ-ЧАРЫХ КӦҢНІЛІГ ПАЗА ЫР-САРЫННАРНАҢ
27.08.2019
Хабарлар
Ӱлӱкӱн. Хакасия чуртағӌылары Россияның хазна флагы кӱнін пайрамнығ концертнең таныхтааннар
Орғах айының 22 кӱнінде тиксі хазнада Россия флагының кӱнін таныхтааннар. Хазнабыстың ӱс ӧңніг чаламазына пӱӱл 350 чыл толған. Хакасияның аал-городтарыңда паза аймахтарында пу ӱлӱкӱнге чарыдылған аймах-пасха мероприятиелер ирткен.
Кӧзідімге, Харатас чуртағҷылары велосипедтіг ойлатханнар, ол чорых «Россия флагы» адалған. Асхыс аймааңдағы Тӧӧ пазында, тізең, Хазна флагы кӱніне чарыдып, марығ иртіргеннер - Хакас Республиканың лыжероллерлерҷе азых чемпионадын. Хакасияның ӧӧн городында сувенир осхас флагастар идерінҷе мастер-класстар ирткен, «Триколор - минің флагым» хоостар марии полған. Волонтёрлар иртчеткең кізілерге ах-тигір кӧк-хызыл чаламалар, флагастар ӱлееннер паза флагтың тархынынаңар, аның ӧңнері нимені таныхтапчатханынаңар чоохтааннар.
Че иң не ӧӧн мероприятие Ағбанда Пастағы май ачығында ирткен. Россияның Хазна флагы кӱніне чарыдылғаң пайрамнығ концертті В.Г. Чаптыковтың адынаң Хакас республика филармониязының хоры, Россия гимнін толдырып, асхан.
Аның соонаң Хакасияның чон артизі Герман Танбаев Хакас Республиканың гимнін толдырған. Республика филармониязының, С.П.Кадышевтің адынаң культура паза чон чайаачызы кінінің артисттері, теелбек ӧмелері город чуртағҷыларын чапсых хакас, орыс сарыннарынаң паза теелбектерінең ӧріндіргеннер.
Ӱлӱкӱн концертін кӧріп аларға килген чонның кӧңні ачых-чарых полған, прайзының холында флагастар алай шарлар полған. Ідӧк Пастағы май ачығынзар улуғ флаг ағыл килгеннер, ол чайылған флагты онҷа кізі тутхан.
Улуғ нимес концерт соонаң кізілер иблерінзер андағох чахсы кӧңніліг парғаннар - тоғынҷаң кӱн соонаң кӧмес тынанып алғаннар нооза.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде