НАНДЫРЫҒЛЫҒ ПОЛЧАТХАНЫН УНДУБАЗЫННАР
30.08.2019
Хабарлар
![НАНДЫРЫҒЛЫҒ ПОЛЧАТХАНЫН УНДУБАЗЫННАР НАНДЫРЫҒЛЫҒ ПОЛЧАТХАНЫН УНДУБАЗЫННАР](/upload/iblock/099/099d9c60cffeb72bcc706256d2cebb66.png)
Ӱлгӱ. Киҷее Хакасияның пазы Валентин Коновалов республика правительствозының чыылиин иртірген
Пастап Валентин Коновалов хазна сыйыхтарын читірген. «Боевое братство» тиксі Россиядағы халых пірігізінің Хакас республикадағы пӧлиинің кнезі Александр Векшин Россия президентінің указы хоосты-ра «За заслуги перед Отечеством» II степеньніг орденнің медальынаң сыйыхтатхан. «Механизированная колонна №8» пӱдіріг компаниязының ӧӧн директор орынҷызы Сергей Можаровха «Хакас Республиканың саблығ пӱдірігҷізі» аарластығ ат пирілген.
Министрлер кабинеді тоғысты хысхызына тимненістең пастаан. Пу сурығча Хакасия пазы орынҷызының тоғызын толдырчатхан Константин Харисов чоох тутхан. Аның искіриинең, республиканың коммунальнай хонииның тиксі тимненізі пӱӱнгі кӱнге 80%. Котельнайларға хара тас пилетелче. Сағыссырастығ кирек Харатас городта. Пӱдіріг паза ЖКХ министрі Сергей Новиков, хоза чоох тудып, аймахтарда чылығ пирчең муниципальнай-казеннай предприятиелер тӧстирінҷе тоғысха хайығ айландырған.
- Чылығ пирҷең тус чағдапча, аннаңар тимненіске прай кӱстерні тастирға кирек, - таныхтаан Хакасияның пазы Валентин Коновалов. - Реформа иртірерін, райтоптар тӧстирін, хатығ сыныхтағда тударға кирек: сірер (муниципальнай пӱдістер) алай реформа иртірерзер, алай республика хабазығ пирерін тохтадыбызар. Ундирға чарабас - муниципальнай пӱдістернің пастары чылығ пирчең тусха тимненері паза аны иртері ӱчӱн алынча нандырчалар.
Теестегі сурығ ӱр ниместе ирткен бизнес-форумның салтарына чарыдылған. Хакасияның финанстар министрі Ирина Войнова ол турыстығ ирт парғанын таныхтаан.
- Араласчылар саны даа ӧсче. Ирткен чылда 400 кізі полған, пӱӱл - 500 артиинаң, - искірген министр.
Форумның салтарынҷа кічіг бизнеске хабазарынҷа алынҷа чарадығлар алылған. Оларның пірсі идінҷектерге налог синін 15%-тең 7,5%-ке теере тӱзірердеңер полча тіп чоохтаан Войнова.
Соонаң министрлер чайғыдағы олғаннарны тынандырҷаң-хазыхтандырҷаң кампанияның салтарын паза наа ӱгредіг чылына тимненісті ӱзӱрібіскеннер. Палалар чайғыда хайди тынанғаннаңар республиканың социальнай арачыланыс министрінің тоғызын толдырчатхан Наталья Дьяченко искірген. Аның чооғынаң, пӱӱл тынағ лагерьлерінде 35867 пала хазиин тыытхан, ирткен чылнаң тиңнестірзе, 1539 палаа кӧп. Ідӧк пӱӱл суға кірген Иркутск облазынаң 39 пала РУСАЛ-ның хабазиинаң Хакасияда хазиин тыыдып алтыр.
1 сентябрьға тимненістеңер ӱгредіг паза наука министрі Лариса Гимазутина чоохтаан. Министрнің искіриинең, республиканың прай даа ӱгредіг заведениелері наа ӱгредіг чылына тимделер, піреелерінде ле оох-теек читпестерні тӱзедерінҷе тоғыстар апарылча.
Валентин Коновалов Ағбандағы 1 муң ӱгренҷее кӧрілген школаның пӱдіриинҷе кирек хайди парчатханын город пазы Николай Булакинні искір пирерге сурынған.
Ағбан пазы пӱдіріг федеральнай министерствонаң иділген чӧптезігҷе апарылчатханын искірген. Аның пӱдіриине федеральнай бюджет 675 миллион салковай позытча, город бюджеді - 240 миллион салковай. Пічіктерҷе 2018 чылның февральынаң сығара пӱдіріл сыххан школа 2020 чылның 5 февральына тимге сых парарға кирек. Город пӱдірігні 2019 чылның 1 сентябрьына тимге сығарарға пӧгінген. Че чыл пасталчатханда, федеральнай бюджеттең 4 айҷа ахча пирілбеен тіп чарытхан Булакин. Че пасталығ класстар корпузы 5 сентябрьдаң тоғынып пастабызар тіп кӧрілче. Школа-лицей, тізең, толдыразынаң 1-1,5 ай пазынаң тимде полар тіп ізендірген город пазы.
Чыылығның халғанҷы сурығларының пірсі ас кизер паза малға азырал тимнир тоғыстарға чарыдылған. Аал хонии паза ас-тамах министрі Сергей Труфанов ас кисчең кампания пу неделяда пасталыбысхан теен. Пурун Пии аймааның хоныхтары ас кис сыхханнар, оларның соонҷа -Алтай аймаандағылар.
- Пӱӱнгі кӱнге 870 гектар тоңастығлар кизілген, - саннарнаң таныстырған министр. - Тамахтың ортымах сығызы Пии аймаанда гектардаң 22,8 центнер, Алтай аймаанда -15,2 центнер.
Труфановтың искіриинең, министерство тоғынҷылары, чазыларҷа чӧріп, ӧсчеткен асты кӧргеннер. Пӱӱл ас чахсы сыхтыр. Малға азырал тимнир тоғыстар ам даа апарылча, амғы тусха республикада 112 муң тонна от тимнел партыр. Пасха фермерлер ӱӱчік тамахтарын чыып пастабыстырлар.
Хакасияның пазы Валентин Коновалов аал хонии министрін ас кисчең паза малға азырал тимнир тоғыстарны хатығ сыныхтағда тударға паза неделя сай ағаа искір турарға чахығ пирген.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде