ЧОҒАРХЫ СИРДЕГІ ПАЛАЛАРҒА - СЫЙЫХТАР
06.09.2019
Хабарлар
Виталий КУНУЧАКОВ ӱгренҷілерге сыйыхтар читірче
Наа ӱгредіг чылы. Чайғы тынағ тузы иртібӧк парды. Палалар, парта кистіне одырып, наа кӱснең піліс аларға чапсыныбыстылар
Хакасияның ыраххы паза кічіг аалларының полғанының на позының кураторы пар. Республиканың министерство-ведомстволары аалыҷахтарны хайығда тутчалар. Ӱлӱкӱннерге орта городтағылар аалдағыларзар сыйыхтығ ааллап кил парчалар. Ол санда, хаҷан олғаннар наа ӱгредіг чылына тимненчетселер. Таштып аймаандағы Чоғархы Сир аалның кураторы Хакасияның юстиция киреенҷе паза регионны хорғыстардаң арачылаңаң министерство полча. Наа ӱгредіг чылы алнында министерствоның тоғынҷылары «постарының» аалында пол килгеннер. Индіркі Сир аал чӧбінің пазы Евгений Камаловнаң азынада чоохтазып алып, пӱӱл пастағызын на школаа парчатхан палаларны чыып алғаннар. Ол кӱн городтаң килген аалҷыларның санында полғаннар: правоҷа хазна департаментінің устағҷызы Виталий Миллер, олох департаменттің палғалыстар тӧстепчеткен пӧліктің пастығы Виталий Кунучаков паза департаменттің советнигі Галина Шишкина.
Пу чыл Чоғархы Сирде 1-ғы классха тӧрт пала парчаттыр - ікі оолах, ікі хызыҷах. Оларға кураторлары портфельлер ағыл килтірлер. Аның істінде ӱгредіге кирек прай ниме-ноо пар. Аннаңар іҷе-пабалары палаларын школаа тимнеен дее ползалар, мындағ полызығ уғаа килістіре. Аймах кінінзер, городсар удаа чӧрерге киліспинчеткенде, піди пилен ағыл пирчеткені чахсы нооза.
Сыйыхтар пирілген соонда городтаң килген аалҷылар, аал пазы, ӱгретчілер, іҷе-пабалар чоох-чаахнаң одырып алғаннар. Анаң прайзы хада сомға суурыныбысханнар.
Минің кӧрізімнең, республиканың министерство-ведомстволары аалларнаң піди палғалыс тутчатханы уғаа чахсы чӧрім. Сынап таа кічіг паза ыраххы аалдағылар тӧреміл тоғыс чохтар нооза. Ахча идіп аларға пірее мал садыбысса ла киліс парча. Аннаңар сӧбіреде сыбыра ахча полбинча. Кураторлар піди полызығ пирчеткені най туза пол парча.
Автор :
Георгий КУНУЧАКОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде