ХАКАС ЧОННЫҢ ГАЗЕТАЗЫ
10.09.2019
Хабарлар
Хакас тілі кӱні. 4 сентябрьда пістің республика Хакас тілі кӱнін таныхтаан. Тӧреен тілнең палғалыстығ организациялар аймах мероприятиелер иртіргеннер
Ағбандағы 24 № школаның ӱгренҷілеріне «Хабар» газетаның редакциязында экскурсия ирткен. Аалҷыларны ӧӧн редактор Радион Дмитриевич Сунчугашев чылығ удурлаан. Аның орынҷызы Наталья Субракова олғаннарға «Хабар» газета хайди тимнелчеткеннеңер чоохтаан.
Библиотекада ӱгренҷілер иң пастағы «Хызыл аал» газетаны кӧргеннер. Наталья Субракова «Ленин чолы» газетаны сығар килгенде, прайзы чапсаан, ол килкім газетаа олғаннар матап морсынғаннар. Газета сайтының устағҷызы Сергей Майнагашев олғаннарға позының тоғызын чарыт пирген. Ӱгренҷілер аны поэт Сибдей Том адынаң чахсы таныпчаттырлар.
Ӧӧн редактор Радион Сунчугашев чалғыс хакас газетаның тархынынаңар хысхаҷахти искір пирген: хайди 1927 чылда пастағы «Хызыл аал» хакас газета сыххан, ноға ол «Ленин чолы» адал парған, анаң «Хакас чирі» пол парған, соонаң хайди «Хабар» атха алыстырылған. Ідӧк Радион Дмитриевич олғаннарға редакцияның сыйыхтарын кӧзіткен.
Ӱгренҷілерге ӧӧн редакторның кабинедінде ааллирға чапсых пілдірген. Экскурсияа килгеннернің аразында иң ӧткін Азис Боргояков полған. Ол ӧӧн редакторның сурығларына, пір дее уйатпин, ӧткін нандырған.
Экскурсия тоозылғанда, олғаннарны чей ізерге хығырғаннар.
- Улуғ алғыс Сірерге пісті «Хабар» газетаның редакциязынзар ааллап хығырған ӱчӱн, - ӧрінгенін чазырбин, ӧӧн редакторға чылығ сӧстерін читірген 24 № школаның хакас тілі ӱгретчізі Олеся Илларионовна Улугбашева. - Амды олғаннар хабарӌыларның тоғызын чахсы оңарарлар. Мыннаң мындар сірерге хозым чахсы ползын, чолыңар азых ползын, сағынған сағыстарың толзын, андағох сыйыхтығ орыннар ал турыңар, пасха СМИларның алнында ла пар турыңар.
Ӧӧн редактор Радион Сунчугашев ідӧк олғаннарны редакциязар ааллап килген ӱчӱн алғыстаан. «Редакциянын істін, хабарыларның тоғызы хайди парчатханын кӧріп аларға хынығ полды ба?» - сурған ӱгренҷілердең Радион Дмитриевич. Прайзы пір ӱннең «Я!» нандырған.
- Хакас тілі кӱні тӧреен тілібісті мыннаң мындар тилідерге, аннаң чоохтазарға, аны хайраллирға туза полар, - чоох тутхан Р.Д.Сунчугашев. - «Хабар» - хакас чонның газетазы. Ол республикада частаң иң улуғ, прайзынаң пурун сыххан. Ізенербіс, газетабыс аннаң андар чуртир, тілібіснең тузаланарбыс, ол тилир. Арса, сірернің аразында чуртазын хакас тілінең палғалыстырӌаң кізі поларох. Тӧреен тілнең ӱгретчі, воспитатель поларға, науканаң айғазарға, артист алай хабарӌы поларға чарир.
Сағыныңар, постарыңның алнында кӧстеглер турғызыңар. Анаң ӧӧн редактор оолах-хызыҷахтарға «Хабар» газетаның блокнот-ручкаларын читірген.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде