ӰРТӰН АЙЫНЫҢ СІЛІГ КӦГЛЕРІ
18.09.2019
Хабарлар
Дирижёр Вячеслав ИНКИЖЕКОВ паза фестивальный хоос устағҷызы Анастасия СУБРАКОВА гала-концерт тузында
Фестиваль. Классика музыказының III чоннар аразыңдағы фестивальы кӧрігҷiлерге кӧп ӧрініс ағылды
Хайдағдыр ол «Ӧлім теелбегі»? Нимедеңер виолончельнең скрипка «чоохтасчалар»? Кларнет хайдағ толбаан сағызын «искірді»? Прай пу сурығларға нандырған музыка фестивальы. Нандырған опера ӱзіктерінең, кӧглернең, хайхастығ музыканаң.
Пӱӱл «Тилекейдегі чиит музыканттар Хакасияда» фестиваль ӱзінҷі хати иртірілді. Пастағы туста Европаның иң саблығ консерваторияларында ӱгренчеткен чииттер пеер килерінде ікінҷілестіг полған полза, амды пілдістіг пол парды: наа фестиваль кибірге кір парды. Чон аны чидікпин сағыпча. Араласчылар даа Хакасияда иртчеткен музыка пайрамына азынада тимненчелер.
Фестиваль программазы ӱчӱн скрипач Анастасия Субракова нандырча. Хакас абахай чир-суғҷыларын тилекейдегі иң саблығ классика музыказының тоғыстарынаң таныстырарға кӱстенче. Аның кӱстенізінең пӱӱл пістің кӧрігҷілер П.И.Чайковскийнің, С.В.Рахманиновтың, Ф.Листтің, И.Брамстың, Б.Бартоктың, И.Ф.Стравинскийнің, Д.Д.Шостаковичтің произведениелерін истіп алғаннар. Ағаа хоза программада Дж. Вердинің, Г.Доницеттинің опера ӱзіктері полғаннар. Прай чайаачы тоғыстарны музыканттар пір тыныснаң толдырғаннар тиирге чарир.
Фестивальға сығарылған произведениелердеңер чоохтаза, П.И.Чайковскийнің соонда И.Ф.Стравинскийнің чайаачызын оңарарға андағ ла оой нимес полтыр. Музыканттар орыс композиторнын «История солдата» сюитазын толдырғаннар. И.Ф.Стравинский андар орыс фольклорын, джаз кӧглерін кир салған, салтарында, минің кӧрізімнең, «какафония» пол парған. Пианист Кристоф Беррюэ Настянаң чӧптескен соонда фестивальға Ференц Листтің «Ӧлім теелбегі» саблығ тоғызын таллап алтыр. Венгр композиторы, аны чайап, хайдағ даа пай, хыйға, кӱстіг ползаң, хаҷан-полза Ӧлімге алаахтырт саларзың сағысты читірген. «Ӧлім теелбегін» истерге аар, анда саста чіли патчазың.
Анастасия Субракованаң Элиза Ханафина кӧрігҷілерні композитор И.Брамстың «Концерт для скрипки и виолончели с оркестром» тоғызынаң ӧріндіргеннер. Пӱӱнгі кӱнде пу произведение тилекейдегі иң саблығ концерт залларында толдырылча. Чоохтирға кирек, Анастасия, Элиза паза Кристоф, пірігіп, чайаачы ӧме тӧстеп алғаннар. Пӱӱл мартта олар «Kiwanis» фондтың мариинда (Швейцария) аралазып, ікінҷі орынға сыхханнар. Чайаачы ӧменің программазы улуғ, пӧгіннер кӧп. Элиза Ханафина Башкортостаннаң, татар чонның хызы полчаттыр. Фестиваль хоостыра сағыстарынаң ӱлезіп, виолончелист Боградтағы кӧрігҷілерні пӧзік паалаан. «Піс ӱс хати биске произведениелер толдырғабыс. Анда классика музыказына хынчатхан чон чуртапчаттыр», - теен Элиза. Ідӧк абахай музыкант татар паза хакас тіллері тӧӧй полчатханына чапсаан. Кристоф Беррюэ пис тіл пілчеттір, ол санда чахсы орыстапча. Аның кӧңніне Хакасияның чазылары кіргеннер.
Кларнетист Андрей Бандуринні Настя фестиваль программазын пайыдар пӧгіннең хығыртыр. Украинадағы музыкант - тилем чоохтаспинчатхан кізі, че симфоническай оркестрнең хада сығып, ол Дж.Россининің «Анданте и вариации для кларнета с оркестром» тоғызын прай кӧңнін салып толдырған. Хайдағ сіліг кӧг! Тиктең нимес кӧрігҷілер Андрей Бандуринні сценадаң позыдарға пір дее хынминыбысханнар.
Че прайзынаң тың Юки Цурусаки чапсытхан. Таланттығ ырҷы Италияның, Японияның ӧӧн городтарында концерттер иртірче. Пылтыр ол гонорар даа чох сарнирға ынаан. Мындағы чон аны чылығ удурлаан ӱчӱн пӱӱл хатап кил парды. Андағ оңдайнаң абахай Юки хакас кӧрігҷілерге алғызын читірген. Ол апсағы Жереми Шютцнең хада сарнирға пӧгінген. Че тенор ӱнніг ырҷыны Франциязар кинетін хығыртыбысхан сылтаанда, Юки Цурусаки Хакас филармониязының сценазынзар изебі чох таланттығ Алексей Пьянковнаң хада сыххан. Чиит кізі Артур Марлужоковнаң ынағласчаттыр. Юкинең Алексей хайди сарнадылар! Кӧрігҷілер оларны хараа-кӱнӧрте истерге тимде полғаннар.
Тоғыс хоостыра мағаа классика музыказының фестивальын-да ӱс хати поларға киліскен. Сизінгенде, кӧрігҷілер саны чылдаң чылға ӧсче. Фестиваль программазы даа алғыдылча. Пӱӱл музыканттар концерттернең Боград аймаанзар пар килгеннер. Алында Харатас, Саяногорск, Минсуғ городтарзар ла чӧрҷеңнер. Чайаачы устар, ХГУ-ның искусстволар институдының студенттерінең тоғазып, чиит улустың аймах сурығларына нандырғаннар. Хакасияның культура министрі Леонид Ерёмин фестивальның прай гала-концерттерінде полған. Проектке пӧзік паалағ пиріп, Леонид Валентинович музыканттарға улуғ алғызын читірген. Ол таныхтаан: «Пӱӱн піс классика музыказының III чоннар аразындағы фестивальынаң анымҷохтасчабыс. Олох туста IV музыка пайрамын хығырчабыс». Аның сӧстерін кізілер айа сабызынаң удурлааннар.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде