ПУРУНҒЫ ЧААҶЫЛАР МИКЕЛЕРІ
01.10.2019
Хабарлар
Арға-мӧрій. 28-29 сентябрьда Ағбанда 18 часха читкелек оол-хыстар Сибирьдегі федеральнай округтың дзюдоҷа первенствозында араласханнар, постарының устарын сынааннар
Пістің городта «Ағбан» спорткомплексте иртчеткен марығда 434 кӱресчі аралазарға тимненчеткенін ис салғанда, пастағы туста хахап таа парғам: анңа кӧп оол-хыс хайди ікі кӱн аразына прайзы харбазыбызарға маңнанар? Анаң позым позымны часхарғам, марығ чарғыҷылары хайди даа пірее ниме сағын таап аларға киректер. Сах іди пол парған. Ікі татами орнына ӱс татами тӧзеп салтырлар.
Ікі татамиде ооллар устарын сынааннар. Ӱзінҷізінде хыстар харбасханнар. Кибір хоостыра арға-мӧрійні кічіг кӧдірімдегілер асханнар. Ооллар даа, хыстар даа чалаас азахтығлар, кимоноларын пик хурнаң хурчан салтырлар. Мында мындағ ниме чапсытча: полғаны ла, ол санда марығ чарғыҷызы даа, татамизер сыхчатса, ағаа пазырча. Чарат мағаа синде харбазып аларға тіп, аның ээзінең сурынчатхан чіли тудынча.
Дзюдо Японияда пасталған спорт кӧріміне саналча. Анда ідӧк иң пастап каратэнең айғазып пастааны таныхталча. Итсе, тархында халған кӧзідімнер хоостыра, хас-хаҷанох спорттың пу кӧрімнерінең хазнаның пурунғы чааҷылары матап тузаланҷаң осхастар. Андағох оңдайнаң тудынҷаң полған ниместер бе пістің пурунғыларыбыс? Холларындағы чыда-хылыстарнаң пірее хати тузаланмин, аттаң тӱзіп, алып-кӱлӱктерібіс ыырҷыларынаң, чаба хухахха кірізіп, хабыза халңаңнар. Олаңай кӱресте тузаланылчатхан тізекке кӧдіріп алай нанға салып, саңай сас ойда тастир махалығ микелер пурунғыдаң хайраллал халғаннар. Иң кӱстіглері, тізең, ыырҷызын хол узына кӧдіріп, хайа-тасха чапсыра тастаңаңнар. Постары азах узында тур халҷаңнар.
Аннаңар мині дзюдо марии тузында ікі мике най тың чапсытхан. Пастағызын кӱресчі «ыырҷызын», азах узында тур халып, саңай сас ойда тастаза, сах андох ағаа чиңіс пирілче. Ікінҷізі - дзюдо микелерінің аразында иң махалыға саналча - ырғах суғып силгені. Хакас кӱрезінде дее ол сӱме тузаланылча, иң сіліг микелернің пірсіне саналча. Мында ирік чохта сағысха тӱсчезің: аралары чағын нимес хазналар, че кӱрес микелері тӧӧй.
Олох арада Японияда пасталған дзюдо спорт кӧрімінің пасхалалчатхан ӧӧн оңдайы - татамиде чадып харбазарға паза аймах микелернең тузаланарға чарадылчатханы. Анзы олаңай алай грек-рим кӱрестерде партерде харбасханынаң саңай пасхалалча. Аннаңар піреезі пастап ӧнетін аңдарылып алчатханға тӧӧй, анаң наа «ыырҷызын» пӱктеп-толғап пастабысча. Мында ӧӧні - «ыырҷызын» мойнынаң поо пазыбызар микелернең тузаланғаны. Ол даа сылтағнаң марығ тузында кӧрігҷілернің піреезі «аны поо тудыбыс!» тіп хысхырчатса, пастағы туста хайди-да изі чох арах пілдірче, кізі идінҷе соох чӱгӱрче.
СФО мариинда най кӧп кӱресчі араласхан сылтаанда, татамиде ирткен хазыр харбазығлардаңар хысхаҷахти даа искірҷең оңдай чоғыл. Пірдең, мында чиңіс тутханнары Россия первенствозында аралазар оңдай алардаңар прайзы даа чахсы пілче. Аннаңар даа чиңіске парчан кӱс салылғаны ідӧк тее пілдістіг. Ол сылтағнаң пірее кӱресчілер татамиде кӧрілген тустаң илееде артых иртір турғаннар - утыс полбин, матап сіренісчеткеннер. Хайдағ даа тоғазығ тузында чиңісчі поларға кирек.
Оңарылыстығ, СФО-ның полған на регионында дзюдо хомай нимес тиліпче. Аннаңар полған на командада Россия, Европа первенствозының араласчылары сыйыхха турысхан кӱресчілер полғаннар. Андағлар пістің чир-суғҷыларыбыс аразында табылғаннарох. Иң пастап спорт узына кандидат полчатхан Олег Генераловты, Захар Намны, Мария Клевцованы, София Кощееваны паза даа пасхазын адирға чарир.
Ікінӌі чир-суғӌыбыс Олег Генералов, 46 кг кӧдірім-де харбазып, СФО чемпионы полыбысхан. Оң ползын чир-суғӌыбысха Россия первенствозында. Пу кӧдірімде Роман Батраков хола медаль утып алған.
Азах меетте оң полбин парған Сергей Скуратенкаа. Ол 50 кг кӧдірімде харбасхан, азах меетке чидіп алған. Анда утыр салып, кӱмӱс медальны холға кирген. Аның нанӌызы Рауф Мамедов, пуох кӧдірімде кӱрезіп, ӱзінӌі орыннаң пӧзік кӧдіріл полбаан.
Хыстар аразында Мария Клевцованаң Анастасия Радыгина 44 кг кӧдірімде пастағы орын ӱчӱн харбасханнар. Мында Мария чиңіс тутхан, Россия первенствозында аралазар оңдай алған. Анастасия кӱмӱс медаль холға кирген.
Ідӧк кӱмӱс медальлар ээлері полыбысханнар София Кощеева - 52 кг кӧдірімде, Сусанна Снхчян - 63 кг кӧдірімде. Иң ниик 40 кг кӧдірімде Алина Рыбакина хола медаль холға кирген.
Андағ оңдайнаң СФО мариинда чир-суғӌыларыбыс прай 10 медаль утып алғаннар: ікі алтын, пис кӱмӱс, ӱс хола. Прайзынаң кӧп медаль утып алғаннар Иркутск облазы паза Хызылчар крайы. Пасха даа командаларның кӱресчілері сыйых чох ибзер айланмааннар.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде