ХООСТАРҒА АЙЛАНҒАН ЧОН ОЙНАҶАХТАРЫ
11.10.2019
Хабарлар
Кӧзідіг. Пӱӱл чайғызын республикада олғаннарға «Чон ойнаӌағы» марығ чарлалған. Амды Л.Р. Кызласовтың адынаң чир-суғ ӱгренӌең музейде араласхан палаларның хоостары «Хакас паза орыс чоннарның ойнаӌахтары» кӧзідіге сығарылғаннар
Кӧзідіг «Сибирь» туризм тилізі ассоциациязы иртірчеткен «Ӧрініс» олған ойнаҷағы фестиваль пастыра Хакасияның национальнай паза территориальнай политика министерствозының гранты полызиинаң чуртасха кирілче. Марығның проектін музейнін методизі Кунари Тюндешева тимнеен. Ол пылтыр ирткен «Тӱрктер алтыны» тиксі Россиядағы чииттер форумында «Ӧрініс» фестиваль-марығ проектін арачылаан. Анда ікінҷі орынға турысхан.
Хакасияның национальнай паза территориальнай политика министрінің орынҷызы Нина Челтыгмашева проектті тимнееннерге, марығда араласхан олғаннарға алғызын читірген:
- Пӱӱл министерство чарлаан гранттар марииның чиңісчізі Кунари Тюндешева тимнеен «Ӧрініс» фестивальның проекті полыбысхан. Марығда араласчатхан организацияларның саны чылдаң ӧзіп одырча. Пӱӱл 41 проект кӧрілген, оларның 25-і чиңісчі санында. Сағыстарын чуртасха кирер ӱчӱн, оларға ахчалығ полызығ пирілче. Россия нацияларын піріктірер проекттерге гранттар сыбыра позыдылча.
Чон культуразы ол пурунғыларның тирең сағызы, хыйғазы полча. Кічіг хоосчылар, тоғыстарын чайап, чон культуразына чағын полчатханын сизінерге киректер. Полған на паланың хынчатхан ойнаҷағы пар поладыр. Ойнаҷахтарнын ӱгредігліг сари улуғ.
Фестиваль-марығда Хакасиядаң пасха Россия регионнарынаң паза Белоруссиядаң 5 - 10 частығ палалар араласханнар, тиксі 90 артиинаң тоғыс кӧзідіге сығарылған. Аннаңар ол чоннар аразындағы синде тимнелген тиирге чарир. Кавказ, Крым паза Россияның ӱстӱнзархы чирлерінең тоғыстар ызылғаннар. Олғаннарға хоостарын пирілген темаа килістіре, пос оңдайлығ чайирға киректелген.
Кӧбізі тоғыстарында национальнай кип-азахтығ кӧклӧлерні хоостаптыр. Оларның аразында орыс паза хакас кӧгенектіг матрешкалар илееде полған. Абаҷахтар, хозаннар, адыҷахтар аймах чоннарның кип-азаан «кис салтырлар». Ӧңніг карандаштарнаң, сырларнаң чайалған паза пластилиннең тимнелген хоостар пар. Дымков, хохлома, гжель хоостары оларны аймах ӧңнернең чазапчалар.
Марығ чарғыҷыларына республиканың этнографтары, хоосчылары кіргеннер. 5-7 частығларның аразында I орынны Кирилл Ильмендеров (Тольятти г.) холға кирген, II орынны - Виктория Балахчина (Ағбан г.), III орынны - Екатерина паза Анна Ярославцевалар (Санкт-Петербург г.). Пу номинацияда жюринің ӧнетін сыйии Евангелина Носачеваа (Хызылчар г.) паза Макар Кангинге (Тольятти г.) пирілген.
8 - 10 частығлар санынаң чиңісчі Тимофей Баранов (Пермь г.) полыбысхан. II орын Анна Полесоваяа (Ағбан г.), III орыннар Эмилия Мурадхановаа (Майкоп г.), Александр Потаповха (Мирный г.) пирілгеннер. Ӧнетін сыйыхтарны Ағбанның кічіг чуртағҷылары Ольга Мирошниченконаң Богдан Шандро алғаннар. «Ӧрініс» марығда араласхан пасха регионнардағы сыйыхтығ орынға турысхан олғаннар сертификаттарны паза сыйыхтарны почтаҷа алғаннар.
Республикадағы музейде неделя тооза ӱгренҷілерге мастер-класстар, экскурсиялар, ӱгредіг уроктары проект хоостыра иртірілер.
Автор :
Елена САГАТАЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде