КІЧІГ ЧАЙААЧЫЛАРНЫҢ УЛУҒ ЧИДИИ
25.10.2019
Хабарлар
Марығ. Ағбанда «Илбек минің хазнам» чоннар аразыңдағы марығның региондағы чардығы иртті. Ирткен неделяда республиканың ӧӧн городында Хакасияның паза Хызылчар крайының кічіг чайаачылары устарынаң сынасханнар.
Андағ оңдай оларға «Илбек минің хазнам» чоннар аразындағы марығ пирген. Марығ «Культура. Искусство.Чайаачы» (КИТ) проект хоостыра иртірілче. Аның ӧӧн пӧгіні - таланттығ олғаннарға паза чииттерге хабазары. Ол сағысты чуртасха киріп, жюридегілер постары Россия регионнарынзар киліп, марығны иртірчелер.
18 октябрьда теес пістің республикаа читкен. «Илбек минің хазнам» - кӧп жанрлығ марығ. Анда ырҷылар, цирк артисттері, теелбекчілер, музыканттар, хоосчылар паза пасхазы устарын кӧзітчелер. Полған на кӧстег нинҷе-нинҷе номинацияа чарылча. Номинацияларның чиңісчілері Гран-приге турысчалар.
Хакас ӧмелердең искусство пайрамында «Пеелбек» теелбек ансамбльы паза «Час ханат» студия араласханнар.
«Пеелбек» - республиканың олған искусство школазының чайаачы ӧмезі.
Аннаң хореограф Алёна Султрекова устапча. Кічіг частығ теелбекчілер аймах-пасха синде иртчеткен фестивальларда ӧткін араласчалар. «Илбек минің хазнам» марыға олар «Таң чарии» паза «Хозанахтар» теелбектерні таллап алтырлар. Таланттығ хызыҷахтарның узына жюри кізілері пӧзік паалағ пиргеннер. Ансамбль «Чон теелбегі» номинацияда Гран-приге турысхан. Ідӧк «Пеелбектің» устағңызы Алёна Султрековаа медаль паза диплом читірілген.
«Час ханат» студиядаң марығда ырҷылар араласханнар. Влада Чичинина, София Кускашева, Владимир Мокану паза Дарья Топоева «Национальнай эстрада» номинацияда устарын сынааннар. Олғаннар, хакас ырларны толдырып, II степеньніг лауреат полыбысханнар. 5-ӌі класстың ӱгренҷізі Владимир Мокануны жюри хоза «Артистизм ӱчӱн» дипломнаң таныхтаан. Палалар вокал искусствозына Хакасия культуразының саблығ тоғынҷызы Светлана Аткнинаның холында ӱгренчелер. Светлана Михайловна ӧнетін сертификатнаң сыйыхтатхан.
«Илбек минің хазнам» чоннар аразындағы марығның региондағы чардыхтары июньға теере иртерлер. Артыхтарның артығы финалға сығар. Ол 22 - 24 июльда Анапада иртер. Ізенчебіс, чиңісчілер санында хакас палалар полар.
Автор :
Тимнеен Майя КИЛЬЧИЧАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде