АРТИСТТЕРГЕ УСТАРЫН КӦЗІДЕР ОҢДАЙ ПИРЧЕ
15.11.2019
Хабарлар
Дарья ТАЧЕЕВАНАҢ Георгий ТАСКАРАКОВ ойын ӱзігін кӧзітчелер
2019 чыл - Театр чылы. Ағбанда «Вдохновение» актер тоғыстарының марии читінӌі хати ирткен. Анда чиит устар ӧткін араласханнар
Актер тоғызы чааҷы службазына тӧӧй. Режиссер хайдағ роль пирер, аны толдырарға кирек. Сынап талааннығ чайаачылар аймах жанрларда устарын сынапчалар, че піреезі чылдаң чылға пір омадаң сыхпинча. Кӧзідімге, артистке оңнығ ла матырларның рольын толдырарға килісче. Ол сурығны пӧгер пӧгіннең Россияның театр деятельлері пірігізінің орындағы пӧлии (СТД) «Вдохновение» марығ иртірче. Аның оңдайларынҷа араласчыларға хайдағ даа произведение хоостыра ойынның ӱзігін тимнебізерге чарир. Марығда устарын актерлар ла нимес, ідӧк режиссерлар, драматургтар сынапчалар.
СТД-ның Хакасиядағы пӧлиинің кнезі Светлана Чаптыкованың таниинаң, пӱӱл марығ республиканың национальнай паза территориальнай политика министерствозы полызиинаң «Дебют на родной земле» проект хоостыра иртірілген. Жюри паза кӧрігҷілер (аарлығ аалҷыларның санында Россия культуразының саблығ тоғынҷызы, профессор Владимир Норенко полған) 15 артиинан эскизнең танысханнар. Чоохтирға кирек, оларның илеедезін чиит артисттер тимнееннер. Актер этюдтары, драмаларның ӱзіктері, пір кізінің спектакльы, поэт программалары чыылған чонны хайхатхан, кӧңнін кӧдірген.
Георгий Таскараковнаң Анастасия Быдышева марыға Джон Стейнбектің «Кӱскелердеңер паза кізілердеңер» улуғ чооғының ӱзігін таллап алтырлар. Анда США-дағы Илбек депрессия тузынаңар чоохталча, хаҷан кізілер, пірее дее тоғысха кіріп аларға сағынып, штаттаң штатха кӧс чӧрҷеңнер. Ӧӧн матыр Ленни - уғаа кӱстіг, тоғысха чапчаң, че олох туста олған сағыстығ кізі. Ол кемге дее алаахтырт салар. Фермер Кёрлинің ипчізі Ленниге сырбалыбысханда, матыр аның кирексіністерін пір дее оңар полбинча. Кирек хомай тоозылча, Ленни абахайның мойнын сыы тудыбысхан. Іди дее полза, кӧрігҷілер ӧдірт салған ипчее нимес, ӧӧн матырға айапчалар.
Наталья Сарлинанаң Андрей Тюкпиеков писатель Антон Чеховтың «Егерь» чооғының ӱзігін кӧзіткеннер. Актерлар піліс полбин чуртапчатхан ирепчінің ӱлӱзін чахсы чарыт пиргеннер. Чиит ус Валентин Ульчугачев, поэт Сергей Есениннің «Ипчее пічік» кибелізін тыыда хығырып, кӧрігҷілернің чӱреен кӧӧреткен. Номернің халғанҷызынзар ӧӧн матыр атыныбысханда, прайзы алаң ас парған. Хыныс андағ ниме, кемге-де кӱс пирче, кемні-де ӧлімге ағылча.
Пӱӱл Хакас драма театрынзар тӧрт чиит артист тоғысха кірген, оларның санында Дарья Тачеева. Хакас абахай марыға «Монолог о любви» эскиз тимнеп салтыр. Аркадий Аверченконың паза Михаил Зощенконың чоохтарына тӧстеніп турғызылған ойын залдағы чонны хайхатхан. Аны Орыс драма театрының артизі Владислав Загарский чайирға полыстыр. Жюридегілернің таниинаң, чир-суғҷыбыстың тоғызы - тимде спектакль, аны амох сценаа сығарарға чарир.
«Вдохновение» марығ пӧзік синде, пір тыныснаң ирткен. Салтарлар мындағ: «Иң чахсы ир кізінің рольы» номинацияда Георгий Таскараков чиңіс тутхан, «Иң чахсы ипчінің рольы» - Дарья Тачеева. Артисттер Валентин Ульчугачевке, Наталья Сарлинаа паза Андрей Тюкпиековха «Открытие «Вдохновения» дипломнар читірілгеннер. Юлия Чепашева марығда тӧреміл араласча, пӱӱл абахайыбыс Антон Чеховтың «Дядя Ваня» пьесазынаң алылған Соняның монологы ӱчӱн ӧнетін сыйыхнаң таныхтатхан.
Актер профессиязында чолын наа ла пастапчатхан Карина Ултургашеваны махтирға кирек. Ол, Джамиляның рольын толдырып, «Иң чахсы дебют» номинацияда утып алған.
Чингиз Айтматовтың саблығ повезі хоостыра эскизті режиссер Саяна Ултургашева турғысхан. Ипчі-режиссер хынығ ойыннар чайирға кӱс. Пылтыр ол, «Венадағы одырчых» эскизті турғызып, «Вдохновение» марығда чиңіс тутхан. Репетициялар соонда эскиз «Хыснаң оол» спектакльға айлан парған. Хысхаҷах тус аразына пу ойын «Ах иб» (Ағбан) паза «Киртінчем!» (Астрахань) фестивальларның пӧзік сыйыхтарына турысхан. Пастағызы регионнар аразындағы синде ирткен полза, ікінҷізі - тиксі Россияның синінде. Пӱӱл Саяна Сапиновна республика мариина «Джамилядаң» пасха хакас драматург Илья Топоевтің «Сабир паза Сабира» повезі хоостыра чайалған эскизті сығарған. Чалтырама турғызылған ойыннар паза чиит актерларға аймах жанрларда устарын сынирға оңдай пирчеткен ӱчӱн С.С.Ултургашева «Иң артых режиссер тоғызы» дипломнаң паза СТД-ның чайаачы чорығынаң таныхтатхан. Чоохтирға кирек, прай чиңісчілерге дипломнарнаң хада ахчалығ сыйых читірілген.
Таланттығ артисттерні чидіглерінең алғыстапчабыс, хынчатхан кӧрігҷілерні, тізең, ойыннарға хығырчабыс. 24 - 30 ноябрьда театрның афишазында - кӱлкістіг ойыннар паза нымахтар, оларның санында «Ханума» (12+) паза «Бибинур, йо, Бибинур» (12+) спектакльлар полар. Олар соох кӱннерде кізілернің кӧңнін кӧдірерлер.
Автор :
Светлана СЕЛИГЕЕВА, Хакас драма театрының литература полиинің устағҷызы
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде