ПОС ТІЛӀНҶЕ ПIЛIСТЕРIНЕҢ СЫНАСХАННАР
03.12.2019
Хабарлар
Олимпиада. Киҷее Ағбанда 24 №школада хакас тілінҷе паза литературазынҷа М.И.Боргояковтың адынаң олимпиаданың муниципальнай синіндегі чардығы ирткен
Чыл сай хысхының пастағы айында республиканың школаларында аймах предметтерҷе муниципальнай синде олимпиадалар иртірілче. Ол санда хакас тілі предметче. Пастап ӱгренҷілер пілістерінең школаларында сынасчалар.
Анаң иң чахсы пілістер кӧзіткен олғаннар муниципальнай синде араласчалар. Пӱӱл Ағбандағы ӱгренҷілерге олимпиада 24 № школада иртірілген. Анда Ағбандағы лицейдең, 1, 3, 22, 24, 26 №№ школалардаң тиксі 45 ӱгренҷі араласхан.
Чоохтирға кирек, 7 - 11 класстар аразында иртірілчеткен олимпиадада олғаннарға текстнең тоғынар, грамматика саринаң аймах ӱзӱріглер, чағын тузалығ сӧстерні табары паза аннаң даа пасха заданиелер полған. Хайди таныхтаан Ағбандағы 24 № школаның хакас тілі ӱгретчізі Олеся Илларионовна Улугбашева, 7 - 9 класстардағыларға сурығлар хакас тілі тӧреен тіл нимес программа хоостыра тимнелген, 10-11 класстардағыларға - тіл пілчеткен олғаннарның программазы хоостыра.
3 час аразына ӱгренҷілер заданиелерні чахсы толдырыбызарға матап кӱстенгеннер. Че марығ - ол марығ, кем-де чиңіс тутча, кемге-де, тізең, нинҷе-де ле балл пастағы орынға читпин парча. Пӱӱл город синiндегi олимпиадада сыйыхтығ орыннарны ӧӧнінде 24 № школаның ӱгренҷілері холға киргеннер.
7-ӌі класстағыларның аразында иң чахсы пілістер Анна Карачакова кӧзіткен (24 № школа), 8-ҷі класстағыларның аразында - Таника Боргоякова (24 № школа). 9-ҷы класстар ӱгренҷілері аразында - Андрей Тортомашев (24 № школа), 10-ҷы класстағылар аразында - Игорь Боргояков (24 № школа), 11-ҷі класстағылар аразында - Михаил Тюкпиеков (22 № школа).
Амды пастағы орыннар утып алған ӱгренҷілер февральда тиксі республика синіндегі олимпиадада аралазарлар. Ідӧк, таныхтирға кирек, марығ салтарлары хоостыра 10 ӱгренҷі сыйыхтығ орын алған. Олар - 22 № паза 24 № школаларның ӱгренҷілері.
Автор :
Ольга ТОМОЧАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде