АЛЫМНАР КӦӦЛҶЕ ХЫЗЫРЫЛЧА
13.12.2019
Хабарлар
Чыылығ. Хакасияның пазы Валентин Коновалов муниципальнай пӱдістер пастарынаң чылығ пирҷең тус хайди иртчеткен сурығҷа видеоселектор пастыра теестегі чыылығ иртірген
Хакасияның пазы, республикада город-аалларға чылығ пирҷен тоғыс хайди апарылчатханын сыныхтағда тудып, неделя сай мындағ чыылығлар иртірче. Регионда киректер хайди парчатханнаңар Хакасияның пӱдіріг паза чурт-коммунальнай хоных министрі Сергей Новиков искірген.
Аның чооғынаң, республикада чылығ пирҷең тус олаңай режимде иртче. Сорығдағы ӧӧн котельнайда резервтегі хазан турғызылған, аны чыл тоозылғанңа тоғындырып пастирлар. Тӧӧ пазындағы котельнайда ідӧк резерв хазаны турғызылған, ол пу чағында тоғынарға тимде полар. Котельнайларда топливо пилетир тоғыстар сала уйан пар сыхханнар. Іди Асхыста хара тас 7 кӱнге читкіҷе пилетелген, Боград аймаандағы Бородино аалда - 9 кӱнге, Орджоникидзе аймаандағы Ӱӱс аалда - 9 кӱнге, Ағбан пилтірі аймаандағы Тепличнай посёлокта - 10-11 кӱнге, Ширада паза Жемчужнай посёлокта - 4 кӱнге.
Тимненіс паспорттарын наа чылға теере аларға тимде поларынаңар молҷааннар Орджоникидзе аймаандағы Приисковай аал паза Шира аймаандағы Тустығ кӧл аал. Таштып аймаанда казённай предприятие тӧстир сурығ пӧгілче. Министерствоның «ізіг линиязынҷа» чуртағҷылардаң 19 айланыс кірген, анда кӧзіділген читпестер табырах тӱзеділгеннер. Чылығ пирҷең системаларда улуғ нимес 19 саай таныхталған, ол санда сетьтер 7 орында сайбалған. Саайлар саны пылтырғызынаң пасхалалбинча, олох син полғаннар.
Тоғынҷыларға чал ахчазынҷа тӧлелбинчеткен алымнар кӧӧлҷе хызырылча. Іди прай алымнарны алза, олар 4 миллион салковайға хызырыл парғаннар. Хай пірее киректер ам даа Арбитраж чарғызында кӧрілчелер. Наа чылға теере алымнар 76 процентке теере хызырылар тіп санапчалар.
Министр чооғын тоосханда, муниципальнай пӱдістернің устағҷылары аймах сурығларға нандырғаннар, постарының объекттерінде киректер хайди парчатханнаңар сан пиріс тутханнар. Іди олар топливо читкіҷе пилетеп саларға, чал ахчазынҷа, хара тас, чарытхы ӱчӱн алымнарны чабарға прай кӱстерін салардаңар искіргеннер. Че оларға республика бюджедінең дотация киректелер.
Тимненіс паспорттарын аларынаңар чоохтаза, хайди таныхтаан Ростехнадзорның кізізі Владимир Шафорост, пу тусха теере тимненіс паспортын алар пічіктер Шира аймаандағы Тустығ кӧл аалдаң на пирілген.
Чыылығның тоғызын тоозып, Валентин Коновалов город-аймахтар устағҷыларына алымнарны чабарына алынҷа хайығ саларға чахығ пирген, ідӧк республика оларға хабас пирер тіп ізендірген.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде