ЧАҒБАН ЧӰРЕКТІГ УЛУСТЫ ПІРІКТІРЕР ОРЫН
25.12.2019
Хабарлар
Танығлығ кӱн. Пу наада Ағбанда Волонтёрларға ресурстар кіні азылған. Чарых, истіг кабинеттерде ӧткін чииттер, чыылызып, постарына наа пӧгіннер турғызарлар
Пӱӱнгі кӱнге теере Хакасиянын ӧӧн городында волонтёрлар кіні чох полған. Че ӧткін паза чағбан чӱректіг улус андағ орынны хаҷанох кирексіпчеткен. Амды оларның улуғ ӧрінізіне чонға полызарға уламох ниик полар.
Чоохтирға кирек, пістің республикада пір муң азыра волонтёр саналча. Пірее чир-суғҷыбысха полызығ кирек пол парза, чағбан чӱректіглер иң пурун полызығ пирерге кӱстенчелер. Акциялар иртірерге тимненчетселер, волонтёрларға аймах ниме-нооны иблерінде чыырға килісчең полған. Амды оларға, тоғазып, чӧптезер орын азыл парған. Чарых, истіг кабинеттер чыылған чонның кӧңніне кірген.
Республикадағы волонтёрлар кінінің нандырығлығ кізізі Никита Мальчиков полча. Аның таниинаң, ресурстар кінінде волонтёрлар тоғызына киректелчеткен ниме-ноо читкіҷе полар: сомға суурҷаң аппараттар, ноутбуктар, аймах буклеттер. Ідӧк ӧткін улусха анда занятиелер иртіріл турар. Кӧзідімге, дизайнерлернең тоғазығлар.
Ағбанда Чоннар ынархазы 2 «а» адресче азылған волонтёрлар кіні ӧткін чииттерні ааллап хығырча.
Ресурстар кіні пайрамни азыл парған соонаң, «Хакасияның хрусталь чӱрее» марығның чиңісчілерін чеестееннер. Асхыстағы Аршиннер сӧбірезі «Пос кӧңнінең полызыға килчеткен сӧбіре» номинацияда чиңісчі полыбысхан. Чоохтирға кирек, Валентина Николаевна Аршина (хыс фамилиязы Тормозакова) М.И.Чебодаевтің адынаң лицей-интернатта хоза ӱгредігнің ӱгретчізі полып читі чыл істен парир. Олох тустаң сығара ол халых чуртаста ӧткін аралас сыххан. Школада істеніп пастаандох, ол «Чахсы киректер ит» волонтёрлар клубын азыбысхан. Амды ол ӱгренҷілерінең хада улуғ частығ аға-ууҷаларға полысча. Ідӧк олар чир-чайаанны арығлапчалар. Ӱгретчі кічіг хызыҷахтарын даа кізілерге полызарға ӱгретче. Аның палалары полған на акцияда араласчалар.
Диана Хабарова, Ағбандағы студенттер чӧбі, «Чиңіс волонтёрлары» тиксі Россияның халых чӧрімінің Хакасиядағы пӧлиинің араласчылары «Пос кӧңнінең иң чахсы иртірілген акция» номинацияда чиңісчілер полыбысханнар. «Пос кӧңнінең иң чахсы киректер иткені» номинацияда чиңіс тутханнар: Дмитрий Тремасов паза Алтай аймаандағы «Молодежная приемная» халых чӧрімі.
Дмитрий Тремасов, «Теремок» интернат-турадағы олғаннарны уннаң тадылығ ас-тамах тимнирге ӱгредіп, анда аймах мастер-класстар сыбыра иртірче. Ирен ӱгредии хоостыра ас-тамах тимнеҷең ус полча. Дмитрийнің кӧңніне уғаа кірче олғаннарнаң айғазарға. Аның таниинаң, чиис пызырған соонаң палаларнаң чей ізіп, чоох-чаахнаң одырарға хынығ. Олар аннаң сағыстарынаң ӱлесчелер. Паза ол андағы палаларны, улуғ чуртасха тимнеп, чиис пызырарға ӱгретче осхас. Чахсы тоғыс апарчатхан ӱчӱн, прайзы Дмитрий Тремасовха алғызын читірген.
Автор :
Ольга ТОМОЧАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде