ӰГРЕТЧІЛЕРНІҢ ХАДА-ПІРГЕ ЧИДИИ
30.12.2019
Хабарлар
Устағҷы Л.П.УЛТУРГАШЕВА пастағы рядта сол саринаң ікінҷізі
Санкт-Петербургтаң сынап пічік килбеен полза, Индіркі Тӧӧдегілер чиңіске ізенмесчіктер дее. «Россияның иң чахсы 100 школазы» марығны иртірчеткен пірдеезінең палғалыстығ нимес халых пірігізінің кнезі РАЕН-ның академигі, физика паза математика наукаларының докторы, профессор, саблығ наука деятельі, Россия Федерациязы Хазна Думазының 5-6-ҷы хығыртығларының депутады Виктор Шудегов, хол салып, ол пічікте піди пастыр: «Аарлығ Лилия Павловна! Оргкомитет паза пістің пірігіс сірерге искірерге сағынчабыс. Сірер устапчатхан ӱгредіг заведениезі «Россияның иң чахсы 100 школазы» марығның «Аалдағы иң чахсы школа» номинациязында лауреат полыбызар школаларның санына киріл парған!»
Хайди чарытхан Индіркі Тӧӧдегі С.П.Ултургашевтің адынаң ортымах школаның устағҷызы Лилия Ултургашева, финалға ӱгретчілернің паза ӱгренҷілернің халғанҷы пис чыл аразындағы алай 2018 чылдағы чидіглерінеңер, чарыда пас пиріп, оларға ыс пирерге кирек полған.
«Піс пылтырғы чидіглердеңер пас пирерге чаратхабыс. Иң пастап школа тоосханнарның хазна сыныхтағлары салтарларын кӧзіткебіс. 2018 чылда 9 классты 3 кізі тоосхан. Оларның орыс тілінҷе ортымах балл 3,5 полған, хакас тілінең - 4,6 балл. 11 классты тоосхан пір ӱгренҷі орыс тілінең 70 балл чыып алған, математикаҷа - 56 балл, обществознаниенең - 45 балл. Ӱгренҷілернің спорттағы чидіглері ідӧк санға алылған. 2018 чылда иң кӧп Максим Ултургашевнең Артём Канзычаков аар атлетикаҷа аймах синніг марығларда чиңісчілер полғаннар. Паза Индіркі Тӧӧ аалдағы ӱгренҷілер хакас тілін паза культуразын тилідер пӧгінніг марығ-пайрамнарда тӧреміл араласчалар. Кӧзідімге, Асхыс аймаанда ирткен олғаннарның «Тун пайрам» ӱлӱкӱнінде пістің палалар аймах номинацияларда сыйыхтығ орыннарға турысханнар. Оларны ідӧк школа чидіглерінің санынзар кир салғабыс. Паза піс жюридегілерні ӱгретчілерібіс постары тимнеен программаларнаң таныстырғабыс. Тиксі чоохтаза, школа чуртазынаңар, чидіглерінеңер ӱс ле страницада чарыдарға кирек полған. Пістің, тізең, сала артых арах пол парған», - чоохтаан Лилия Павловна.
Салтарында, Асхыс аймааның Индіркі Тӧӧ аалдағы С.П.Ултургашевтің адынаң ортымах школа пӱӱл тиксі Россия марииның «Аалдағы иң чахсы школа» номинациязының чиңісчізі полыбысхан! Школа устағҷызы Лилия Павловна Ултургашева, тізең, «Чыл директоры -2019» атха турысхан. Прай чиңісчілерні 25-28 октябрьда Санкт-Петербургта ирткен хазна синіндегі «Полар тустың школазы» 8-ҷі форумда сыйыхтааннар.
«Пісті андар хығырғаннар, че парар оңдайыбыс чох полған. Аннаңар сыйыхтарыбыс - чиңісчі школаның адына диплом паза устағҷаа аарластығ знак - почта пастыра килгеннер», - чоохтап пирген чиит устағҷы.
Лилия Павловна Н.Ф.Катановтың адынаң Хакас хазна университедінде алған ӧӧн специальнозы хоостыра хакас тілі ӱгретчізі полча. Істеніс чолын тӧреен-ӧскен Ӱс чул аалдағы школада пастаан. Индіркі Тӧӧдегі ортымах школанаң тоғызынҷы чылы устап парир. Пӱӱнгі кӱнде аннаң хада 13 ӱгретчі тоғынча.
«Россия синіндегі марығда чиңіс тутханы ол минің не чидиим нимес. Школа мындағ чидіге улуғ опыттығ ӱгретчілер ӧмезі чон палазын ӱгредерге кӱстенгені сылтаанда читкен. Мыннаң мындар ідӧк ле чахсы тоғынарбыс тіп сағынчам», - поғдархаснаң теен Лилия Павловна.
Чиит устағҷы хада тоғынчатхан арғыстарын ідӧк чағдапчатхан Наа 2020 чылнаң алғыстапча: «Иң ӧӧні - прайзыбыс хазых полалар. Полған на кізінің чуртазында чахсы ла кӱннер ползын. Талаан тартсын прайзына!»
Пӱӱнгі кӱнде Индіркі Тӧӧдегі школаның устағҷызын пір ле ниме хомзындырча - ӱгренҷілер саны чыл сай хызырылча! Пӱӱл пу аалда 63 пала школаа чӧрче. Оларның санында 10-11 класстарда ӱгренчеткен олғаннар чоғыл! Школа, тізең, ортымах...
Автор :
Александра КАРАМЧАКОВА Индіркі Тӧӧ аалдағы ӱгретчілер ӧмезі.
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде