ПІР ЛЕ ТОҒЫСТА - 50 АЗЫРА ЧЫЛ!
24.01.2020
Хабарлар
Пайрамнығ тӧреен кӱні. Н.Ф.Катановтың адынаң Хакас национальнай гимназияда, істеніс урогын апарып, ӱр чыл тоғын салған ӱгретчі Анна Иннокентьевна Спирина 20 январьда тоғылах тӧреен кӱнін таныхтады
Анна Иннокентьевна 1940 чылда Асхыс аймаандағы Кызлас аалда тӧреен. Олох аалда піліс алып пастаан. Че ортымах школаны Асхыс поселокта тоосхан. Анаң клазынаң хада комсомол путёвказынҷа Тӧӧ пазындағы рудниксер пӱдіріг тоғызында істенерге парған.
1962 чылда чиит хыс Анна Ағбандағы ӱгретчілер институдынзар хакас, орыс тіллері паза литература факультедінзер ӱгренерге кірген. Анна Иннокентьевнаның істеніс книжказынаң танысханда, ол студент полар алнында Асхыс аймааның Казанов аалындағы пансион-интернатта воспитатель полып тоғынтыр. Анаң олох аалдағы клубтың устағҷызы полтыр. Соонаң Кызластағы пасталығ школада олғаннарны ӱгреттір.
1966 чылда ӱгретчілер институдын тоозып, чиит хыс Ағбанда халған. Ол Хакас национальнай школазар воспитатель тоғызына кірген. Анна Иннокентьевна специальнозы хоостыра олғаннарны хакас тіліне ӱгреткенӧк.
Уроктар тоозыл парза, хызыҷахтарны чібекнең хоостирға, поғолар чайирға кӧніктірҷең. Аны кӧріп, национальнай школаның істеніс урогының ӱгретчізі Мария Федотовна Кыжинаева теен: «Мин тынаға парыбыссам, істеніс урогын апарарзың». Ідӧк киліс парған. 1976 чылдаң пӱӱнгі кӱнге теере Анна Иннокентьевна Спирина Хакас национальнай гимназияда істеніс урогын апарған.
Анна Иннокентьевнаны турыстығ тынаға Хакасияның ӱгредіг паза наука министрінің орынҷызы Юрий Сагалаков, национальнай гимназияның директоры Марина Сагатаева, хада тоғынған ӧӧрелері паза ӱгренҷілері чылығ сӧстернең ӱдескеннер.
Анна Иннокентьевнаның тиксі істеніс чолы - 60 азыра чыл. Пістің гимназияның чуртазын тилідіп, ол мында 50 азыра чыл тоғын салған. Пу уғаа улуғ сан. Анна Иннокентьевна ӱгренҷілеріне хаҷан даа паарсаснаң хайҷаң, прайзына улуғ чуртассар чол асхан, - теен гимназияның директоры. Чоох тутхан соонаң Марина Сагатаева ӱлӱкӱннің ӧӧн матырына сіліг чахайахтар паза алғыстастығ пічік читірген.
Марина Николаевнаның чылығ сӧстеріне Юрий Гаврилович хозылған. Ол Анна Иннокентьевнаа министерство адынаң алғыстастығ пічік читірген соонаң хада тоғынған чылларны сағысха кирген: хайди «Ынархас чоллары» фестивальға кӧзідіг тимнееннер, хайди гимназияның делегациязы Тувазар чоннар аразындағы конгресске чӧрген...
Ідӧк Анна Иннокентьевнаны тӧреен кӱнінең алғыстап, хада тоғынған ӧӧрезі, национальнай гимназияда орыс тілі паза литература ӱгретчізі полған Тамара Ивановна Султрекова чӱрекке теерте сӧстер чоохтанған:
- Мин национальнай школаның ӧмезіне 1980 чылда хозылғам, - чооғын пастаан Хакасияның саблығ ӱгретчізі. - Андада школа Лениннің проспектінде орныххан. Анна Иннокентьевнаны иң пастағызын Ӱгретчілер кӱнінде кӧргем. Ол андада профсоюз комитедінің кнезі полған, ӱлӱкӱннер иртірңең. Уроктар соонаң ол ӱлӱкӱннерге тимненерге кӱс паза тус таап ла алҷаң.
Соонаң пістің школаны Крылов орамазынзар кӧзіргеннер. 80 - 90 чылларда сидік тус полған. Олғаннар істеніс урогында хаарған яблахтың паза винегреттің татхыннығ чызы мағаа ам даа сабыл килче. Ам даа хараам алнында кӧрінче, хайди Анна Иннокентьевнаны ибіре ӱгренҷілер тол парҷаңнар, оларның ӱгретчее паарсапчатханы іле кӧрінҷең. Хызыҷахтар істеніс урогы кабинедінең часкалығ сыхчаңнар.
Анна Иннокентьевна илееде кӧзідігде араласхан. Пірсінде мағаа Москвада тиксі Совет Союзының «Чон хонии чидіглері» кӧзідиинде поларға киліскен. Кӧзідіге сығарылған ниме-нооларны кӧрглепчеткенімде, хакас ипчі кӧгенее хараама тасталған. Аннаң хости пазыл партыр: «Хакас автоном облазы, Анна Иннокентьевна Спирина». Аны кӧріп, най хайхаам паза чир-суубыс ӱчӱн поғдархаам.
Анна Иннокентьевна - кӱстенҷік кізі, ол позының иткен тоғызын хаҷан даа хайраллапча. Аны прай ӱгренҷілері улуғлапча.
А.И.Спиринаны школаны хаҷанох тоос салған ӱгренҷілері пайрамнығ тӧреен кӱнінең алғыстаанда, ӱгретчі най чӱрексеен. Наталья Нарылкованаң Эрна Боргоякова гимназияны 1991 чылда тоосханнар. Анна Иннокентьевна оларның класс устағҷызы полған.
- Пістің ӱгретчібіс - чалахай кізі, ӱгренҷілерін кӧдіре ле махтап одырҷаң, - ӱгретчізіне паарсапчатханын чазырбин чоохтанған Эрна Боргоякова. - Анна Иннокентьевна пісті чібекнең хоостирға, поғо чайирға, хакас кибін тігерге ӱгреткен. Аның ӱгренҷілері тиксі Хакасияҷа паза Россияҷа тарас парғаннар. Анна Иннокентьевнаның кӱстенізінең пістің класс ынағ полған. Піс ӱгредігде дее, культура мероприятиелерінде дее, спортта даа прайзының алнында полңаңмыс.
Анна Спирина - Россияның тиксі ӱгредиинің аарластығ тоғынҷызы паза Хакасияның чон узы. Амды ол, 50 азыра чыл пір орында тоғынып, тынаға сығыбысты.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде