МИКЕЛЕР АЙМАҒЫНАҢ ТУЗАЛАНҒАННАР
05.02.2020
Хабарлар
Оланай кӱрес. 1-2 февральда Хызылчар крайыңдағы Назаров городта 18 часха читкелек кӱресчі хыстар аразында Сибирьдегі федеральнай округтың марии ирткен
Мындағ арға-мӧрійнің араласчылары чахсы оңарчалар: пос кӧдірімнерінде сыйыхтығ орынға сығып алза, Россия первенствозында аралазар оңдай пирілче. Паза сыйыхтығ орын алғаннары спорт узына кандидаттың нормативін толдырыбысча. Аннаңар чиңіске кӱстенер чахсы сылтағ пар нооза.
- Пістің кӱресчі хыстарыбыс андағ оңдайнаң тузалан халғаннар, сыйыхтығ орыннарға сыхханнар, - чоохтапча Россияның саблығ тренері, Хакасияның піріктірілген командазын СФО мариина ал чӧрген Марат Кичеев.
Марат Семёновичтің сӧстерінең, чир-суғҷыларыбыс санында спорт узына кандидаттар даа, пастағы разрядтығ даа кӱресчі хыстар полтыр. Піреезі мындағ пӧзік синдегі арға-мӧрійде пастағызын на араласча. Андағларны ӧӧрелері хайығдаң позытпин турғаннар, кӧңнілерін кӧдірерге харасханнар. «Пір хати махтанҷых арах хыснаң кибісте хабыза халғабыс. Кірер-парар чирін саңай тар иткем», - кӱлімзіреп ала чоохтап сыхча кӱресчі хыстарның піреезі. Сах андох пасхазы аның хыринзар чыылысча, СФО мариинда араласхан ӧӧренің тылаас-хабарын хынып исче. Андағ чоох-чаах аразында тус таа пілдіртпин ирте халча. Паза ла кӧрзелер, кибіссер сығар тус чит килтір. Кӧңні кӧдіріл парған кӱресчі хыс, мындағ марығда пастағызын на араласчатса даа, хомай харбаспас, тис чӧрбес. «Ундутпаңар, кибісте піс позыбыс ла ӱчӱн кӱреспинчебіс. Тӧреен-ӧскен Хакасиябыс, аның прай чуртағҷылары, туған-чағыннарыбыс ӱчӱн!» - кӧӧктірчелер ӧӧрелері.
Аннаңар даа полбас па, чир-суғҷыларыбыс, кибіске сығып, аймах-пасха микелернең килістіре тузаланып, чиңістер тударға парчан кӱстерін, устарын сал турғаннар. Харбасчатхан туста ӧӧрелернің хысхырыстарын, утысха кӧӧктірчеткеннерін чахсы ис халчалар, уламох чапчаң хайын сыхчалар, пасха регионнаң килген кӱресчінің парар-кірер чирін саңай чох итчелер. Марығ чарғызы аның холын чоғар кӧдірчетсе, чиңіс тутханнаңар искірілчетсе - хайдағ ӧрініс.
- Хайдағ-да сылтағнаң Иркутск облазының командазы марығда араласпады. Прай пис команда саналған, 100-ке чағын кӱресчі хыс харбасхан, - чоохтапча саблығ тренер Марат Кичеев.
Аның кӧрізінең, уғаа ӧріністіг полған, 46 кг кӧдірімде пістің кӱресчі хыстарыбыс прай медальларны утып алғанда. Пу кӧдірімде алтын медальны холға кирген спорт узына кандидат Валерия Карамчакова. Ікінҷі орында пол парған пастағы разрядтығ Алина Пахтаева. Пастағы разрядтығ Анна Коновалова хола медальлығ Ағбанзар айланған.
61 кг кӧдірімде харбазып, маңат тимненіс кӧзіткен, аймах микелернең тузаланып, прайзын хыра утхан спорт узына кандидат Дарья Токоякова.
Кӱрес мариина Асхыстаң парған Карина Мастракова иң аар 73 кг кӧдірімде ӱзінҷі орын алған. Ол пастағы разрядтығ.
Иң ниик 43 кг кӧдірімде харбазып, пастағы разрядтығ Алтынай Топоева Асхыссар хола медальлығ айланған.
Спорт узына кандидат Алина Сагалакова 49 кг кӧдірімде ӱзінҷі орыннаң пӧзік кӧдіріл полбин салған. 57 кг кӧдірімде харбасхан пастағы разрядтығ Тарина Бытотова хола медальлығ Ағбанзар айланған.
Пастағы разрядтығ полған кӱресчі хыстарны, сыйыхтығ орынға сығып, спорт узына кандидаттың нормативін толдырыбысханынаң чылығ алғыстапчабыс. Паза, Россия первенствозында аралазып, маңат тимненіс кӧзідерге, сыйыхтығ орыннарға сығып аларға алғапчабыс.
Амды хығырығҷылар хайиина: февраль-март айларда Ағбанда чииттер паза улуғлар аразында СФО первенствозын паза чемпионадын иртірерге пӧгінчелер. Ідӧк март алай апрель айда чииттер аразында Россия первенствозы Ағбанда иртері кӧрілче. Пір дее алызығлар полбаза, чир-суғҷыларыбысха кӱрес марығларын кӧріп алар чахсы оңдай полар.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде