КӀЧӀГ ХААЛАҒЛАРНАҢ САҒЫНҒАН САҒЫССАР ЧОЛ АЗЫЛЧА
19.02.2020
Хабарлар
Культура. А.М.Топановтың адынаң Хакас драма театрында Илья Топоевтің пьесазы хоостыра турғызылған «Сабир паза Сабира» музыкалығ ойынның премьеразы полған
Пістің республиканың чуртағҷылары наа ойыннарны хаҷан даа чидікпин сахтапчалар. Полған на театрның наа ойыны алнында билеттер азынадох прай садыл парчалар. Хакас драма театрының «Сабир паза Сабира» ойынын ідӧк чидікпин сахтааннар. Илья Топоев аны 10 чыл мының алнында пас салған. Че аны сценада турғызар оңдай ӱр ниместе ле табылған. Режиссер Саяна Ултургашева, андар хай пірее алызығлар кирібізіп, пьесаны амғы тусха килістіре идібіскен.
- «Ахол» пьесаны пас салған соонаң, минің чииттерге поп, рок музыкалығ ойын чайап салар сағыс тӧреен. «Сабир паза Сабира» ойынны пас салғанда, мин аны хакас театрынзар апар салғам. Режиссёр Саяна Ултургашева, пьесамны кӧр салып, аны турғызарға чарадығ алған. Мин ағаа пос кӧрізінең андар алызығлар кирерге чаратхам. Матырларның чоохтарына Абрек Челтыгмашевтеңер, Руслан Ивакиннеңер сӧстерні ол кирген. Ол алызығлар полызиинаң ойын пӱӱнгі кӱнге килістіре пол парған, - таныхтаан Илья Прокопьевич.
Ойында ӱс матыр араласча: Сабира, Сабир паза Тойана. Матырларның хылиин, чуртасха сағыс-кӧрістерін Хакас драма театрының артисттері Юлия Чепашева, Георгий Таскараков паза Дарья Тачеева толдыразынаң читір пиргеннер.
Юлия Чепашева кӧгҷі поларға сағынчатхан аалдағы хыстың омазын кӧрігҷілерге чахсы кӧзіт пирген. Аның матыры Сабира хомыснаң ойнапча, хакас сарыннарын маңат ырлапча. Дарья Тачеева поп-музыкаа тартылчатхан Тойананы ойнапча. Аның чазыт сағызы, улуғ сценазар чол азып, анда чылтыс чіли пызыңниры полча. Георгий Таскараковтың матыры Сабир - чуртас тӱбіне тӱс парған оол. Андар кӧріп, кізілернің кӧп сурығ тӧріпче. Ноға улуғ чуртаста чолын наа ла пастапчатхан чиит оол, тоғынмин, подъездтерде хон чӧрче? Ноға ол іҷе-пабазынаңар сағынминча? Ойынның халғанҷызынзар прай ол сурығларға нандырығлар табылча.
Сабирге, чуртассар тартылып, азахха турып аларға паза музыканаң хатап айғас сығарға Сабираның ырланы полысхан. Хыстың сӧстері аның чуртасха кӧрізін алыстырча. Паза оолның чӱреенде тамыл килген кӧӧленіс ағаа сағынған сағыстарын толдырарға кӱс пирче тиирге чарир.
Артисттер чыылған чонны пір час артиинаң чалтырама ойыннаң ӧріндіргеннер. Кӧрігҷілер, матап айа саап, оларға «Браво!» хысхырғаннар. Хайди олар чахсы сарнапчалар! Оларның нымзах ӱннері кӧрігҷілернiң чӱреен аптаан. Хакас Республиканың чон артизі Татьяна Шалгинованың ойынға салылған сіліг музыказы матырларның чӱрексіністерін уламох чахсы читір пирерге полысхан.
Пьесада кӧдірілчеткен сурығлар ӧӧнінде чиит тӧлге теелчелер. Анда чииттернің чуртаста пос орнын табарынаңар, хол тӱзірбин, сағынған сағысты толдырарынаңар паза хайдағ даа сидік туста алай ӧріністіг киректе арғыс хайди даа кирек полчатханынаңар чоохталча...
Минің кӧрізімнең, музыкалығ ойын хатхы-кӱлкі пастыра кӧрігҷілернiң кӧп сағыс тӧрітче. Ол санда хайди амғы хакас чииттерге, аймах чоннар культураларын, тіллерін чідірчеткенде, ӧбекелерінің кибірлерін ундутпин, туснаң тиңе хаалирға оңдай таап алары полча. Амғы туста ол сидік сурығ полғанына ла теелче. Че ағаа нандырығ таап алза, чуртас салғағында посты чідір салбин, азахта пик турарға ниик полар. Аннаңар чииттерге ойынны кӧріп аларға туза полар.
Автор :
Ольга ТОМОЧАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде