АРЬІҒ КИИ ӰЧӰН
11.03.2020
Хабарлар
Митинг. Ағбанда кӧрік айының 7-ҷі кӱнінде «Арығ кии ӱчӱн» митинг ирткен. Кии ӱчӱн сағыссырапчатхан чуртағҷылар Чиңіс паркынаң Пастағы май ачығынзар Ленин орамазынҷа парғаннар
Ағбан паза Харатас Россияның чир-чайаан министерствозының сыныхтағ салтарларынҷа тӧреміл иң кірліг городтар санына кірчеткені паза хысхызын иртен-иир оларда тасхар тынҷаа чох полчатханы кӧбізін сағыссырадып пастапча. «Арығ кии ӱчӱн» халых чӧріміне ӧткін чуртағҷы Екатерина Глок хозылған.
Сигіс паланың ічезі паза пасха іҷе-пабаларға пала тӧрідерге полысчатхан специалист сағыссырастарынаң чарасчатхан пасха чонны піріктірген.
Соонаң ағаа ідӧк ЛДПР партияның региондағы пӧлии хозылған. Іди кӧрік айының 7-ҷі кӱнінде ирткен митинг пу партия флагтары паза лозунгтары алтында ирткен. Пілдістіг, хаҷан сурыға хозылча партия, ол сурығ халых сурығларынаң политика суриина айлан парыбысча. Аннаңар даа, неке, митингке кӧп кізі чыылыспаан. Чиңіс паркының хыринда колоннаа турыбысхан кізілерзер ырахтын кӧргенде, сағыс полған: пу син кізі партияның на поларға кирек. Че сынында мында партия пӧлиинің ӧӧн кізілері ле полған, ол санда партияның региондағы пӧлиинің координаторы Михаил Молчанов паза Ағбан городтың депутаттар чӧбінің депутады Максим Даниленко. Олар митингті «Хакасия, тын» адаптырлар. Пасхазы - арығ кии, чир-чайаан ӱчӱн сағыссырапчатхан улус!
Партия пӧлиинің искіриинең, митингте тимнелген резолюцияда 300-че кізі хол салған. Кізілернең чоохтасханда, илееде кізі митингте араласчылар санын хозар пӧгіннең килген, че резолюцияда хол салардаңар сағынминча. Аннаңар сағынчам, «сеектерні котлеттердең чарарға кирек» хыйға чоох пу сурыға уғаа килістіре. Халых тоғызы - ол халых тоғызы. Партияны пу сурығ сағыссыратчатса, ол аны хоостыра позының тоғызын апарарға кирек. Андада чуртағҷыларның ікінҷілестер дее чох поларҷых.
Митингте ідӧк пасха халых пірігістерінің кізілері, эксперттер, ученайлар араласханнар. Хакасияның чир-чайаан ис-пайы паза экология министрі Сергей Арехов полғанох. Митингті иртірчеткеннер республика ӱлгӱлерін, сидік сурыға хайығ айландырып, аны пӧгер ӱчӱн тоғыстарны олаңай ла таныхтап салбин, оларны хайдағ тусха толдырарын кӧр саларға сурынғаннар паза чирдегі тураларзар чылығ пирҷең пасха оңдайлар табарын пӧгерге хығырғаннар. Тиксі резолюцияны митингте искіргеннер.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде