КӦК ӦҢНІ ЧАРЫТ САЛ
01.04.2020
Хабарлар
Чӧрім. Аутизмнеңер искірігні таратчаң тиксі тилекейдегі кӱн таныхталча. Пу кӱнде кӧп хазнада «Кӧк ӧңні чарыт сал» чӧрім иртірілче
Тиксі тилекейдегі хазых хайраллаҷаң организацияның (ВОЗ) танығларынаң, чир ӱстӱндегі олған-узахтың 1 проценті аутизм ағырығнаң ирееленче. Россияда 320 муң азыра андағ пала чуртапча.
ООН-ның Генеральнай Ассамблеязы резолюциязының хоостыра, 2007 чылдаң 2 апрельде Аутизмнеңер искірігні таратчаң чоннар аразындағы кӱн таныхталча. Аутизмнең ирееленчеткен кізілернің сидіксіністеріне хайығ айландырар пӧгіннең аймах-пасха хазналар паза халых организациялары мероприятиелер иртірчелер.
Ол санда 2 апрельде «Кӧк ӧңні чарыт сал» чӧрім иртче. Кӧк ӧңніг чарытхы аутизмні таныхтапча. Чӧрім тузында улуғ пӱдіріглерні, архитектура, чир-чайаандағы даа объекттерні тастынаң тигір кӧк ӧңнең чарыт салчалар. Чӧрімге ідӧк Россияның улуғ городтары хозылғаннар.
Пу чӧрімде пасха даа оңдайларнаң тузаланып аралазарға чарир. Кӧзенектерні тигір кӧк ӧңніг гирляндаларнаң алай лампанаң чарыт саларға. Кӧк кип-азах кис саларға, туған-таныстарға аутизмнеңер паза пу чӧрімнеңер чоохтирға. Кӧк кип-азахтығ сомға суурынып, социальнай сетьтерде «#зажгисиним» алай «#2апреля» хэштегтіг посттарны сығарарға чарир.
Іди кӧк ӧңні тамызып, піс аутизмнең ирееленчеткен палалығ сӧбірелернең хада тудынчатханыбысты кӧзітчебіс. Мындағ сидіксініске тоғасхан полған на сӧбіре кӱрезігні саңай пос кӱзінең не апарча. Че андағ полбасха кирек, оларға хазна полызии киректелче. Андағ хабазығ аутизмнең ирееленчеткеннерні чон аразынзар кир саларға чахсы полызарчых. Аннаңар искірчелер пу чӧрімнің араласчылары.
Іҷе-пабаларның кӧбізі палалары аутизмнең ирееленчеткенін сизінминдеече. Россияда андағ диагноз тузында ілезіне сығарылбинча. Сӧбіренің сидіксінізін пасхазы чағын албинча. Хазна структураларының паза халых организацияларының пӧгіні - пу сурыға хайығ айландырары, аутизм диагностиказын оңдайлап салары, аннаң ирееленчеткеннер паза оларның сӧбірелері чуртас тооза хабазығ алары. Чоохтирға кирек, пістің хазнада оларға полысчаң «Выход» фонд 2012 чылда тӧстелген.
Автор :
Тілбестеен Инора БОРГОЯКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде