ӀҶЕ ЧИРІ - СІЛІГ ЧИР
03.04.2020
Статья
Чайаачы чииттер
Татьяна Нербышева кічіг нанҷыларнаң ынағластаңар пу чооғын саарбах тузындох пас салған. Ол Асхыс аймаандағы Калинин аалның ортымах школазында ӱгренген. Аның класс устағҷызы Рустам Юрьевич Канзычаков полған, олох хакас тілі паза литература уроктарын апарған.
- Ӱгретчібіс пісті пос тілінең сочинениелер кӧп пастырҷаң. Прай ӱгренҷілернең хада мин дее ол чайаачы тоғыстарны чахсы паза нандырығлығ толдырарға кӱстенҷеңмін. «Арғыстар» чооғас андағох оңдайнаң тӧреен. Пілдістіг, Рустам Юрьевич прай алҷаастарымны тӱзет пирген. Анаң мин аны хатап ипти пазыбысхам, - сағысха кирген ол.
Калинин аалдағы ӱгретчінің паза ӱгренҷінің підӧк хада-пірге тимнелген ікінҷі чооғы республика синіндегі хакас тілінең пасчатхан олғаннар аразындағы марығда сыйыхтығ орынға турысхан! Ол «Кізінің алҷаазы» тіп адалған.
- Андада ортын класстарда ӱгренчеткем, неке. Сағызымда кӧп чон алнына сыхханыбыс, анаң алғыстас пічии паза сыйыхха ахча пирілгені ле халған, - теен Татьяна.
Хайди таныхтапча ӱгретчі Рустам Юрьевич Канзычаков, Татьяна тӧреен тілін чахсы пілче. Школа тузында ол пасха даа чайаачы марығларда ӧткін араласхан, сыйыхтығ орыннар ал турған.
- Мағаа чайаачы тоғыснаң айғазарға іҷемнің тӧреен-ӧскен чирі кӱс пирче тіп сағынчам. Таштып аймаандағы Улуғ Арбыт аал уғаа сіліг чирде орныхча. Ибіре халын тайға, ап-арығ кии. Андар туғаннарымзар ааллап пар килзем, минің, ханаттығ хус чіли, тигірҷе учух чӧрерім килібісче. Кӧңнім кӧдіріліп, хоос сӧстер олаңай ла сыхчалар. Школа тузында андағох полған, - чарытхан чайаачы кӧңніліг хыс.
Асхыс аймаандағы Калинин аалның ортымах школазын ол 2016 чылда тоосхан.
- Іҷе-пабамның кӧңнінҷе поларға тіп, мин право хайраллаҷаң органнарда тоғынарға килістіре ӱгредіг аларға кӧстег иткем. Ағаа тимненіп, спортнаң кӧп айғасхам. Че киліспин парған. Анаң мин, пір дее ікінҷілес чох, позымның сағынған сағызымны толдырғам - ХГУ-зар кіріп алғам. Мин кічігдең сығара ӱгретчі поларға сағынғам, - чооғын узаратхан Татьяна.
Амғы туста Татьяна Нербышева Н.Ф.Катановтың адынаң Хакас хазна университедінің филология паза культуралар аразындағы палғалыс институдындағы хакас филология кафедразының 4-ҷі курстағы студенті полча. Пазағы чылда ол, аны тоозып, хоза тархын ӱгретчізінің специальнозын алып алар. Аннаңар аның пӱӱнгі кӱндегі ӧӧн пӧгіні - хазна сыныхтағларын чахсы тудыбызып, пӧзік ӱгредігдеңер диплом алып аларға.
- Чайаачы чолзар хатап ай-ланарға сағыс парох. Ічем мы-ның алнындағы чуртастаңар чапсых нимелер кӧп чоох-тапча. Ол танығларны мин прай блокнодымзар пазып одырчам. Че, сынны чоохтаза, мин улуғ чоох пазарға ам даа «пысхалахпын» . Мағаа туза-ланчаң хоос сӧстер пайы ам даа читкіче нимес, - ӱлескен студент хыс.
Киртінчебіс, аның ол тузы хайди даа чидер. Татьяна Нербышева сағынған сағыс-тарын хайди даа толдырча нооза. Ағаа хоза, ӱгретчі по-лып тоғын сыхса, аның хоос сӧстернің сӧстігі хайди даа пайир.
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде