Ӧнетiн техника нааҷылалча
03.12.2020
Хабарлар
Россия МЧС-ының Ӧӧн управлениезi пӱӱн ӧнетiн техника алды. Аны Ағбан городтың пастағы ӧрттең арачыланыс чардығы алнында пайрамни читiргеннер. Россия МЧС-ының Ӧӧн управлениезiнiң пастығы, iстiндегi службаның генерал-майоры Александр Мулл МЧС пӧлiктерiнiң кiзiлерiне клӱстернi читiрген.
Ағбандағы пастағы ӧрттең арачыланыс чардығына «УРАЛ-NEXT» автомобильнiң шассизiнде нап-наа автоцистерна килiскен. Наа машина 6 тонна суғ тарт полар, аның ӧрт ӱзiрҷеңнернi тартчаң пӧлии пар. Ӏдӧк ол хысхызын чӧр полар, аның ӧрт ӱзiрҷең тиксi тирии пар паза палғалысчаң оңдайлар турғызылған.
Саяногорск городтың ӧрттең арачыланыс пӧлiктерi КАМАЗ автомобильге тӧстенген ӧрт насос станциязын алған. Аның полызиинаң суғ алҷаң орын чох кӧйчеткен чирлерде ӧрт ӱзiрерге чарир. Ол пiр секундада 110 литрге теере суғ сығар полар, андағ оңдайнаң ӧрт ӱзiрҷеңнерге нинҷе-де кӱстiг стволнаң тоғынарға чарир.
Паза пiр ӧнетiн техника – NordSilver 695 патруль катерi – кiчiг судноларҷа хазна инспекциязына читiрiлген. Катерде ӧнетiн сағбалаҷаң тирiглерi, хайдағ даа кӱнде чӧрҷең тирiглер паза арачыланыс ниме-ноолары пар.
Александр Муллның таниинаң, МЧС пӧлiктерiнiң ӧнетiн техниказы чыл сай нааҷылалып одырча паза алғыдылча. Ам даа чахсы тоғынчатхан техниканы пӧлiктердең аймахтардағы ӧрт ӱзiрҷеңнерге читiрчелер. Пу чылда, тiзең, хоза iкi автомобиль сыныхтағ паза профилактика управлениезiне читiрiлер.
Автор :
Наталья Субракова Сом Дмитрий Сунчугашевти
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде