ТУЗЫНДА ТӦЛЕЛБЕЗЕ, ПОЛЫЗЫҒЛАР ТОХТАДЫЛАР
20.01.2017
Хабарлар
Киҷее Хакасияның хазна чурт инспекциязында пресс-конференция ирткен. Аны апарғаннар инспекцияның устағҷызы Максим Виноградов паза аның орынӌызы Дмитрий Комаров.
Хазна чурт инспекциязының устағӌызы ирткен чылдағы тоғыс салтарларынаңар чоох апарған. Хайди Максим Виноградов таныхтаан, пылтыр инспекциязар аймах сурығларӌа 3354 чуртағӌы айланған, анзы алындағы чыллардаң 40 процентке кӧп. Ӧӧнінде муниципальнай городтарның чуртағӌылары айланчалар, анда кӧп квартиралығ туралар орныхча нооза. Кізілер коммунальнай полызығлар пӧзік синде пирілбинчеткеніне, тӧлеглер саба саналчатханына, чуртты чахсы тутпинчатханына хоптанчалар.
Инспекция - ол чурт сферазын сыныхтағда тутчаң орган. Аннаңар, сайбағлар ілезіне сығарылза, инспекция тоғынӌылары протоколлар пасчалар. Іди пылтыр аймах сайбағларӌа 163 протокол пазылған, сайбағӌыларға 3838 муң салковайға штрафтар салылған. Ідӧк инспекция устапчатхан чурт компанияларына тоғынарға чаратчатхан лицензиялар пирче. Пылтыр 19 лицензия пирілген, пір лицензия чох иділген.
Кӧп квартиралығ тураларда тиксі тыхтағ хайди апарылчатханын ідӧк инспекция муниципалитет администрациязынаң хада сыныхтағда тутчалар. Изелчеткен туралардаң кізілер кӧзірілчеткені - инспекцияның сыныхтаанда. Туралар хысхызына тимнен салғаннаңар паспорттар пирчеткен комиссияда инспекция араласча. Аннаң даа кӧп тоғыстар толдырарға килісче ағаа.
Пылтыр 26 декабрьда Россияның правительствозы ЖКХ киректерінӌе чарадығ алыбысхан, ол 2017 чылның 1 январьынаң тоғынча. Аны хоостыра тӧлеӌең квитанцияда тиксі тураның хорадығлары ӱчӱн строка чох полар, ол амды чурт полызығларына кирілче. Че аның сылтаанда чуртағӌыларның коммунальнай полызығлар ӱчӱн тӧлеглері алыспас. Строкаларның орыннары ла алысча. Кізі чуртабинчатхан тураларның ээлері суғ, чылығ, чарытхы пирчеткен организацияларнаң кӧні чӧптезіглер идерге киректер.
Хакасияның хазна чурт инспекция устағӌызының орынӌызы Дмитрий Комаров ЖКХ сферазындағы наа алызығлардаңар искірген. Аның чооғынаң, алында квартиралардағы суғ хорадылчатханын санаӌаң приборлар хайди тоғынчатханын чарым чылда пір хати сыныхтаӌаң ползалар, ам олар ӱс айда пір хати сыныхталар. Приборлар алай андағы пломбалар сайбалғаны ілезіне сығарылза, тӧлег нормативче саналар. Коммунальнай полызығлар ӱчӱн тӧлебинчетселер, ол полызығларны хызырыбызарға алай тохтадыбызарға чарир. Че 20 кӱн азынада почтаӌа чурт ээзіне аннаңар искірерге кирек полған. Ол уғаа ӱрге сӧӧ тартыл парыбысчаң. Амды андағ искіріглерні телефонӌа, СМС-ча, электроннай почтаӌа, Интернет пастыра, тӧлеӌең квитанцияӌа даа пирерге чарадылча.
Ам энергияны ӱзӱрлир программа тоғынча. Санаӌаң приборлары чох квартира ээлеріне коммунальнай полызығлар ӱчӱн тӧлир нормативке 1,5 коэффициент хозылча. Андағ оңдайнаң приборлар чох кізілерге кӧп ахча тӧлирге килізер.
Устапчатхан компания тӧлегні саба санап салза, ағаа саба саналған санның 50 процентіне тиңнелчеткен штраф салылча. Интернетте хазна искіріг системазы тоғынча. Анда тарифтердеңер, ЖКХ сферазындағы прай тӧлеглердеңер, пасха даа кӧп киректердеңер искіріглер пар.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 1 | 2 | 3 | 4 | 5 | 6 |
Кӱн таңмазы