МАРЫҒЛАРДА АРАЛАЗАРҒА ХЫҒЫРЧАБЫС
21.02.2017
Хабарлар
Газетабысха 90 чыл толчатханына чарыдып, пӱӱл ӱс марығ чарлапчабыс: «Иң иргі сығарыс - сӧбіре чыындызында», «Газета - минің чуртазымда» паза «Кибірліг сом». Марығларда газетаа пазынчатхан чуртағҷыларға аралазарға чарир.
«ИҢ ИРГІ СЫҒАРЫС - СӦБІРЕ ЧЫЫНДЫЗЫНДА» МАРЫҒ
Марығның ӧӧн сағызы - хығырығҷынаң палғалысты тыыдары. Пу марығны иртірҷең оңдайлар паза кирексіністер:
1. Марығ араласчызына иргі газетаны, аның хыплаан чардығын табарға паза хобырарға (копия идерге), аннаң хада сомға суурынарға кирек (сомға суурынҷаң паза хобырҷаң оңдай чох полза, редакциязар ағыларға).
2. Газета чардығының тархынын пазарға (ноға ол сӧбіре чыындызында хайраллалча).
3.Пастағы орын иң иргі газета чардығының ээзіне пирілер, хайзы аның тархынын иң хынығ пас пирер, пасха орыннар газета чардығының чыллары ӧскені хоостыра ӱлестірілер.
«ГАЗЕТА - МИНІҢ ЧУРТАЗЫМДА» МАРЫҒ
Марығның ӧӧн сағызы - «Хабар» (алында «Хызыл аал», «Ленин чолы», «Хакас чирі») газета хығырығҷының таңдағы чуртазына хайдағ-да оңдайнаң теелгенінеңер чоохтар.
Пу марығны иртірҷең оңдайлар паза кирексіністер:
1. Марығ араласчызы газета, андағы хабарлар, статьялар аның чуртазына хайди теелгенінеңер чоох пазарға кирек.
2.Чоохты холнаң даа, компьютерде дее пазарға чарир.
3. Марығ чиңісчізіне саналар паза сыйыхтығ орыннарға турызар иң хынығ паза улуғ туза ағылған киректеңер чоохтар пасхан араласчылар.
«КИБІРЛІГ СОМ» СОМНАР МАРИИ
Марығның ӧӧн сағызы - хакас чонның кибір-чозахтарын паза тілін сӧбіреде хайраллиры паза тилідері, ідӧк оларны сабландырғаны.
Пу марығны иртірҷең оңдайлар паза кирексіністер:
1. Сомда хакас родтың, сӧбіренің ӱлӱкӱннерінде паза иб аразындағы чуртаста хакас кибірлеріне тудынғаны кӧзіділзін.
2. Марыға ӧңніг, ах-хара сомнарны ызарға чарир.
3. Марыға тимде дее сомнарны паза электроннай оңдайнаң даа (JPEG форматта) ызарға чарир.
4. Кибірлерні, обрядтарны ӧнетін турғызып паза ӱлӱкӱннер сценаларында суурылған сомнар марыға алылбинчалар.
5. Сомға хоза ол хаҷан, кем анда суурылғаннаңар паза олар нименең айғасчатханнарын, ідӧк кӧзіділген кибір-чозахтың сӧбіредегі тузазынаңар чарыдарға кирек.
6. Марығ чиңісчізіне саналар паза сыйыхтығ орыннарға турызар хакас чонның кибірлеріне тудынчатханын иң чахсы кӧзітчеткен сомнарны ысхан араласчылар.
Прай марығларға тӧӧй оңдайлар:
1. Марыға материалларны почтаҷа «Марыға» танығлығ ызарға «Хабар» газета редакциязының адрезіне: 655017 ХР, Ағбан г., Щетинкин ор., 34, 11 а\я алай электроннай почта адрезіне: stranahabar@mail.ru.
2. Пічікте марығ араласчызы ады-солазын толдыразынаң, чуртапчатхан орнын паза палғалысчаң телефонын хайди даа пазарға кирек.
3. Материаллар 2017 чылның 12 майына теере алылар, ол кӱн соонаң кірген материаллар марығда араласпинчалар.
4. Жюри таллаға алған марығ материаллары «Хабар» газетада паза газетаның сайтында сығарылар.
5. Полған на марығда чиңісчі паза сыйыхтығ орыннарға турысханнар табылар.
6. Марығ салтарлары паза чиңісчілерні чеестирі 2017 чылның 19 майында «Хабар» газетаның редакциязында иртер.
7. Чиңісчілер паза сыйыхтығ орыннарға турысхан араласчылар «Хабар» газета редакциязынзар хығыртылар.
СӦС СОО: Январьда «Хабар» газетаның редакциязы хығырығҷылар аразында марығлар чарлаан. Олар газетаның 90 чылына чарыдылчалар. Пӱӱн піс марығларның оңдайларын хатап пирчебіс.
Аарлығ хығырығҷылар, марығларның оңдайларынаң чахсы танызып, материалларны, тимнеп, ызыңар. Піс сағыпчабыс сірернің газетанаң палғалыстығ чоохтарыңны, пістің кибірлерні кӧзітчеткен сомнарыңны паза сӧбіре чыындызында хайраллалчатхан газетаның иң иргі чардығын!
Автор :
«ХАБАР» газетаның редакциязы
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде