ХАТЫҒ ТОҒАЗЫҒДА ЧИНІС ТУТТЫБЫС
02.08.2017
Хабарлар
Ирткен субботада, 29 июльда, Хакас Республиканың ипподромында ат чарызы иртті. Пірдең, мыңдағ ат чарызы удаа полбинча: Хакасияның піріктірілген командазы Хызылчар крайындағы Емельяново аймааның «Мустанг» ипподромыңдағы аттарнаң чарысхан.
Хайзы даа саринаң «ағырарға» килген чуртағҷылар илееде лолған. Ағбан городтың чуртағҷылары, тізең, чайғының теестегі тынағ кӱнінде ипподромзар сӧбіренең, палалархаларынаң хада килтірлер.
Ат чарызын кӧрерге Хакасия пазы Виктор Зимин, Емельяново аймаа пазының орынӌызы Олег Арестов килгеннер. Марығны пайрамни азып, республика пазы Виктор Зимин араласчыларға чахсы салтарлар кӧзідерге алғаан. Пу марығлар Сибирьнің ат ээлері пірігізінің кубогының II чардығындағы тоғазии полған. Тоғазығда 12 чарыс кӧріл парған: ӱс хостаан атнаң, улуғ аттарнаң, чалаң паза пасхазы.
Хызылчардағыларның аттары ӱс частығ аттар аразында - 1600 метрге, тӧрт частығ аттар аразында - 2400 метрге паза чалаң чарыста утханнар. Иң чахсы салтар кӧзіткен Водная гладь пии - ол 2400 метрге чарыста 1956 чылдағы рекордты асхан.
Хакасияның аттары, тізең, ӱс частығ аттар аразында алынӌа, 1600 метрге паза «Азых» сыйыхха чарыстарда чиңеннер. Аттарның ээзі - саблығ идінӌек Иван Миндибеков. Позының аттары ӱчӱн прайзынаң артых ол «ағырчатпас» па. Аттар паза атнаң чӧрчеткен устар постарын чахсы кӧзіткеннер.
Марығларда Хакасияның піріктірілген ӧмезі 157 баллнаң утхан. Хызылчар крайындағы «Мустанг» 125 балл чыып алған. Хакасияның ат чарызы паза туризм федерациязының вице-президенті Геннадий Каймановтың чооғынаң, мындағ тоғазығлар узарадылар. Килчеткен чылда Кемеров облазы Хакасиядаң тоғыр чарызарға тимде.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде