ПУШКИН, КИБЕЛІСТЕР, РОМАНСТАР...
11.06.2019
Хабарлар
Чӧрім. Хакасияда «Литература хараазы» акция ирткен
«Литература хараазы» чӧрім тузында чииттер аймах кибелістер хығырғаннар. Тиксі Россияда 6 июнь аймах мероприятиелерге пай полды: флешмобтар, кӧзідіглер, хығырығҷылар марии, акциялар. Андағ оңдайнаң хазнабыс чуртағҷылары саблығ поэт Александр Пушкиннің пайрамнығ чазын таныхтааннар. Пӱӱл ағаа 220 час толарҷых.
Хакасиядағылар, хынчатхан поэттің адын хумартхылап, «Литература хараазы» чӧрімге хозылғаннар. Мында иң пурун Хакас хазна университедінін ӧмезін таныхтирға кирек. Ӱгретчілер паза студенттер Пушкиннің тӧреен кӱніне Катанов скверінде улуғ программа тимнебіскеннер. Чалахай иирні музыка колледжінің камернай оркестрі асхан. Дирижер Александр Цацаның устаанынаң чиит музыканттар «Мой ласковый и нежный зверь» вальсты, «Шербурдағы зонтиктер», «Токкато» паза даа пасха кӧглерні толдырғаннар. Оларның аразында иң чапсых Л. Андерсеннің «Plink, Plank, Plunk» произведениезі полған. Аны музыканттар хыллығ инструменттернең смычоктар чох толдырчаттырлар. Концертті искусство институдының вокал пӧлиинің студенттері узаратханнар. Валерия Кыржинакова, Кирилл Загорулько, Ирина Сипкина, романстарны, опера ӱзіктерін сарнап, кӧрігҷілернің кӧңнін кӧдіргеннер. Программада ідӧк хакас ырлар полғаннар. Хакасияның чон артизі Екатерина Кыштымова ӱгренҷілерінең хада Г.Челбораковтың «Чирім хустары» сарынын толдырғанда, кізілернің чӱрее-паары хайылған.
Олох туста Николай Катановтын хумартхы тазы хыринда поэтическай марафон парчатхан. Аны филология паза культуралар аразындағы палғалыс институдының студенттері иртіргеннер. Улуғлар амғы чииттер кинделер хығырарға хынминчалар тіп хомзынадыр. Прайзынаңар чоохтап полбаспын, че ХГУ-дағы оол-хыстар хайдағ ла авторларның кибелістерін пілбинчеттірлер.
Сквернің пір пазында литература кафезі тоғынған. Кізілер, орыс писательлернің хынған чиистерін чіп аларға пӧгініп, теесте турғаннар. Менюнаң танысханда, чапсых таа ниме таппаам. Олох колбаса, сістеен яблах, бутер-бродтар, чейлер, морстар. Итсе-де, прай ас-тамах чахсы тимнелтір, аннаңар кафеде чон ӱзілбинчеткен. Кибір хоостыра акцияның иң ӧткін араласчылары палалар полғаннар. Педагогика колледжінің студенттері кічіглерге хынығ программа тимнеп салтырлар. Олғаннар асфальтта хоостааннар, сиспектер тапханнар, кибелістерні тыыда хығырғаннар. Оларның санында 5 частығ Денис узын сынаан.
. Іҷезі Наталья Бурнакованың таниинаң, оолағас аймах марығларда аралазарға хынадыр. Чиит ипчі чоохтапча: «Пу чӧрімнеңер испеем, сквер хыринҷа ирт париғанда, литература матырларына хубулған чииттерні кӧр салғабыс. Палам, Карлсонны, Пӱӱрні, Хозанахты танып салып, пеер чӱгӱрген. Ойыннар - паза марығлар аймағы хайхатча. Пазағы чылда «Литература хараазында» хайди даа аралазарға кӱстенербіс».
Студенттернің кип-азаан алынҷа таныхтирға кирек. Скверде «Руслан паза Людмила» поэмадағы алыптар, кресен хыстар, смокингтіг ооллар полғаннар. Ідӧк кӧрігҷілер балға чӧрчеткен абахайларнаң ӧкерсінгеннер. Олар ӱгретчі Алёна Лелекинаа «Евгений Онегиннің» страницаларынҷа викторина иртірерге полысханнар. Сурығлар андағ даа сидік полбаан, че пу кізі А. Пушкиннің романын сағысха киргенҷе, чииттер нандырыбызарға маңнанҷаңнар. Іди дее полза, ӱс иң артых араласчының санына кірерге пілістерім читкен.
Пӱӱл «Литература хараазы» чӧрім уғаа чахсы ирткен. Ол кічіглерге ле нимес, ідӧк улуғларға устарын кӧзіт пирерге, хынчатхан кибелістерін хығырарға, аймах ырлар истіп аларға оңдай пирген. Ідӧк пу чӧрім Александр Пушкиннің чайаачызы хаҷан даа кирексіністе полар тіп киречілепче.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде