СЫЙЫХХА - ХОККЕИСТТІҢ КИП-АЗАА
27.03.2019
Хабарлар
Хоккеисттернең тоғазығ тузында
Тоғазығ. Ағбандағы «Саяны» команда, меспектіг хоккейче Россия чемпионадының суперлигазында ойнир марығларда аралазып, ибзер чиңіснең айланды. Хакасияның пазы Валентин Коновалов «Саяны» команданың хоккеисттерінең, тренерлерінең тоғасхан.
Хакасияның пазы Валентин Коновалов иң пастап «Саяны» команданың хоккеисттерін, оларның тренерлерін республика чуртағҷыларына чахсы, ізестіг ойыннарынаң, чиңістерінең улуғ ӧрініс ағылчатханнары ӱчӱн чылығ алғыстаан. Ідӧк Валентин Олегович позының чооғында пістің спортсменнерібіс меспектіг хоккейче Россия чемпионадының суперлигазынзар сығып алғаны хоостыра ӧрінізінең ӱлескен.
Че піс, хабарҷылар, ӧӧн сурығ хоостыра хайдағ сӧстер истерге килізерін чидікпин сағыпчатхабыс: Хакасия правительствозы «Саяны» командаа Россия чемпионадының суперлигазынзар кіріп аларға ахчалығ полызығ пир полар ба, чох па? Кӧні нандырығ сағып полбаабыс.
Мында улуғ нимес хоза танығ идерге кирек: ирткен чылларда «Саяны» команда Россия чемпионадының суперлигазында ойнир оңдай ікі хати алған. Че суперлигазар кіріп алар ӱчӱн, килкім ахча тӧлирге кирек. Ирткен чылларда ол 60 миллион салковайға тиңнелген. Амды илееде ӧс парды полар.
Тоғазығның ӧӧн чардығы тоозыл парғанда, Хакасияның пазы Валентин Коновалов «Саяны» команданың устағ пастаан, тренерлерні, имҷіні, хоккеисттерні Хакасия правительствозының алғыстас пічіктерінең таныхтаан. Команданың устағ-пастаа Валентин Олеговичке хоккеисттің кип-азаан кизірткен паза прай спортсменнер хол салған кӱремчік сыйлап пирген. Республика пазы андағ хайығ салылғанына ӧрін парғанын чазырбинчатхан, амды, «Саяны» команданың хоккеизі полыбысханда, полызар оңдай табарға килізер теен.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
30 | 31 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 1 | 2 | 3 |
Кӱн таңмазы
Хакасияда
Россияда
Тилекейде