ТӦРЕЕН ЧИРІНЕ ЧАРЫТЧА
11.08.2021
Хабарлар
Кӧзідіг. Ӱр ниместе Ағбанда Л.Р.Кызласовтың адынаң чир-суғ ӱгренҷең национальнай музейде дизайнер Ирина Кемпфтің ипчілернің кӧгенектер кӧзідии азылған
Чиит хыс Ирина Кемпф позы Хакасияда Асхыс аалда тӧреен. Паба-іӌезі нация хоостыра немецтер полғаннар. Иринаа пис час полғанда, аның сӧбірезі Германиязар кӧс парыбысхан. Ирина анда школа тоосхан, іӌезінен хоостыра кип-азахтар тігерге ӱгренген. Аннаңар ол кічігдеңӧк кип-азах дизайнері поларға сағынған. Школа соонда Трирере городта ол специальностьха ӱгренген. Анаң пір семестрӌе ағаа Россияда Санкт-Петербург городтағы А.Л.Штиглицтің адынаң хоос промышленнай хазна академиязында ӱгренерге оңдай полғанох.
Ирина, тус киліссе, тӧреен чирінзер, Хакасиязар, кил парадыр. Ол, мында хакастарның кибірліг пайрамнарында полып, национальнай кип-азахтарны, чазанӌыхтарны, ӱгреніп, істескен. Анаң, Хакасияа чарыдып, хыстар кӧгенектерін хоости чайаан.
Аннаңар ол национальнай музейде кӧзіділген кӧгенектер коллекциязы «Минде Хакасия» тіп адалған. Хоосчы хызыл ӧңнерге хынча. Ол ӧң чарых кӱнні, кӱн чахайахтарын, ӧрчіліг тусты таныхтапча.
Кип-азах кӧзідии музейнің пастағы хадылындағы хоос тастар залында ирткен. Пӧзік пӱгӱр обаалар даа сіліг кӧгенектіг абахай хыстарзар ӧкерсініп кӧрчеткенге тӧӧй полғаннар. Ағаа хоза, чон узы паза хайӌы Сергей Чарков, чатханда хағып, кӱстіг ӱннең хайлап сыхханда, кізі чӱрее улам «хайнаан».
Залға арған ыс позыдыбысханда, тубан аразынаң хызыл узун кӧгенектіг абахай хыс чӱс килчеткен чіли сыхханда, кізілернің холларындағы фотоаппараттар паза смартфоннар чари тӱскеннер. Соонаң пасха хыстар хызыл, ах ӧңніг чайылӌах кӧгенектіг хуу хустар чіли сығара чӱсчеткеннер. Килістіре кӧг оларны ӱдесчеткен.
Кӧзідігнің пастағы кӱнінде кӧбізі телевидение паза печать хабарӌылары полғаннар. Хоосчы Ирина Кемпф оларның сурығларына нандырған паза позының чайаачы тоғызынаңар чоохтаан. Анаң ол хайди хоостапчатханын кӧзіткен. Хара тушьтығ чірчеӌегесте узун ніске лентаны паза чіпті ӧллебізіп, ватман чаӌында килістіре салыбысхан, ӱстӱн пазох ватман чаӌыннаң чаап, чалбах чардынаң пазыбысхан. Анаң лента паза чіптің салбахтаан хузурухтарынаң тартыбысхан. Чардыны алып, чаӌыннарны асханда, анда ипчі кізінің кӧгенеене тӧӧй хоосталых. Кисточканаң иптеглебіскенде, сіліг хоос пол парған. Пу оңдайнаң хоостирын ол позы сағынып алтыр.
Халғанӌызында Ирина позының сағызынаң ӱлескен: улуғ пӧгіннерні толдырарға, кічіг хаалағларнаң, тӧдір пазынмин, алнынзар ла пар турарға.
Автор :
Илья ТОПОЕВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде