ИРТКЕН ЧӰС ЧЫЛНЫҢ КИРЕЧІЛЕРІ
18.08.2021
Хабарлар
Кӧзідіг. Ағбандағы Фёдор Пронскихтің адынаң хоостар галереязында «Тус танығлары» кӧзідіг азыл парған
Хакасияның ӧӧн городына 2021 чыл уғаа танығлығ. Пӱӱл Ағбан город тӧстелгеннең 90 чыл толча! Мындағ пайрам пу килчеткен чечіме кӱнде алғым таныхталарға кирек полған. Че пандемия тузындағы кирексіністер хоостыра республика кінінің кӱнін иртірерге киліспинче. Аннаңар городтың устағ-пастаа Ағбанның тӧреен кӱніне чарыдылған мероприятиелерні учреждениелерде иртірердеңер чарадығ алыбысхан.
«Тус танығлары» кӧзідіг ідӧк пу танығлығ кӱнге чарыдылча. Ол Ағбандағы Фёдор Пронскихтің адынаң хоостар галереязында орныхча. Анда ирткен чӱс чылның 60 - 80 чылларында сабға сыххан Ағбанның паза Хызылчарның хоосчыларының тоғыстары сығарыл парғаннар. Олар прайзы галерея чыындызында хайраллалчалар. Тиксі 15 хоос, авторлары Владимир Капелько, Олег Ярошенко, Григорий Серебряков, Василий Новоселов, Фёдор Пронских, Андрей Поздеев паза Юрий Дударев полчалар. Пу устарның андада ӧӧн кӧстее хада чуртаан кізілернің омаларын, ибде тудынған-хабынған ниме-нооларын, ибіркізін хоостап салары полған. Олар чайаан портреттерні, натюрморттарны, пейзажтарны кӧрерге сынап уғаа чапсых.
Че кӧзідігні чон хайиина сығарылған иргі ниме-ноолар уламох тың «тірілдірчелер». Залҷа пас чӧрчетсең, олған туссар айлан парыбысчатханға тӧӧй. Орта чоохтаза, ол туста ибде тузаланған сундухтар, этажеркалар, комодтар, кибістер, радиолалар паза даа пасха нимелер ирткен туссар апарыбысчалар. Олар кӧзідіг залында, кізі чуртындағы чіли, узуҷаң, азыранҷаң, аалҷылар удурлаҷаң паза пала узуҷаң пӧліктерҷе турғызыл парғаннар.
- Пу кӧзідігдегі полған на экземпляр - ол пістің полғаныбыстың на олған паза чиит тустарыбыстың тании. Мында мин аға-ууҷамның туразында пол парғанға тӧӧйбін. Ағбан чуртағҷыларына пу кӧзідіг ідӧк уғаа чапсых полар тіп сағынчам, - теен Ағбан городтың устағҷызы Алексей Лёмин, кӧзідіг азылчатхан туста.
Ф.Е.Пронскихтің адынаң хоостар галереязы тоғынҷыларының мындағ кӧзідіг тӧстебізер сағыс хаҷанох полған. Чоохтирға кирек, аны чуртасха кирерге оларға Ағбан город чуртағҷылары хабас пиргеннер - постарының, іҷе-пабаларының тудынған иргі ниме-нооларын ағыл пиргеннер. Кӧзідімге, Хакасияның ӧӧн городының чиит чуртағҷызы Алексей Разорёнов ағазы Григорий Васильевич Заболоцкийнің «Аккорд» проигрывательын ағылған. Ол Илбек Ада чаа ветеранына Илбек Чиңістің 30 чылына удур сыйыхха пирілтір. «Сӧбіренің иргі нимелерін хайраллирында чазыт чоғыл. Оларны піс тастабинчабыс», - теен чиит ирен.
Паза пу кӱнде позының сағызынаң Ағбандағы культура, спорт паза чииттер устанызының пастығы Елена Закатова ӱлескен:
- Ағбан город чуртағҷылары тудынған иргі нимелерні пеер ағылғаны тың аарлығ. Ирткен тустың киречілерін пос хараанаң кӧрчетсең, чӱрек матап «хайнапча». Андада син сағыссырас чох олған тузыңны, іҷеңні сағысха кирчезің нооза. Кӧзідіг улуғ даа полбаза, аны тӧстебіскені уғаа чахсы.
Хайди ол аннаң андар чарытхан, «Тус танығлары» кӧзідіг Ағбан городтың музейін тӧстиріне пастағы хаалағ пол парарға айабас. «Город чуртағҷыларынын пос музейінзер ағылар ниме-ноолары ам даа асхынах нимес тіп сағынчабыс, - теен Елена Леонидовна.
Писатель, журналист, Ағбаннаңар книганың авторы Алексей Анненко Ағбандағы хоостар галереязының тоғынҷыларына чон кӧңнін кӧдірчеткен кӧзідіглер тимнепчеткен ӱчӱн улуғ алғыс читірген. Паза ол амғы хоосчыларға паза сомҷыларға Ағбан городтың танығлығ орыннарын кӧп хоостирға, сомнирға чӧп пирген. Ол тоғыстар мыннаң мындархы тӧллерге ідӧк ирткен тустың сын киречілері ползыннар тіп.
Ағбан городтың 90 чылына чарыдылған «Тус танығлары» кӧзідіг 5 сентябрьға теере тоғынар.
Автор :
Александра КАРАМЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде