ЧИР-СУУБЫС АРАЧЫЛАҒҶЫЛАРЫНА - САБЛАНЫС ХАҶАНҒА ДАА
25.08.2021
Хабарлар
Совет чааӌызына - хумартхы тас. Ағбан городтың тӧреен кӱніңде Культура паза тынағ паркыңдағы Георгиевскай садта Ада чир-суубыстың арачылағңызына улуғ хумартхы тас пайрамни азылған
ИРТКЕН СУББОТАДА ХАКАСИЯНЫҢ ӦӦН ГОРОДЫ ПОЗЫНЫҢ 90 ЧЫЛЫН ТАНЫХТААН. АМҒЫ ПАНДЕМИЯ ТУЗЫНДА АҢДАҒ ПАЙРАМНЫҒ КӰННІ АЛҒЫМ ӰЛӰКӰННИР ОҢДАЙ ЧОХ ПОЛ ПАРҒАН. ЧЕ АҒБАННЫҢ ТӦРЕЕН КӰНІНДЕ ГОРОДТА УҒАА ТАНЫҒЛЫҒ МЕРОПРИЯТИЕ ИРТКЕН - АНЫҢ КУЛЬТУРА ПАЗА ТЫНАҒ ПАРКЫНДАҒЫ ГЕОРГИЕВСКАЙ САДТА СОВЕТ ЧААҶЫЗЫНА УЛУҒ ХУМАРТХЫ ТАС ПАЙРАМНИ АЗЫЛҒАН.
Иртен сӧрӧн, наңмырлығ, чилліг кӱн турған даа полза, Георгиевскай садтағы ачыхта чон толдыра чыыл парған. Анда Ағбандағы чаа гарнизонының чааҷылары, волонтерлар, юнармеецтер, аймах устағҷылар, олаңай чуртағҷылар даа кӧп полған. Пӧзік хумартхы тас сикпеннең чабылых турған, аның хыринда чааҷылар паза юнармеецтер стройда турғаннар, пасха чааҷылар улуғ паза узун венок-гирлянда тутханнар. Чон аразында зонттар алтында, чахайахтар тудынып, город паза республика устағҷылары турғаннар. Садта чаа тузындағы музыка истілген.
Хумартхы тас сикпеннең чабылых таа полза, прай позының сынынаң чааҷы турчатханы кӧрінген. Пу пайрам Россияның «Культура» национальнай проекті хоостыра хазнаның чаа-тархын пірігізінің региондағы пӧлиинің пастаанҷа иртірілчеткеннеңер диктор искірген.
Тиктең нимес, мероприятие Ағбан городтың 90 чылына чарыдылған кӱнде иртірілче. Чаа тузында Ағбан істенҷі город полған. Фронт городтаң ырах таа полза, аның хорғыстығ тынызы мында чахсы пілдірген. Ол тустағы улуғ нимес городта палығлатхан чааҷыларға госпитальлар азылған, фронтсар ас-тамах, кип-азах, ухтар ызылған. Чааға 17 муң азыра Ағбанның чуртағҷызы парыбысхан, 5 муң азыра кізізі анда чат халған, 12 муң чааҷы чаадаң палығладып айланған. Чир-суубысты ал халған чааҷыларны, оларның матырын, махачы тудынызын піс - оларның тӧллері - хаҷан даа ундутпасха кирекпіс. Ниме дее полза, олардаңар сағыс піснең хада полар.
Пайрамнығ мероприятиені азып, чоох тутхан Ағбанның пазы Алексей Лёмин. Ол чыылған чонны городтың 90 чылы толчатханынаң алғыстаан.
- Ӱр ниместе піс, Илбек Ада чаадағы Чиңістің 75 чылына чарыдып, Культура паза тынағ паркында Георгиевскай садты тӧстеп пастаабыс. Чааның хатығ чыллары полған на кізінің чӱреенде халған. Ағбанда пу сад алынҷа орында полар, мында чап-чарых, кӧп ағас ӧзер, тынарға даа, сағысха тӱзерге дее чахсы орын полар. Аны піс хада тӧстепчебіс. Ағбанның полған на чуртағӌызы позының чӱреенің чардығын, чаа матырларына алғыстазын салча. Георгиевскай садты тӧстирге полысчатхан прай кізілерге алғызым читірчем.
Пӱӱн Георгиевскай садта наа танығлығ орын азылча. Таланттығ скульптор Андрей Коробцов чайап салған Совет чааӌызына монументті асчабыс. Пу хумартхы тасты городха Россияның чаа-тархын пірігізі сыйлап пирген. Аны пістің городыбысха пирерінде улуғ тоғыс апарған Хакасияның культура министрі Светлана Окольниковаа алғыс сӧстерін читірчем. Пу хумартхы тас пістің амғы амыр чуртазыбысты хайраллазын, - теен городтың пазы.
Аның соонда микрофонзар Хакасия пазы Валентин Коновалов сыххан.
- Пу хумартхы тас, Илбек Ада чаадағы совет чонының Чиңізіне чарыдылып, азылча. Пістің паба-ағаларыбыс, ол чаада нацисттерні чиңіп, пістің амғы пос чуртазыбысты ал халғаннар. Ам чуртас алысча, че совет чонының махачызы, матыры хаӌанға даа пістің сағызыбыста халча. Олар пістің пос чуртир правобысты арачылааннар. Піс улуғ алғызыбыс читірчебіс И.В.Сталинге, К.Г.Жуковха, К.К.Рокоссовскийге, М.Н.Цукановаа, М.И. Чебодаевке, В.Г. Тихоновха паза даа пасха матырларға. Ағбанның, Хакасияның паза прай хазнаның чуртағӌыларына хайдағ паанаң чиңіс тудылғанын пілерге кирек. Пу пістің амғы чуртазыбыс ӱчӱн чаа полған, чонның тилир правозы, тархыны пар полар ӱчӱн. Піс аны амғы ӧсчеткен тӧллерге читірерге кирекпіс, олар постарының матырларын пілзіннер, чеестезіннер, амғы амыр чуртастың паазын оңарзыннар. Прайзын, ӱлӱкӱннең! - чоохтаан регион устағӌызы.
Чыылған чонзар Россияның чаа-тархын пірігізінің толдырығлығ директоры Виталий Мартынюк айланған. Ол Россия президентінің полысчызы Владимир Мединскийнің чолабидін хығырған.
- Аарлығ ветераннар! Аарлығ нанӌылар! Сірерні Совет чааӌызына хумартхы тас азылчатханынаң паза регионның столицазы, саблығ Ағбан городтың 90 чылынаң алғыстапчам! Пістің паба-ағаларыбыстың чаадағы, істеністегі махачы тудынызы ӱчӱн поғдархас тархында хызыл чіпнең сиил парған. Ол пістің чӱреебістің чардығы полча, пістің илбек пірге хазнабыстың прай регионнарының чуртағҷыларын піріктірче. Совет чааӌызына пӱӱн азылчатхан хумартхы тас ағаа турыстығ хозым итче. Аны азып, піс Илбек Ада чаада пістің Чир-суубыстың пос чуртазы ӱчӱн постарының тынын пир салғаннар алнында пазыбыс тӧбін тӱзірчебіс. Ідӧк улуғ алғыс читірчебіс чаа ветераннарына паза тыл істенӌілеріне, постарына айабин чааласхан паза істенген ӱчӱн. Пістің паба-ағаларыбыстың матыр тудынызы Чир-суубысты ӧңнендірер пастағларға паза чидіглерге хабассын.
Виталий Мартынюк алғыстазын читірген соонда, Хакасияның Ӧӧркі Чӧп кнезі Владимир Штыгашев чоох тутхан:
- Совет чааӌызына Ағбанда хумартхы тас азылчатханы прай республикаа танығлығ кӱн полча. Хакасия позының чааӌыларынаң сыбыра поғдархапча. Чаа тузында областьта 210 муңӌа ла кізі чуртаан, чааға 70 муң кізі, чонының ӱзінӌі чардығы, парыбысхан, аннаң 30 муңы айланмаан. Область фронтха 40 полк тимнеен, мыннаң чааға парып, 309-ӌы Пирятин дивизиязы махачы чааласхан. 54 кізі Совет Союзының Матыры атха турысхан. Мында 4 госпиталь тоғынған, Харатастағы авиация школазында 1500 летчик-штурмовик тимнелген. Чиңіс уғаа аарлығ паанаң чаалалған. Ағбан кічіг город полған, анда 35 муң на кізі чуртаан. Пістің чааӌылар, Ыраххы Востокта чаалазып, японнарның Квантунскай армиязын унада сабарында араласханнар. Чааӌылар 9-ар чыл служба иртчеңнер. Пу хумартхы тасты турғысханнарға улуғ алғыс. Ағбанға 90 чыл толча, ол прай Хакасияның улуғ ӱлӱкӱні. Прайзына алғыс!
Совет чааӌызына хумартхы тасты Ағбанның пазы паза республика устағӌылары асханнар. Амды ол Чир-суубысты арачылапчатхан прай чааӌыларның сабланызын таныхтир.
Чааӌылар автоматтардаң, салют идіп, киизер залпнаң ӱс хати атханнар, «Журавли» сарын толдырылған. Анаң чааӌылар азылған хумартхы тас тӧзінзер венок-гирлянданы салғаннар.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде