НАА ХАЛЫХТАР ПАЛАТАЗЫ ТӦСТЕЛДІ
26.11.2021
Хабарлар
Чыылығ. Пу кӱннерде правительство туразында Хакасияның Халыхтар палатазының VI хығыртииның пастағы пленарнай чыылии ирткен. Анда наа хығыртығның кнезін тапханнар
Пістің республикада Халыхтар палатазы 2008 чылдаң тоғынча. Аның ӧӧн пӧгіні регионда чуртапчатхан чир-суғҷыларыбыстың ағырсымнығ сурығларын пӧгері полча. Халыхтар палатазының кізілері право хайраллаҷаң органнарның тоғызын, нацпроекттер хайди толдырылчатханын сыныхтапчалар. Паза олар, чонны паза ӱлгӱні чағыннадып, удур-тӧдір чоох алыстырчалар.
Полған на хығыртығ ӱс чыл тоғынча. Аның араласчылары, хайдағ даа тоғысты апарчатсалар, хазнабыстың, республиканың Конституциязына, федеральнай паза республика законнарына тӧстенчелер. Халыхтар палатазының пастағы кнезі Григорий Майнагашев полған. Ол аннаң 2008 - 2010 чылларда устаан. Ікінҷі хығыртиинаң - Серж Адамян (2010 - 2012 чылларда), ӱзінҷізінең, тӧртінҷізінең паза пизінҷізінең - Ольга Левченко.
2018 чылдаң сығара Халыхтар палатазына 39 кізі кірче, оларның 13-ін Хакасия пазы таллапча, ідӧк 13 араласчыны - республиканың Ӧӧркі Чӧбі, халғанҷы 13 кізізін Халыхтар палатазының араласчылары таапчалар.
Пу наада ирткен VI хығыртығның пастағы чыылиинда 30 кізі араласхан. Пасхазы ағырыбызып алай тоғыс хоостыра кил полбиндыр. Чыылығ пасталғанда, Хакасия пазы Валентин Коноваловха сӧс пирілген. Ол, прай араласчыларзар айланып, Халыхтар палатазының тоғызын пӧзік паалаан:
- Халыхтар палатазы чонға кӧп туза ағылча. Аның кізілері орындағы ӱлгӱнің тоғызын хазых хайраллаҷаң сферада, социальнай политикада кізі правозы сайбалча алай чох па тіп сыныхтапчалар. Ідӧк олар нацпроекттер хайди апарылчатханын хайығда тутчалар.
Ізенчем, наа хығыртығ, ідӧк тоғызын пӧзік синде апарып, чонға кӧп туза ағылар. Ундутпаңар, сірер ӱлгӱні паза чонны чағыннатчазар.
Хакасияҷа федеральнай инспектор Николай Сайбараков, Халыхтар палатазының араласчыларынзар айланып, алындағы хығыртығларның тоғызын чахсы паалаан. Ол наа хығыртыға тоғызын ідӧк тӱзімніг апарарға алғаан. Аның таниинаң, Хакасияда 700-ке чағын коммерческай нимес организация тоғынча. Оларның чарымызы халых пірігістері полча, 100 азыра - киртініс пірігізі. Халыхтар палатазы оларны прайзын піріктірчеткен площадка полча. Палатаның тоғызы республиканың халых чуртазын чахсыландырарға полысча тіп искірген Николай Иннокентьевич.
Кибір хоостыра полған на хығыртығның пастағы чыылиинда наа кнесті таапчалар. VI хығыртығның араласчылары ӱн пиріс тузында пазох Ольга Левченконы кнеске таллап алғаннар. Чоохтирға кирек, Халыхтар палатазының кізілері Ольга Александровнаның тоғызын пӧзік паалааннар. Оларның кӧрізінең, Ольга Левченко, чахсы устағҷы полып, чонға кӧп туза ағылча. Аның орынҷызы Ирина Шаповаленко полыбысхан.
Халыхтар палатазының V хығыртиинаң тиңнестірзе, VI хығыртыға кӧп наа кізі хозылбиндыр. Ӧӧнінде полған на комиссиянаң олох ла кізілер устир. Ӱн пиріс тузында Ирина Санникованы экология, ибіркі чир-чайаан паза туризмні тилідерінҷе комиссияның кнезіне таллап алғаннар, Алексей Котельниковты - право хайраллаҷаң органнарнаң паза ОНК-ларнаң хада-пірге тоғынар сурығларны пӧкчеткен комиссияның кнезіне, Ирина Дунаеваны - экономика тилізі, инновациялар паза идінҷектерге хабазар сурығларҷа комиссияның кнезіне, Ирина Баженованы - чурт-коммунальнай хоных паза пос устаныстың тоғыстарын сыныхтирынҷа комиссияның кнезіне, Андрей Готлибті - чоннар паза киртіністер аразындағы палғалыстар, культура сурығларынҷа комиссияның кнезіне, Вера Туникті - социальнай политика, хазых хайраллиры, чонның чуртас сині сурығларынҷа комиссияның кнезіне, Елена Бабушкинаны - ӱгредіг, наука, чииттер политиказы, олғаннарны чир-сууна хынарға ӱгредер тоғысты апарар сурығларҷа комиссияның кнезіне.
Халыхтар палатазының VI хығыртииның теестегі чыылии килер неделяда, 2 декабрьда, иртер. Анда олар полған на комиссияда кем аралазарын паза хайдағ наа проекттер чуртасха кирілерге тимненчеткенін ӱзӱрерлер.
Автор :
Ольга ТОМОЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде