ТАТХЫННЫҒ САЛАТТАР
24.12.2021
Хабарлар
Стол салчабыс. Чағдапчатхан чылда часка паза талаан полар ӱчӱн, аны аймах-пасха чиис тимнеп удурлаңар. Пӱӱнгі сығарыста оой тимнелчеткен, че олох туста сіліг кӧрімніг паза татхыннығ салаттарның рецепттерін сығарчабыс.
«АЛА ПАРЫС АЗАА»
Килчеткен чылның ээзі Ала парысты удурлап, изеннескен полып, азаана тӧӧй салат ит салыңар.
Кирек полар: ікі таңахтың кӧксіндегі иді (ысталған), 2 ортын муксун, 2 улуғ самнах яблоко уксузы, 4 нымырха, 3 улуғ самнах майонез, тус, унадылған перец - пос хынғанни, 150 грамм хатығ сорт сыр, 2 улуғ самнах унадылған грецкай хузух, 15 маслина.
Тимнирі: нымырхаларны узунға кизіңер. Муксунны, ікі чара кизіп, ніскеӌек иде чарым тегілегестерге тоғырап, айахха салыңар. Андар ікі улуғ самнах яблоко уксузын урыбызыңар. 10 минута ирт парза, суун тӧгібізіңер. Таңах идін узунға тоғырабызыңар. 50 грамм сырны, теркада хырып, салатсар хозыбызыңар. 100 грамм сырны, оох ӱттіг теркада хырып, салатты чазирға артыс салыңар. Салатсар майонез, тус паза перец хозып, пулғабызыңар.
Тимнелген салатты табахсар ала парыс ізіне тӧӧй иде салыбызыңар. Ӱстӱне хырған сырны тооладыңар. Маслиналарны, ікі чара кисклеп, сомдағы чіли сал салыңар. Істінзер унатхан грецкай хузухты тооладыбызыңар. «Ала парыс азаа» тимде.
«ХАЙХАСТЫҒ ЧАС»
Пу салат олғаннарның даа, улуғларның даа кӧңніне кірер. Ас-тамахты азынада тимнеп салза, салатты 15 - 20 минута аразына идібізерге чарир.
Кирек полар: 300 грамм таңах иді (сӧӧк чох), 150 грамм хатығ сорт сыр, 150 грамм корейскай морковь, 3 нымырха, 3-4 улуғ самнах майонез.
Тимнирі: таңах идін азынада тустығ суғда пызырыбызарға кирек алай садығ туразынаң ысталғанны алып алыңар. Нымырхаларны, ідӧк азынада пызырып, соодыбызыңар.
Табахсар таңах идін, кічіг кизектерге тоғырап, салчабыс. Нымырханың киӌірін паза оозын алынӌа чарчабыс. Ікі пасха ідіске ортын ӱттіг теркада хырчабыс, сырны - улуғ ӱттіг теркада. Корейскай морковь тың узун полбас ӱчӱн, аны кизектерге кисклебізерге. Прай нимелерні тимнеп алып, салатты чыып пастапчабыс.
Пастағы хадылы - ол таңах иді, ӱстӱн майонезнең сӱртчебіс.
Пазағы хадылы - морковь, аның ӱстӱне ідӧк майонез сӱртчебіс. Анаң нымырханың оозын салып, майонезнең чаапчабыс.
Пазағы хадылы - теркада хырылған сыр. Ӱстӱн хатабох майонезнең сӱртчебіс. Анаң теркада хырылған нымырха киӌірін тоолатчабыс, ӱстӱне - майонез.
Морковьтаң циферблат паза стрелкалар идіп, салатты часха тӧӧй ит саларға. Наа чыл столына «Хайхастығ час» тимде.
Автор :
Тимнеен Наталья ТЮКПЕЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде