ПОЗЫБЫСТЫҢ КІРПИЗІ ПОЗЫБЫСХАОХ КИРЕК
16.02.2022
Хабарлар
Тоғыс чорығы. Пу неделяда Хакасия пазы Валентин Коновалов Харатас городсар тоғыс чорығынаң чӧрген
АНДА РЕГИОН УСТАҒҶЫЗЫ «КОЛИЗЕЙ» КІРПИС ЗАВОДЫНДА ПОЛ КИЛГЕН ПАЗА «ИЗЕЛЧЕТКЕН ТУРАЛАРДАҢ КӦЗІРЕРІ» ПРОГРАММА ХООСТЫРА ХАРАТАСТА ПӰДІРІЛЧЕТКЕН НАА ТУРАЛАРНЫ ПААЛААН.
«Колизей» завод кірпистер паза тротуар плиткаларын сығарарынаң айғасча. 2015 чылда аймах сылтағлар ӱчӱн предприятие Тағлығ Алтайда санға алылған. Андарох налогтар тӧлеен.
Ирткен чылда, тізең, ол хатап республиказар айланған. Анзы Хакасия правительствозы килкім предприятиелерге, идінӌектерге хабасчатханынаң палғалыстығ. Оларға льготалығ кредиттер программазы тоғынча, налог ставказы тӱзірілген, гранттар, субсидиялар кӧріл парған паза даа пасхазы. Амды «Колизей» кірпис заводы наа товарлар сығарызынаң айғазарға кӧстег тутча. Ол сын мрамордаң кірпис сығарарға пӧгінче. «Колизейнің» кірпистерінең Хакасиядағы пӱдіріг организациялары матап тузаланчалар. Олардаң пӱдірігӌілер социальнай объекттер пӱдірчелер, тура алнындағы чирлерні плитканаң салчалар паза даа пасхазы.
Амды организацияның устағ-пастаа сығарған ниме-ноозын пасха регионнарӌа тарадарға пӧгінче, ол санда Монголиязар. Пу пӧгінні толдырарға предприятиенің кӱзі чидер - айда ол 15 миллион кірпис сығарарға тимде.
- Кірпис заводы Хакасиязар айланғаны республикаа хоза налог ағылар. Хакасия правительствозы ағаа аннаң андар тилирге полызар, аймах программаларда аралазарға хабазар. Хакасияда туралар, школалар, олған садтары паза даа пасха социальнай объекттер кӧп пӱдірілче. Аннаңар предприятиенің товарлары республикаа хайди даа кирек, - таныхтаан Хакасия пазы Валентин Коновалов.
Мында чахсы кӧзідім полча Харатас городтың Лениннің орамазында пӱдірілчеткен тура. Анда «Изелчеткен туралардаң кӧзірері» программа хоостыра кӧп хадыллығ туралар пӱдірілче. Пӱдіріг организациязы материалларны «Колизей» кірпис заводынаң алча. Ӱс хадыллығ турада 2-3 комнаталығ квартиралар. Оларда прай сантехника, чарытхы системазы тартыл парған. Чылығ кӱннер турыбысса, тураның ибіркізі плиткаларнаң иптелер. Материал ідӧк «Колизей» заводтаң алылар. Анаң андар 66 сӧбіре кӧзер.
Ол тураның хыринда олох программаӌа ікі тураның пӱдірии парча. Олар тимге сых парзалар, ӱс турада 200 чуртағӌы ээленер. Пу тураларның пӱдіриине федеральнай паза республика бюджеттерінең 117 миллион салковай азыра субсидия позыдылған.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде