КӰН СУРИИНДА - ПААЛАР, ИМНЕР, ИПОТЕКА ПРОГРАММАЛАРЫ
13.04.2022
Хабарлар
Кризистең тоғыр штаб. Хакасия правительствозында кризистең тоғыр штабтың теестегі чыылии ирткен
Кӱн суриина республикада чонға хорғыс чох поларынӌа, часхы хыра тоғыстарына тимненерінӌе, пааларны хайығда тударынӌа, банк полызығларынӌа паза пасха сурығлар сығарылған. Республика пазы Валентин Коновалов ідӧк чайғызын олғаннар хазиин пиктирінӌе кампанияны чахсы иртірібізеріне хайығ айландырған.
Пастағы искірігнең чоох тутхан юстиция киректерінӌе паза регион безопаснозынӌа министр Сергей Ромашов. Министерство ирткен читі кӱн аразына республиканың толдырығлығ ӱлгӱ органнарының хорғыс чох поларына тимненізін сыныхтаан. Чарадығ чох ӱлгӱ тоғызынаң тоғыр акциялар иртірілбеен. Че хосхар айының 3-ӌі кӱнінде ирен Хакас муниципальнай банктың офизінде чара чачыратчаң нимедеңер искірген. Сыныхтағ искіріг тайма полғанын ілезіне сығарған. Ирен аның картазының тоғызын банк туюхтабысхан ӱчӱн іди хылынтыр. Хосхар айының 6-ӌы кӱнінде Хакасияӌа МВД-зар республикадағы прай вокзалларда чара чачырас тимнелчеткеннеңер искіріг кірген. Ол ідӧк тайма полған. Чоохтирға кирек, андағ искіріглер тиксі хазнаӌа тарадылча. Право хайраллаӌаң органнар оларны хайди даа хайыға алчалар паза сыныхтапчалар. Валентин Коновалов Z таңмалығ ікі машинаны ӱреткеннеңер искіріглерӌе хайдағ тоғыс апарылчатханнаңар сағыссыразынаң ӱлескен. Сағам ол киректер сыныхталча. Республика пазы МВД тоғынӌыларын пу киректерні хайди даа читіре істезерге сурынған.
Хакасиядағы садығ тураларында, чырғалларда чонға кирек ниме-ноо пааларын сыныхтиры узарадылча. Республиканың экономика тилізі министрі Виктор Богушевичтің искіриинең, халғанӌы неделяда пааларның тың алысханы таныхталбинча, олар 2-3%-ке пасхалалчалар. Иң пілдірте ӧс парған ас-тамах санында: муксун (+8%), свекла (+7,5%), сӱт (+4%). Шоколад, рис, вермишель, пӧзік сорт ун паазының улуғ нимес ӧзізі таныхталча. Алтай паза Ағбан пилтірі аймахтарының ӧӧн аалларының садығ тураларында паалар сыныхталған. Сыныхтаға полған на аалның алты садығ туразында паалар санға алылған. Салтарында пірее ас-тамахха ортымах паа городтағызынинаң даа ниик полған. Кӧзідімге, таңах идінің паазы.
Экономика тилізі паза аал хонии министерстволары садығ тураларынзар орындағы ниме-ноо сығарчатханнарның ас-тамаан кирерінӌе тоғынчалар. Пӱӱнгі кӱнде килкім садығ тураларына чир тамаа киректелчеттір.
Пӱдіріг ниме-ноозына паалар ідӧк хайығда тудылча. Кірпис паазы 20%-ке ӧскені таныхталча. Хакасияның пӱдіріг паза ЖКХ министрі Валерий Келиннің таниинаң, хум паза сай паазы пір синде турыбысхан. Монополиядаң тоғыр федеральнай службаның (ФАС) Хакасияӌа управление пастығы Ксения Лебедева пааларны сыныхтирынӌа тоғыстар узарадылчатханнаңар искірген, ол санда таңах паазы тың ӧсчеткені хоостыра.
Имнер чыындызы тӧстелчеткенінеңер искіріг иділген. Штаб араласчыларын льготалығ имнернің садиинаңар чарлағлар Авито садығ платформазында сых килчеткені сағыссыратхан. Олар право хайраллаӌаң органнарны ол сурығӌа хатығлас парын сыныхтирға сурынғаннар. Хазых хайраллаӌаң министр Олег Ананьевскийге, тізең, льготалығ имнерні пирӌең изерісті хати кӧрерге, чӧреес ағырығларнаң ағырчатханнарға имнерні 3 - 6 айға пирбин турарға айланыс полған.
Чол пӱдіриинде тузаланылчатхан ниме-нооға паалар ӧзізі ӱзӱріге сығарылған. Хакасияның транспорт паза чол хонии министрі Дмитрий Василиадинің искіриинең, иң пілдірте битум паазы ӧс парған. Пір чыл мының алнында пір тонна 22 муң салковайға турған полза, пӱӱн ол 32 муң салковайға турча. Кӱскӱзін аннаңох аарлығ полтыр. Пу Ачинсктегі заводтың паазы. ФАС-тың Хакасияӌа управлениезі аны хайыға алар.
Паза пір сурығ - транспортха хоза чардыхтар паазы ӧсчеткенде, транспорт полызығларына пааларны ӧскірері. Сағам штаб араласчылары андағ чарадығ аларға сылтағ кӧрбинче, че сурығ істезілер.
Республикадағы партиялар паза халых пірігістері кризистең тоғыр кӱресчең чӧптерін читіргеннер. Правительство аппарадының устағӌы орынӌызы Ирина Емельянова оларны министерстволарға читір пирген. Пазағы штаб чыылиина тоғысха алылар чӧптердеңер искірілер.
Хакасияның финанстар министрінің тоғызын толдырчатхан Игорь Тугужеков банктарның полызығларынаңар искірген. Чоохтирға кирек, Россияның Ӧӧн банкы ставканы 20%-ке тиңнестірібіскенде, банктар кредиттерӌе паза вкладтарӌа ставкаларны ідӧк ӧскірібіскеннер. Анзы чонның ипотека кредидін алар кӧңніне ле нимес, ідӧк ал поларына теелче. Россия правительствозы алында тоғынған льготалығ ипотека кредиттерінің тоғызын тохтатхан, че президент оларның ӧӧн чардығынӌа льготалығ процент ставкаларын артыс салған. Оларның санында - сӧбіре ипотеказы. Чуртты наа турада алай алынӌа чир участогында 6% ставкалығ аларға чарир. Ол 2023 чыл тоозылғанӌа тоғынар, че пу чылға кӧрілген хабазығ тоозыл парған. Амды правительствоның лимиттерні ӧскірерін сағыпчалар. Андағох кирек аалдағы ипотека программазынӌа: ставка 3% халча, че сағам 2022 чылға кӧрілген хабазығ сині тоозыл парған. Пӱдірілчеткен турада чурт аларына льготалығ ипотека кредидінің ставказы 12%-ке тиңнелер. Регионнарда аның сині - 6 миллион салковай. Льготалығ ипотека кирілзе, пӱдіріг турбас тіп ізеніс пар. Олох туста валюта чырғалында салковай пиктелчеткенде, Россияның Ӧӧн банкы ставканы 17%-ке теере тӱзірібіскен. Хайди банктар аның соонаң хылынарлар, тус кӧзідер, че, пілдістіг, киректер чахсыланмаанда, чуртағӌылар чурт суриин ипотека кредиді полызиинаң пӧгерге маңзырабастар.
Ікінӌі сидіксініс - Хакасия чуртағӌылары алған кредит санынӌа Россияда ікінӌі орында турчатханы. Хакасияның экономика тилізі министрі Виктор Богушевичтің кӧрізінең, ол кӧзідіг ипотека кредидіне пирілер хабазығ синін синдірер. Республика пазының орынӌызы Ирина Войнова пасха сағынча: Хакасия чуртағӌыларның чуртха ипотека кредидін алчатханы хоостыра 3-4 ай пастағылар санына кірче. Аннаңар Ирина Ивановна тиксі кредиттер санында ипотекаа килісчеткен синні кӧрерге чӧптеен. Валентин Коновалов пу сурығӌа Виктор Богушевичке пос чӧптерін тимнирге чахаан.
Хакасияның істеніс паза социальнай арачыланыс министерствозының чонға хабазарынӌа чӧптер паза чохтаңар, республика пазы сӧбіре кирексіністерінӌе, кӧп палалығларға хабазығ пирӌең оңдайларны хати кӧрерге чахаан. Мыннаң правительстводағы кризистең тоғыр оперштабтың теестегі чыылии тоозылған.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде