ЧУРТАҒҶЫЛАРНЫҢ АҒЫРСЫМНЫҒ СУРЫҒЛАРЫ
15.06.2022
Хабарлар
Тоғыс чорығы. Хакасияның пазы Валентин Коновалов Саяногорсксар тоғыс чорығынаң чӧрген. Анда социальнай объекттерде пол килген
САЯНОГОРСКТА «РУСАЛ» КОМПАНИЯНЫҢ ӦТКІН ПОЛЫЗИИНАҢ 6 № ШКОЛАНЫҢ ІКІНҶӀ КОРПУЗЫНДА ТЫХТАҒ ТОҒЫСТАРЫ ТООЗЫЛ ПАРИР. ӰС ХАДЫЛЛЫҒ ШКОЛАДА ТЫХТАҒ НИНҶЕ-ДЕ ЧЫЛ ТӦРЕМІЛ АПАРЫЛЧА. ӰГРЕДІГ УЧРЕЖДЕНИЕЗІНІҢ ПАСТАҒЫ КОРПУЗЫНДАҒЫ СПОРТЗАЛДА ПАЗА ӰЗІНҶІ ХАДЫЛЫНДА ТОҒЫСТАР ТОЛДЫРЫЛ ПАРҒАН. ІДӦК ВЕНТИЛЯЦИЯ ПАЗА КАНАЛИЗАЦИЯ НААҶЫЛАЛҒАН ІКІНҶӀ КОРПУЗЫНДА ПИЩЕБЛОКТА ТЫХТАҒ ТОҒЫСТАРЫ ИДІЛ ПАРҒАН, АМҒЫ ТУСТА ЧАРЫТХЫ ТАРТАРҒА ПАЗА ВЕНТИЛЯЦИЯ ТУРҒЫЗАРҒА ХАЛҒАН. ТИКСІ ПӰДІРІГ ТОҒЫСТАРЫ 100 МИЛЛИОН АЗЫРА САЛКОВАЙҒА ТУР ПАРАР. АХЧАНЫ РЕСПУБЛИКА, МУНИЦИПАЛЬНАЙ БЮДЖЕТТЕР ПАЗА «РУСАЛ» КОМПАНИЯ ПИРГЕННЕР.
- Пістің подряд организациязы школада тыхтағны 1,5 ай иртір парир. Ікінҷі корпузында полларны тиксі нааҷылабысхабыс, актовай залда тоғыстар толдырыл парған. Амды тоғынҷылар ікінҷі хадылында істен парчалар. Кӱннің тоғысха 5 - 10 пӱдірігҷі сыхча. Июль айда піс, тоғыстарны тоозыбызып, объектті тузаланысха пир саларға пӧгінчебіс, - таныхтаан «Салямов общестрой» подряд организациязының тоғынӌызы Александр Пестов.
Пӱӱл 1-ғы сентябрьда Саяногорсктағы 6 № школа тыхтағ тоғыстары соонаң пасталығ класстарның 625 ӱгренӌізіне ізиин азар. Олғаннар пір сменанаң ӱгренерлер.
Таныхтирға кирек, Хакасияның правительствозы паза «РУСАЛ» компания чуртас-экономика чӧптезии хоостыра республикада олған садтары, школалар тыхталча. Ідӧк ол учреждениелерде материально-техническай база нааӌылалча.
Анаң республика пазы Валентин Коновалов орындағы ӱлгӱлернең хада ӧӧн библиотеказар чол тутхан. Анда оларны Саяногорсктағы библиотека системазының директоры Марина Головина удурлаан.
- Пістің библиотека системазынзар прай алты библиотека кірче: Ымай тастағы, Нымырттығдағы паза Саяногорсктағы тӧрт библиотека. Мин сірерні нааҷылалған ӧӧн библиотекада удурлапчам. Улии 477 квадрат метр, аны «Культура» национальнай проектче наа оңдайнаң тоғындырарынча 14 миллион салковай хорадылған. Ахча федеральнай, республика паза орындағы бюджеттердең позыдылған. Мында хығырығҷыларға уғаа истіг паза амғы тусха килістіре оңдайлар тӧстелген, - чоохтаан Марина Головина.
Нааӌылағ соонаң библиотекада кино кӧзітчең проектор турғызылған, ырахтын паза очнай ӱгренер оңдай тӧстелген, аймах мастер-класстар иртірілче. Ідӧк хығырӌаң истіг орыннар тимнелгеннер. Библиотека фонды нацпроект хоостыра 4500 книгаа хозылған. Аннаң пасха, хазии уйан хығырығӌыларға килістіре оңдайлар тӧстелген. Пандус турғызылған, харах оды уйан хығырығӌыларға «чоохтанчатхан кинделер» алылған. Уйан исчеткеннер портативнай индукционнай система пастыра библиотека тоғынӌыларынаң палғалыс тутчалар. Ӧӧн библиотека, нааӌылалып, читінӌі айы тоғын парир. Хығырығӌылар паза тоғынӌылар ол прай даа саринаң пӱӱнгі тусха килістіре тіп таныхтааннар.
Анаң республика пазы Саяногорсктағы СТЭМИ техникумның студенттерінең тоғасхан. Олар постарының ағырсымнығ сурығларын Валентин Олеговичке пиргеннер. Таныхтирға кирек, Хакасия пазы, коронавирус ағырығ амырап парғанда, аймах ӱгредіг учреждениелерінӌе чӧріп, студенттернең тоғазығлар иртірче. Хайда полған на хыс-оолға республика пазына ағырсымнығ сурығ пиріп айланарға оңдай пирілче. Чииттернің сурығлары аймах-пасха темаларға чарыдылғаннар. Хай піреезі Валентин Коноваловтың чуртазына теелчеткен сурығлар пирген, кӧзідімге, хайди политиканаң айғазып пастааннаңар паза чидіглерінеңер чоохтап пирерге сурынған. Пірее студенттер городтағы транспортта тӧлегні хызырардаңар сурығ кӧдіргеннер. Пасха регионнардаң килген студенттер хоза ӱгредіг навигаторынаң тузалан полбинчатханына хомзынғаннар. Студенттер паза техникум тоғынӌылары Саяногорскта общежитиелер чоғылы хоостыра чоох апарғаннар. Городта ікі дее техникум, ағаа хоза ӧӧнінде студенттер пасха город-ааллардаң паза хонӌых регионнардаң киліп ӱгренчелер. Валентин Олегович чоохтазығ соонаң техникумның ӱгредіг корпустарынӌа экскурсиянаң чӧрген.
Анаң Хакасия пазы Чайаачы олғаннарның кінінде чуртағӌыларнаң тоғасхан. Тоғазығда городтың сидіксіністерінеңер паза муниципалитет тилізінеңер чоох парған.
Чуртағӌылар ағырсымнығ сурығларны ӧткін кӧдіргеннер. Хай пірее сурығларӌа пічіктер, тимнеп, правительство аппарадының специализіне пиргеннер. Бюджет тоғынӌыларын чал ахчазына индексация иділері сағыссыратхан. Дачаларға теере автобус маршрудын сыбыра чӧргізерінеңер сурыныс полған. Ідӧк чоллар тыхтирынаңар паза идінӌектер пірігізіне хабазардаңар, спорт тилізінеңер, чир-чайаанны хайраллирдаңар, ӱгредігдеңер паза хазых хайраллирынаңар чоох апарылған. Кӧбізі сурығларға Хакасия пазы нандырығ пирген, ідӧк профильліг министерстволарға, город администрациязынаң хада-пірге тоғынып, чуртағӌыларның айланыстарын пӧкчең оңдайлар табарға чахаан.
Автор :
Наталья ТЮКПЕЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде