ПРАЙ НИМЕ ЧИИТТЕРНӀҢ ХОЛЫНДА
01.07.2022
Хабарлар
Таштыптағы оол-хыстар тынанчалар
Ӱлӱкӱн. Чииттер кӱнінде иирзер Таштыптағы олғаннар паза чииттер Культура туразы хыринда чыылысханнар
Анда оларға пайрамнығ программа тимнел парған: ойыннар, чайаачы кӧзідіглер, марығлар. Олаңай чиит кізее микрофонға тыыда чоохтанӌаң оңдай пирілген. Библиотека тоғынӌылары ідӧк ойыннар, сиспектер тимнееннер.
Идінӌектер, кӱнӧртӧк батуттар, попкорн, тадылығ вата итчең тиріглер турғыс салып, тоғынарға пастабысханнар. Хараазын чииттерге пайрам салюды тыӌыраан.
Ӱлӱкӱнде иң ӧткін чииттер Таштып аймаа паза Таштып аал чӧбі пастарының, культура управлениезінің паза «Молодая гвардия Единой России» халых пірігізінің аарластығ пічіктерінең сыйыхтатханнар. Аймах пазы Алексей Дьяченко чооғында таныхтаан:
- Чииттер - ол пістің аймахтың на нимес, хазнаның таңдағызы! Сірернең кӧп нандырығлығ тоғыс палғалыстығ. Прай ниме сірернің холыңарда: сірер хайди ӱгренерзер, тоғынарзар, чуртаста тудынарзар, пос алнында хайдағ пӧгіннер турғызарзар.
Чииттер кӱнінде сценадаң мағаа пастағызын на битбокснаң сарнапчатханын истерге киліскен. Битбокс - ол микрофонзар чағын сарнапчатханы алай аймах табыстар сығарчатханы. Таштыптағы 16 № училищенің студенті Дарья Куюкова бит-бокснаң тӧртінӌі чылы пос алынӌа сарнирға ӱгренче. 15 частығ саарбах Святослав Вершинин ідӧк пос кӧңнінең андағ кӧстег таллап алған.
Автор :
Тарина БУТОНАЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде