САҒЫСТА САҢАЙҒА ХАЛАР
02.09.2016
Хабарлар
Хакасия пазы гимназия директоры Алла Селиваненконы «За заслуги перед Хакасией» орденнең сыйыхтаан.
Киҷее, 1 сентябрьда, прай школалар олғаннарға ізіктерін асханнар. Пу кӱнде олғаннарға пастағы саң сыңыраан. Ағбан город гимназиязының олғаннарын Хакасия пазы Виктор Зимин, Хазна Думазының депутады Надежда Максимова паза Ағбан город пазы Николай Булакин алғыстирға килгеннер.
Анзы тиктең нимес. Ағбандағы 8 № школа гимназия пол парғаннаң пӱӱл 25-ҷі чылын таныхтапча. Аннаңар пастағы саң ӱлӱкӱніне аймах чылларда гимназияны тоосханнар килгеннер.
Олғаннарны алғыстап, Виктор Михайлович таныхтаан, ирткен чылдағы ӱгредіг салтарлары хоостыра, гимназия Россияның иң чахсы 100 школалар санына кірген. Ӱгретчілер олғаннарға чахсы пілістер пирчелер. Ӱгренҷілер аймах марығларда чахсы чидіглерге читчелер, ЕГЭ-ны турыстығ тудыбызып, хазнаның иң чахсы ВУЗ-тарынзар кіріп алчалар. Виктор Михайлович, андағ чидіглер ӱчӱн, гимназия директоры Алла Селиваненкаа паза ӱгретчілерге алғызын читірген. Паба-іҷелер гимназия чуртазында ӧткін араласчалар. Ідӧк Виктор Зимин ӱгренҷілерге алғызын читірген. Полған на школаның ӱгренҷілері, полған на предприятие чидіглері Хакасияны ӧңнендірче.
Амды Хакасияда кӧп пӱдіріглер парча. Пӱӱнгі кӱнде Хакасияда пӱдіріл парған музей-культура кіні Сибирьдегі иң артых музей полча. Хирургия корпузы пӱдіріл парған. Ідӧк перинатальнай кін паза чааҷылар городогы пӱдірілче. Олған садтарын пӱдірерінҷе федеральнай программаны Хакасия иң чахсыларның санында толдырыбысхан. Республикада палалар кӧп тӧріпчеткенде, наа школалар пӱдірерге киректелче. Хазна Думазының депутады Надежда Максимованың полызиинаң Хакасия школалар пӱдірерінҷе федеральнай программаа кір парған. Іди Катановта паза Ис пилтірінде наа школалар пӱдірілче. Ідӧк пу кӱнде Гайдаровск аалда нааҷылалған школа азылған.
Пастағы класс ӱгренҷілеріне гимназия чахсы піліс, сын арғыстарны, хынған ӱгретчілерні сыйлап пирер. Хакасия пазы улуғ класстарның ӱгренҷілеріне, школа тоозып, аймах-пасха орыннарзар парып, республикадаңар хаҷан даа ундутпасха алғаан.
Виктор Михайлович ӱгредіг тилізінҷе республика программазы хоостыра гимназияда робото-техниканы ӱгренерлер тіп молҷаан. Чооғын тоозып, Хакасия пазы гимназия директоры Алла Селиваненконы «За заслуги перед Хакасией» орденнең сыйыхтаан.
Ідӧк ӱгренҷілерге паза ӱгретчілерге Хазна Думазының депутады Надежда Максимова паза Ағбан город пазы Николай Булакин алғыстас сӧстерін читіргеннер.
Анаң школазар ӱгренерге наа ла килгеннер паза школа тоосчатханнар кибелістер хығырғаннар. Пӱӱл гимназияда ӱс пастағы класс ӱгренер. Оларны ӱгретчілерінең таныстырғаннар. Гимназияны аймах чылларда тоосхан выпускниктер сарын толдырғаннар.
Улуғ нимес концерт тоозылғанда, пастағы саң сыңыраан. Аны пастағы класс ӱгренҷілері София Можарова, Елизавета Ральгейзер паза выпускниктер Ян Музалевский, Иван Деменев сыңыратханнар.
Пастағы саң ӱлӱкӱні тоозылды. Олғаннар класстарынҷа тарас парыбысханнар. Пастағы класстағылар ӱгретчілерінең танысханнар. Олар пу гимназияда 11 чыл ӱгренерлер. Че пастағы саң сыңырааны оларның сағызында саңайға халар.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде