ЧИДІКПИН САҒЫПЧАЛАР
02.09.2016
Хабарлар
Ӱр нимеете Россия правительствозында «Сад-ӱӱҷік паза дача хониинаңар» наа законның проектін ӱзӱргеннер.
Анда сад-ӱӱҷік пірігістерін хайди тӧстирдеңер паза оларның тоғыстарынаңар кӧріл парған. Пу законда садоводтар хоныхтарынҷа право оңдайларын оңарылыстығ ит салардаңар пазылған.
Пу наа законны аларын Россияда 60 миллионҷа кізі чидікпин сахтапча. Ана анҷа город чуртағҷызы дачанаң айғасча.
Хакасияда даа город чуртағҷылары ідӧк пос тустарын дачаларында иртірчелер. Ағбанда ла садоводтарның нинҷе-де пірігізі тоғынча («Подсинее», «Ивушка», «Изумруд», «Родники», «Стройиндустрия», «Колягинские холмы»).
Садоводтар пірігістерінеңер закон 1998 чылдох алылған полған. Ол тус аразына гражданскай, чир паза чурт киреенеңер законнарға илееде алызығлар паза тӱзедіглер кирілгеннер. Оларның хай піреезі удур-тӧдір тоғырланыстығ полған. Аннаңар нинҷе-де чыл мының алнында «дачнай амнистия» алылған, ол сидіксіністернің чардығын на пӧгерге полысхан.
Амғы наа закон проектін аннаңар маңзырабин ӱзӱрерге кирек тіп таныхтаан Россия правительствозының кнезі Дмитрий Медведев. Хазна Думазынзар ол документтерні ызар алнында, пастап, садоводтарнаң тоғазып, оларны истіп аларға кирек. Аннаңар Дмитрий Медведев, Курск облазынзар чӧріп, анда сад-ӱӱҷіктер паза дачалар хонииның устағҷыларынаң тоғасхан. Кӧзідімге, анда чарытхыны дачалар тутчатхан кізілерге, аалдағыларға чіли, ниик паанаң сат турарға чӧп пирілген. Медведев ол чӧпнең чарасхан. Че мында кӧп ниме орындағы ӱлгӱлердең полча. Сыданарлар ба олар мындағ льготалар пир поларға.
Олох тоғазығда чир участоктарының кадастр паалағларының сурии кӧдірілген. Пірееде пол парча іди, ікі хости участоктың паалары ікі пасха пол парчалар. Амды андағ киректерні тӱзедібізерлер. 2017 чылның 1 январьынаң сығара чуртасха кирілер хазнаның кадастр паалаа. Ол киректернең тоғынарлар бюджет организациялары паза учреждениелері. Андада, кадастр паазын саба санап пирзелер, иділген ӱрег ӱчӱн дача ээлеріне ол бюджет организациязының ахчазынаң тӧлирлер.
Ідӧк мындағ сурығ кӧдірілген - ӱӱҷік ас-тамааның артығын садыға сығарары. Дачаларда кӧбізін тынаға сых парған улуғ частығ кізілер тоғынчалар. Оларға пенсияа хоза ахча тоғынып алары пір дее артых полбасчых.
Чоохтирға кирек, ол сурығ Хакасияда маңнаныстығ пӧгілче. Ікі чыл мының алнында республика пазы Виктор Зиминнің кӱстенізінең Ағбанда аал хонии рыногы пӱдіріл парған. Анда кізілер ӱӱҷіктерінде ӧскіріп алған чир тамаан ниик паанаң сатчалар.
Пу закон чуртасха киріл парза, садоводтарға чуртирға ниик арах поларҷых.
Автор :
Тимнеен Илья ТОПОЕВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде