ТИРЕҢ ПІЛІСТЕР ПИРЧЕЛЕР, ЧУРТАСХА ТИМНЕПЧЕЛЕР
07.10.2016
Хабарлар
ХАКАС ТІЛІ ПАЗА ЛИТЕРАТУРА ӰГРЕТЧІЛЕРІ ИРИНА ВАСИЛЬЕВНА ИДИМЕШЕВАНЫ ПАЗА ОЛЬГА ПЕТРОВНА САГАЛАКОВАНЫ ӰГРЕДІГ КИРЕЕНДЕ ІСТЕНЧЕТКЕН УЛУС ЧАХСЫ ТАНЫПЧА ПОЛАР. ОЛАРНЫ ӦӦНІНДЕ ЧАХСЫ ТОҒЫНЧАТХАН, ПӦЗІК ЧИДІГЛЕРГЕ ЧИТЧЕТКЕН ӰГРЕТЧІЛЕР ЧІЛИ ПІЛЧЕЛЕР. ІДӦК ІКІ ӰГРЕТЧІНІҢ ӰГРЕНҶІЛЕРІ РЕСПУБЛИКА ОЛИМПИАДАЛАРЫҢДА, МАРЫҒЛАРДА ПАЗА ФЕСТИВАЛЬЛАРДА ТӦРЕМІЛ ПӦЗІК ПІЛІСТЕР КӦЗІТЧЕЛЕР. КӰСТЕНІП ТОҒЫНЧАТХАН ӰГРЕТЧІЛЕРНІҢ ТОҒЫСТАРЫ ПӦЗІК ПААЛАЛДЫ. ПУ НЕДЕЛЯДА, ӰГРЕГЧІЛЕР КӰНІНДЕ, РЕСПУБЛИКАНЫҢ ПРАВИТЕЛЬСТВО ТУРАЗЫНДА ХАКАС ТІЛІ ПАЗА ЛИТЕРАТУРА ӰГРЕТЧІЛЕРІНЕ ПАЗА ДАА ПАСХА ХАКАСИЯНЫҢ ИҢ АРТЫХ ӰГРЕТЧІЛЕРІНЕ ХАКАС РЕСПУБЛИКАНЫҢ ПАЗЫ ВИКТОР МИХАЙЛОВИЧ ЗИМИН ААРЛАСТЫҒ ПІЧІКТЕР, АХЧАЛЫҒ СЫЙЫХТАР, МЕДАЛЬЛАР ЧИТІРГЕН.
(Хакас тiлi ӱгретчiлерi Ирина Идимешеванаң Ольга Сагалакова.)
Ӱгретчілер кӱні Россияда 50 чыл азыра таныхталча. Пу кӱнде хазнаның иң артых ӱгретчілеріне сыйыхтар читірері кибірге кір парған. Хайди чооғында таныхтаан Хакасия пазы Виктор Зимин, пӱӱл республиканың ӱгредіг киреенде 9 муң азыра ӱгретчі істенче. Оларның кӧбізі пастағы категориялығ алай ба пӧзік квалификациялығ. Анзы пістің ӱгретчілер пӧзік пілістіг полчатханын киречілепче. Ідӧк чыл сай Хакасияның школаларынзар тоғынарға килген чиит специалисттернің саны хозылча. Пӱӱл 160 чиит ӱгретчі килді.
- Ӱгретчілернің чал ахчазы хозылчатханда, чиит ӱгретчілерге чахсы хабазығ иділчеткенде, аалзар тоғынарға парған ӱгретчілерге чурт ӱчӱн ахча позыдылчатханда, чиит оол-хыстар пу профессияҷа тоғынарға хынып пар сыхтылар, - теен Виктор Михайлович.
Хакасияда палаларның саны хозылчатханда, ӱгредіг учреждениелерін пӱдірерінеңер сурығ турча. Пуӱл школа тоосхан ікі ӱгренҷінің орнына 1-ғы классха ікі олған килген. Хайди кӧзітчелер саннар, иң кӧп олғаннар саны Ағбан городта. Аны чахсы сизініп, Хакасияның правительствозы 2020 чылға теере городта наа олған садтарын паза школалар пӱдірерге пӧгін тутча.
- 1-ғы классха килген олғаннарның саны чылдаң хозылчатханда, піске оларға піліс алар орыннар тимнеп саларға кирек. Пу сурығны піс ӱр ниместе Ағбан город пазы Николай Булакиннең ӱзӱргебіс. Іди килчеткен чылларда городта наа школалар пӱдіріп пастирбыс. Пу кирекке ахчаны федеральнай кіннең тартарбыс, піс, тізең, республика бюджедінең 5 процент ле хорадарға кирекпіс, - чарытхан Хакасия пазы.
Хакасияда наа школалар пӱдірерінең пасха, ідӧк чоох парған ааллардағы ӱгредіг учреждениелерінеңер. Пӱӱнгі
кӱнде ікі школа Асхыс аймаанда пӱтче. Ол Катанов паза Ис пилтірі аалларда. Таныхтирға кирек, Катановтағы школаның проекті Россияның аалдағы иң артых школаларның проекттер санына кірче. Пу ікі школада пӱдіріг тоғыстары тӱрчедең тоозылар, анаң ӱгренҷілер наа ӱгредіг учреждениелерінзер кӧзерлер.
Хакасияның ӱгретчілері чыл сай профессиональнай марығларда араласчалар. Пӱӱл республиканың тӧрт ӱгретчізі 200 муң салковайлығ сыйыхха турысхан. Олар Россия синіндегі марығларның чиңісчілері полчалар. Ідӧк 12 ӱгретчі Хакасия правительствозының сыйиин алған. Оларға полғанына ла 50-ер муң салковай пирілген. Ӱстӱнде адалған чиңісчілерге 5 октябрьда Хакасияның пазы Виктор Зимин Аарластығ пічіктер паза ахчалығ сертификаттар читірген. Ідӧк «Хакасияның саблығ ӱгретчізі» атха Саяногорсктағы 2 № школаның ӱгретчізі Светлана Кричевцова паза Пии аймаандағы школа-интернаттың директоры Владимир Тимченко турысханнар. Аарластығ пічікнең сыйыхтатхан Ағбандағы 20 № школаның директор орынҷызы Ирина Соловьева, «Трудовая доблесть Хакасии» медальға турысхан Ағбандағы лицейнің директоры Лидия Петрук.
- Істенчетсе, пістің тоғызыбыс піди пӧзік паалаларынаңар сағынминчабыс. Ӧӧнінде аны пӧзік синде толдырарға кӱстенчебіс. Че піске мындағ пӧзік хайығ салылчатханына, улуғ сыйых читірілчеткеніне ӧрінчебіс. Мин Хакасияның прай ӱгретчілерін ӱлӱкӱнібіснең алғыстапчам, хазииңар пик ползын, ӱгренҷілерің пӧзік чидіглерге чит турзыннар, -алғыстапча 2015 чылда «Хакас тілінің иң артых ӱгретчізі» атха турысхан ӱгретчі Ирина Идимешева.
- Пiстің ӱлӱкӱн чылда пір хати полча, аннаңар мин Хакасияның прай ӱгретчілерін пу кӱннең алғыстапчам. Тоғыстарың ӧрініс ағылзын, ӱгренҷілерің пӧзік чидіглерге читсіннер. Пӱӱн минің чидиим - ол тиксі Хызыл хара суғдағы школа ӧмезінің паза минің хыйғаҷах ӱгренҷілерімнің улуғ чидии, - таныхтаан чооғында Ольга Сагалакова.
5 октябрьда - Ӱгретчілер кӱні. Пу кӱн ӱгредіг киреенде істенчеткеннер постарының профессиональнай ӱлӱкӱннерін таныхтааннар. Че, ӱлӱкӱн дее полза, олар тоғынғаннар, ідӧк уроктар иртіргеннер, олғаннарға тирең пілістер пиргеннер. Аннаңар, неке, Хакасияның правительство туразында 5 октябрьда тоғазығ 16.00 часта ла пасталған. Ӱгретчілер уроктар соонаң Ағбанзар сыйыхтар аларға килгеннер, ам, тізең, аннаң андар ӱгредіг киреенде істен парчалар, олғаннарны улуғ чуртасха тимнепчелер...
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде