1500 ЧУРТАҒҶАА - ЧИР УЧАСТОГЫ
13.12.2016
Хабарлар
Республиканың Ағбан пилтірі паза Алтай аймахтарында льготалығ чуртағҷыларға пирерге тӧрт муң азыра чир участоты тимде. Пу саннардаңар искірілген Хакасияның ис-пай паза чир хайызығлары министерствозының теестегі чыылиинда.
Хакасияда аймах льготалығ чуртағӌыларға тикке чир участогын пирері узарадылча, ол санда кӧп палалығ сӧбірелерге паза чиит специалисттерге. Хакасия пазы Виктор Зиминнің чахиинаң халғанҷы ӱс чылға муниципальнай пӱдістерге чир участоктарын тимниріне улуғ хабазығ пирілген. Кӧзідімге, участокты пӧлеріне, хырығларын таныхтирына, ағаа пічіктер тимниріне субсидия пирілче. Пу кӧстегліг тоғыстың салтарынӌа пӱӱнгі кӱнде Алтай аймаанда 1262 чир участогы тимнелген, хайзы теесті чабарға полысхан. Ағаа хоза Хубачарда 260 чир участогы ағбандағыларға пирілер.
Хакасияның ис-пай паза чир хайызығлары министрі Елена Соломонова ідӧк Ағбан пилтірінде апарылчатхан тоғыстың чахсы салтарларын таныхтаан. Мында 3000 азыра чир участогы тимнелген, оларның 840 участогы Ағбан пилтірінде кӧрілче, 2370 участок - Солнечнай аалда. Таныхтирға кирек, Ағбан пилтірі аймаанда чир участогына теес чоғыл. Солнечнайдағы 1500 чир участогы республиканың ӧӧн городына пирілер, Ағбанда пос чир чоғыл, льготалығ чуртағӌылар саны, тізең, кӧп.
Министрнің таниинаң, чир участоктарын пирерінӌе тоғыс килчеткен чылда узарадылар. Хайығ салылар Харатастың, Саяногорсктың льготалығ чуртағӌыларына чир участогын пиреріне. Ол санда Харатасха 300-400 чир участоының межеваниезін паза тиксі кӧрімінің проектін тимниріне республика бюджедінең субсидия пирілер. Пӱӱл Харатастағы 9-ҷы посёлокта 775 чир участогы тимнелген.
Хакасия пазы, профиль министрінең тоғасханда, пу орыннарда алынӌа тохтаан. Пиидегі хара тастығ орын тиліпчеткеннеңер, пу чағында квалификациялығ кадрлар - инженерлер паза тоғысчылар - киректелер. Чииттерге тикке чир участогы - оларны кӧӧктірҷең чахсы оңдай.
- Кізілер чох инвестициялар полбинча. Чир чох полза, туралар полбас. Чурт чох полза, тилістің ӧӧн кӧзідии - чииттер - чох полар. Оларны пу орыннарзар тартар ӱчӱн, кӧп ниме идерге кирек. Піс пастағы хаалағларны идіп пастапчабыс, чир пир сыххабыс, че ол пастағы ла хаалағлар. Аннаң андар піске инфраструктуранаң, чолларнаң паза пасха сурығларнаң айғазарға кирек, - тоғазығда таныхтаан Хакасия пазы Виктор Зимин.
Автор :
Хакасияның ис-пай паза чир хайызығлары министерствозы
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде