ХАКАС СПОРТ ОЙЫННАРЫНДА ТАШТЫПТАҒЫЛАР АРТЫХТАР
21.12.2016
Статья
Хакасияның ӧткін оол-хыстарын чыып, «Асхыр» хакас чииттернің пірігізі хакас спорт кӧрімнерінңе «Чиит пайрам» республика фестивальын алтынҷы хати иртірді. 10 декабрьда Н.Ф.Катановтың адынаң Хакас хазна университедінің аал хонии институдынзар Ағбан, Харатас городтардаң, Асхыс, Таштып, Алтай, Орджоникидзе, Шира, Ағбан пилтірі аймахтарынаң тиксі 200-ке чағын кізі чыылысхан. Тоғынчатхан чииттер, халых пірігістердегілер паза студенттер кӱрес, ағас паза канат тартызары, хазых, волейбол паза футбол спорт кӧрімнерінде кӱстерінең сынасханнар.
Марығны азып, чыылған чонзар алғыстас сӧстерінең Хакасияның национальнай паза территориальнай политика министрі Дмитрий Тодышев паза республиканың спорт министрі Валерий Денщиков айланғаннар. Дмитрий Александрович чооғында хакас спорт кӧрімнерінҷе марығның кирексінізін таныхтаан паза аны «Асхыр» хакас чииттернің пірігізі пос кӧңнінең, кӱзінең иртірчеткенін махтаан. Ідӧк чииттерні Валерий Васильевич алғыстаан.
- 2017 чылда августта Ульяновскта национальнай спортча паза ойыннарҷа чоннар аразындағы фестиваль иртер. Аның программазына кӱрес, канат тартызары, хол пазызары паза пасха даа спорт кӧpiмнері кирілер. Анда Хакасияның спортсменнері аралазар ӱчӱн, республиканың спорт министерствозы оларға полызарға кӱстенер. «Чиит пайрам» фестиваль, тізең, пу марыға тимненерінде улуғ хозым итче, - чооғында таныхтаан Валерий Денщиков.
Пӱӱл марығда тоғынчатхан кӧп оол-хыс араласты. Кӧзідімге алза, Асхыс паза Таштып аймахтарынаң чиит физкультура ӱгретчілері килгеннер. Волейболда пу ікі аймахтың командалары аразында харбазығ хатығ парған. Ӧмелерде ікі хыс паза тӧрт оол полған. Пір дее ӧме утырарға хынмаан, спортсменнер полған на очко ӱчӱн кӱрескеннер. Андағ даа полза, полған на марығда чиңісчілер паза утырғаннар поладырлар.
Улам хатығ харбазығ кӱресте полған. Ӱс кӧдірімде командалардаң ӱзер спортсмен кибіске сыххан. Ӱс минута аразына кӱресчее очко кӧп алып аларға кирек полған. Кӱресте спорт устары даа, олаңай кӱресчілер дее араласханнар. Пу спорт кӧрімінде Ағбан пилтірі аймааның ӧмезі артых полыбысхан, 2-ӌі орынны Алтай аймаа алған паза 3-ӌі орында Асхыс аймааның ӧмезі пол парған.
Хайди чоохтапча фестивальның тӧстегӌізі, «Асхыр» хакас чииттер пірігізінің устағҷызы Айла Тюньдешева, пастағы фестивальны иртірерге сидік полған, ол ӧӧнінде ахчанаң, опыт чоғылынаң палғалыстығ полған, амды, тізең...
- Піске Хакасияның спорт министерствозы, марығ чарғыӌыларын арға-мӧрійде араластыртып, спорт тиріглерінең паза пасха даа нимелернең хабасча. Пӱӱл піске ідӧк Хакасияның экономика, национальнай паза территориальнай политика министерстволары паза спонсорлар чахсы хабас пирділер, - чоохтапча Айла.
Іди хатығ харбазығлар соонаң хакас спорт кӧрімнерінде чииттер фестивальында чиңісті холға кирген Таштып аймааның оол-хыстары. Оларға кубок паза сыйыхтар пирілген. 2-ӌі орынны Н.Ф.Катановтың адынаң Хакас хазна университедінің ӧмезі алған паза хола медальға Ағбан пилтірі аймааның ӧмезі турысхан. Чиңіс тутхан ӧмелерге спорт тиріглерін аларына ахчалығ сертификаттар читірілген.
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде