ПАСХА ЧОННЫҢ КУЛЬТУРАЗЫН КӦКЛӦЛЕРІНДЕ КӦЗІТЧЕ
10.01.2017
Хабарлар
ЧАЙААЧЫ КІЗІЛЕР ПАЙ КӦРІС-ПІЛІСТІГЛЕР. АСХЫС ААЛНЫҢ ЧУРТАҒӋЫЗЫ ТАТЬЯНА НИКОЛАЕВНА САГАТАЕВА КӦКЛӦЛЕР ЧАЙАПЧА. ОЛ КІЧІГДЕҢ СЫҒАРА ТІГЕРГЕ-ПАЛҒИРҒА ХЫНЧА. АСХЫС АЙМААНДАҒЫ ПИЛТІР ААЛДА ОЛ УУӋАЗЫНАҢ ПАЗА ІӋЕЗІНЕҢ ХАДА ИСТЕҢ ОНӋАА ИТЧЕҢНЕР, АНАҢ АҒАА СІЛІГ КӦГЕНЕКТЕР ТІКЧЕҢНЕР, МОНӋЫХТАРНАҢ ЧАЗАӋАҢНАР. ТАНЯНЫҢ ААЛДА ӦӦРЕЛЕРІ КӦП ПОЛӋАҢ, ПОС ТІККЕН ОНӋААЛАРНАҢ ОЙНАӋАҢНАР.
АМҒЫ ТУСТА КӦКЛӦЛЕР ИТЧЕҢ ОҢДАЙЛАР ТОЛДЫРА, АЙМАХ МАТЕРИАЛЛАР КӦП САДЫЛЧА НООЗА. ПӰӰНГІ КӰНДЕ ТАТЬЯНА НИКОЛАЕВНА КӦКЛӦНІ ПЛАСТИКТЕҢ ТИМНЕПЧЕ. ОЛ ПЛАСТИЛИН ОСХАС НЫМЗАХ. КӦКЛӦНІҢ ФОРМАЗЫН КИЛІСТІРЕ ТИМНЕП, УС ХОЛЛЫҒ ИПЧІ АНЫ ДУХОВКАДА ІЗІТЧЕ, АНАҢ ПЛАСТИК ХАТ ПАРЧА. КӦКЛӦНІҢ СЫРАЙЫН САЛААНАҢ, СТЕКАНАҢ, ПІРЕЕДЕ ІҢЕНЕҢ АЛАЙ TIC АРЫҒЛАӋАҢ АҒАЗАХНАҢ ХООСТАПЧА. АНАҢ, КИЛІСТІРЕ ӦҢНЕР ТАЛЛАП, СЫРЛАПЧА. КӦКЛӦЛЕРНІҢ ПӦЗИИ - 20-30 АЛАЙ 50 САНТИМЕТР. ТАТЬЯНА НИКОЛАЕВНА ПІР КӦКЛӦНІ 3-4 КӰНГЕ ТИМНЕБІСЧЕ. АҒАА КӦКЛӦНІҢ СЫРЫ ХУРУП ПАРАРЫН ПІР КӰН САХТИРҒА КИЛІСЧЕ. АНАҢ ООХ-ТЕЕК ТОҒЫСТАР ХАЛЧА: КИП-АЗААН ЧІБЕКНЕҢ ХООСТИРҒА, НИНӋІ САЛАРҒА, АННАҢ ДАА ПАСХАЗЫ. ОЛ ТОҒЫСТАРҒА КӦП ТУС ПАРЫБЫСЧА.
Ус холлығ ипчі кӧклӧлер чайирынаң алты чыл айғас парир. Интернет пастыра ол аймах мастер-класстар кӧріп алча. Пу тоғысты идеріне ӧнетін ӱгренмеен. Татьяна Николаевна хаӌан даа хоостирға, чапсырарға, тігерге хынӌаң. Кӧклӧлер идері аның хобби полча. Истерні, чіптерні, нинӌілерні, састарны ол садығ туразынаң алча. Пірее ӧкер истернің чардыхтарын кізілердең сурап алча. Татьянаның ателье тутчатхан таныстары пар. Анда кирек чох ӧкер ис чардыхтарын алып алча.
Амды Татьяна Сагатаеваның позының узанӌаң орны пар. Аның іӌе-пабазы Асхыста «Ткани» садығ туразын тутча. Анда Татьяна Николаевна позына пулуңас пӧліп алған. Амды кӧклӧлерін анда тимнепче. Полған на ус кӧклӧзін пос оңдайынӌа чайапча. Татьяна Сагатаеваның кӧклӧлерін омаларынаң, харахтарынаң танып салчалар.
Татьяна Николаевна Асхыстағы лицейде тархын паза обществознание ӱгретчізі полча. Ол школа соонаң Ағбандағы Сойан-Алтай тюркология институдында орыс тілі, литература паза тархын ӱгретчізіне ӱгренген. Амды профессиязы хоостыра тоғынча. Ол институт соонаң Северде Хета аалда ӱс чыл орыс тілі ӱгретчізі полған. Пiрсiнде Хакасиязар отпускка килгенде, ол Иван Николаевич Сагатаевнең танызып алған. Ол полицияда тоғынча. Хада сӧбіре тӧстееннер. Чапсыстығ, Татьяна Николаевнаның хыс фамилиязы ідӧк Сагатаева. Хоных хонғанда, ағаа фамилиязын алыстырарға киректелбеен.
Севердең саңайға айланғанда, Асхыстағы лицейзер істенерге кірібіскен. 2016 чылда лицейде кӧклӧлер чайаӌаң мастерской азылған. Пӱӱл часхызын лицейдегілер пастағы кӧклӧлер кӧзідиин иртірерге пӧгінчелер. Олғаннар ол тоғыснаң хынып айғасчалар.
Татьяна Николаевна аймах чонның паза пурунғы тустағы кӧклӧлерні чайирға
хынча. Северде тоғынчатханда, андағы чуртағӌылар ағаа долган, нганасан кӧклӧлерін ит пирерге сурынӌаңнар. Ус холлығ ипчее калмык кӧклӧзін чайирға киліскенӧк. Че аймах чонның кӧклӧзін чайир алнында оларның культуразын, кибірлерін Интернетче алай энциклопедияларӌа ӱгренче: хайдағ тон, пӧрік кис чӧрчелер, чазанӌыхтары хайдағдыр.
- Севердегі чонның культуразы пай, -тіпче Татьяна Николаевна. - Мағаа пасха чонның культуразын пілерге хынығ. Мағаа ӧӧнінде национальнай кӧклӧні тимнирге чахыпчапар. Че кӧңніме хыдат культуразы кірче.
Кӧклӧлерін Татьяна Николаевна ӧӧнінде сыйлапча, пірееде сатча, іди кӧмес парыс идіп алча. Аның іӌезінің ибінде хызы чайаан кӧклӧлер толдыра. Иван Николаевич ипчізі кӧклӧлер итчеткенінең пір дее тоғыр нимес, тимде кӧклӧні кӧр салып, ол кӱлімзіреп ле салча. Полицияда тоғынза даа, ол позы ідӧк чайаачы кізі, хоостар чайирға хынча.
Аат хустар осхас ынағ ирепчі палалары чайаачы тоғыснаң айғассыннар тіп сағынча. Оларның тӧрт хыс ӧсче. Улии Таняа 14 час, ол хореографиянаң айғазарға хынча. Лариса 3-ӌі класста ӱгренче, ӧс парза, архитектор поларға сағынча. Дашаа 5 час, ол хоосчы поларбын тіпче. Иң очылары Алиса ікі частығ, ідӧк хоостирға хынча. Хызыӌахтар іӌезінең хада кӧклӧлер чайапчалар. Палаларның хаӌан даа наа сағыстар полча. Олар наа кӧклӧ сағын таап алзалар, аны хада хоостап тимнепчелер.
Сагатаевтер сӧбірезі амғы туста тың маң чохха тӱсче - Асхыста чурт пӱдірче. Татьяна Николаевна туразында алынӌа узанӌаң пӧлік азып аларға сағынча. Иван Николаевич позына ідӧк алынӌа кабинет кирек тіпче.
Таныхтирға кирек, Татьяна Николаевна, кӧклӧлер чайирынаң пасха, ідӧк нымахтар паза чоохтар пасча.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде