ЧИР-ЧАЙААННЫ ХАЙРАЛЛИРЫНА ЧІТІГ КӦРІС КИРЕК
24.03.2017
Хабарлар
Пу неделяда Ағбанда драма театрының хыринда экология акциязы ирткен. Волонтерлар ӧнетін окулист таблица полызиинаң кізілернің «экология кӧрізін» сыныхтааннар.
Буквалар орнына анда Чоннар аразындағы Хызыл книгаа киріл парған 11 аңның танығлары хоосталған. Акция араласчыларына оларны прай орта адап пирерге кирек полған. Пу таблица тилекейде аң-хустарның саны тың хызырылчатханын чахсы кӧзітче. Амды чир ӱстӱнде 50 муң нарвал, 25 муң ах аба, 5 муң морж халтыр. Че иң асхынах саннығ аң - амур тигрі, ол таблицаның иң алтында кӧзіділген. Тилекейде халған 540 амур тигрін хайраллабазабыс, хысхаҷах тус аразына ол саңайға чіт парар. Хакасияда чуртапчатхан аңнардаң пу таблицаа хызыл пӱӱрні ле кир салғаннар. Аның саны ідӧк кӧп нимес - 3 муң.
«Экология кӧрізі» акция олох кӱн Иркутскта, Новосибирскте, Хызылчарда, Братскта, Тулунда паза Черемховада ирткен. Ағбанда аны 1 № школаның 8-9 класстарның ӱгренҷілері тимнееннер. Оларның санында Вероника Боргоякова полған. Ӧткін хызыҷах 9 класста ӱгренче, халых тоғызында ол тӧреміл араласча. Вероника чоохтаан: «Акцияның ӧӧн пӧгіні - кізілернің хайиин чир-чайаанны паза аң-хустарны хайраллирына тартары. Постарың таблицада кӧрчезер, аң-хустарның саны тың хызырылча. Полған на кізі экология хайраллирына хозым идерге кирек».
Верониканың чооғына Ағбанның 1 № школазының директор орынҷызы Олеся Николаевна Захарова хозылған. Ол таныхтаан: «Экология кӧрізі» акция тиксі Россияда «360 минута» экология марафонын пастапча. Ол пістің хазнада пӱӱл марттаң пасти октябрьға теере иртер. «360 минута» проекттің тӧстегҷізі En+ Group компанияларның ӧмезі паза «Страна Заповедная» национальнай фонд полчалар. Пістің школаның ӱгренҷілері пу чӧрімде ӧткін араласчалар. 2015 паза 2016 чылларда олар Байкал кӧл хазында ирткен ӱгредіг форумына чӧргеннер. Анда олғаннар пілістерін алғытханнар паза Байкалның чарларын арығлааннар. «360 минута» - тузалығ чӧрім. Анда араласхан олғаннар чир-чайаанны паза ибіркіні ардатпастар».
«Экология кӧрізі» акцияда Хакасияның чир-чайаан ис-пайы паза экология министрі Алексей Сиорпас араласхан. Алексей Сергеевич волонтерларның тоғызын пӧзік паалаан. Ол таныхтаан: «Ағбанның 1 № школазының ӱгренҷілері пу акцияны мыннаң мындар олған садтарында паза школаларда иртірерге пӧгінчелер. Анзы орта, палаларны кічігдең сығара чир-чайаанны хайраллирға ӱгредерге кирек». Ідӧк Алексей Сергеевич чуртағҷыларны министерство иртірчеткен акцияларда аралазарға хығырған.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде