АБАЗА ГОРОДТЫҢ ТАҢДАҒЫЗЫ ӰЗӰРІЛГЕН
31.03.2017
Хабарлар
Хакасияның пазы Виктор Зимин пӱӱл республиканың Тиліс чӧбі президиумының пастағы чыылиин Абаза городта иртірді. Анда ідӧк араласханнар Хазна Думазының депутады Надежда Максимова, Хакасияның Ӧӧркі Чӧбінің кнезі Владимир Штыгашев, республика пазының пастағы орынҷызы Олег Нам, Хакас хазна университедінің ректоры Татьяна Краснова, республиканың экономика министрі Татьяна Пауль, Абазадағы рудниктің устағҷызы Александр Жуков паза аннаң даа пасха устағҷылар.
Ол тиктең нимес анда ирткен. Ирткен чағынғы чылларда Абаза городха сидік учурапча. Хаҷан-да сабланған, кӱстіг, тимір тас аныҷаң рудниктің тоғызы турыбысхадағ полған. Ис-пайны чир алтынаң сығарчатхан шахталар тоғынылчатхан орыннарын тоос таа салдылар. Аннаң андар наа орыннарны тимнирге кӧп ахча кирек. Ағаа хоза, тимір тасты хасчаң, чир ӱстӱне сығарҷаң техниказы иргілен парған. Оларны нааҷылирға кирек, че ахча чоғыл. Амғы туста кӧп хайығ ӱзӱрлеп тоғынарына салылча. Іди тоғынмазаң, рынок оңдайларында тудын полбассың. Че Абазадағы рудниктің алнында таныхталған читпестері сылтаанда, тимір тастың паазы пӧзік пол парча. Андағ паанаң аны сат полбинчалар.
Алнындағы чылларда Абазадағы рудник «Евразтың» холында полған. Че парыс пирбинчеткен предприятиелерні ол килкім пірігіс позынаң хыйа идібіскен. Іди Абаза городтың ӧӧн «пабазы» тоғызын саңай тохтадыбызарға чит тее парған полған. Шахтада істенген чон тоғыс чох халған. Город бюджедіне налогтар кірбинібіскен. Рудниктең пасха, чон тоғынҷаң предприятие городта чоғыл даа. Мындағ сидік чыллар килген тастыхти орныхчатхан улуғ нимес городха.
Кӧп тоғыс иділді, иділче халғанҷы чылларда, рудникке саңай чох пол парарға пирбес ӱчӱн. Пӱӱнгі кӱнде Хакасия Правительствозының, Ӧӧркі Чӧбінің паза рудниктің тоғысчы ӧмезінің кӱстенізі сылтаанда салтарлар кӧрінче. Че хайдағ-да килкім алнынзар алтағдаңар чоохтирға сағам ирте. Хайдағ чолҷа мыннаң мындар парары ам даа кӧрілче. Ана андағ пӧгіннең иртті Абазада республиканың Тиліс чӧбі президиумының чыылии.
Ӱзӱріге пис сурығ сығарылған. Н.Ф.Катановтың адынаң Хакас хазна университедінің ректоры, Тиліс чӧбінің кураторы Татьяна Григорьевна Краснова муниципалитеттерде тиліс чӧптерінің тоғызын хайди пӱдірердеңер чоохтаан. Абаза осхас чирлерде пос киреен тӧстирдеңер чарыт пирген республиканың экономика министрі Татьяна Владимировна Пауль. Позының городын тилідер инвестиция программазын Тиліс чӧбінің алнына сығарған Абаза городтың пазы Николай Иванович Байбородов. Экология туризмін чалбах чолға сығарардаңар чоох тутхан «Реал-Запсиб» ООО-ның устағҷызы Татьяна Николаевна Иванова. Идінҷек Татьяна Владимировна Байкалова халастың наа кӧрімнерін сығарар проектінең таныстырған.
Чыылығ сурығларын ӱзӱрер алнында чоох тутхан республика пазы Виктор Михайлович Зимин.
- 2015 чылда кӱскӱзін мында полғанымда, чонның кӧңні саңай пасха пілдірген, - теен Виктор Михайлович. - Харахтарында таңдағы кӱнге ізеніс чохха тӧӧй полған. Пӱӱн, тізең, саңай пасха. Сидік тустар кӧместең соона халып одырчалар. Кӧп сидіктер тобырған сылтаанда, Абазадағы рудниктің таңдағы кӱні чахсы ізеністер тӧрітче. «Евразнаң» чӧптезіглер иртірген соонда наа техника аларға ахча табылған. Тӱрчедең наа техниканы ағыларлар. Тимір тасты аниры толдыра кӱзінең пар сығар. Ағаа хоза, пістің тимір тазыбысты албиныбысхан полғаннар, амды аны сурчалар, паазын кӧдірібіскеннер. Ол рудниктің тиліс чолы тиирге чарир.
Я, туннельнің пазында чарых кӧріне тӱсті. Абазадағы рудникті прай кӱзінең тоғындырар оңдайлар табылча. Городтың ӧӧн предприятиезі чахсы тоғын сыхса, чонға тоғынҷаң орыннар пазох полар, муниципалитеттің бюджедіне тӧлеглер кірер.
Тиліс чӧбінде ӱзӱрілген сурығлар толдыразынаң чуртасха кирілзе, Абазаның таңдағызы чарых кӧрінче.
Чыылығ иртірібізіп, республика пазы Виктор Зимин рудниктің инженерно-техническай тоғынҷыларынаң тоғасхан. Ағаа хозылған Ӧӧркі Чӧптің кнезі Владимир Николаевич Штыгашев.
Тоғазығда предприятиенің тоғызын ӧтіре пілчеткен специалисттер постарының сағыс-кӧрістерінең ӱлескеннер. Виктор Михайловичнең Владимир Николаевич шахтерларнаң чахсы пілізіп чоохтасханнар. Рудниктің ӧӧн инженері Сергей Юрьевич Замятин ниме кирек, хайди парыстығ тоғынарын ипти чарыт пирген. Республика устағҷыларын аның сананыстары, кӧрістері чӧпсіткен.
Абаза городтың тиліс чолын кӧрзе, ол рудниктің тоғызынаң палғалыстығ. Че, хайди таныхтаан Владимир Штыгашев, кӧӧлҷе пасха предприятиелер азарын кӧрерге кирек. Олох рудниктің тимір тазын орында хайылдырып, чугун аларға. Хаҷан-да андағ завод полған нооза. Мындағ сіліг чирде туризмні алғыдарға кирек. Аннаң даа пасха чоллар пар. Абазаны тилідерге уғаа чахсы полызығ полғадағ - аны моногородтар санына кир салғаны. Пу сурығны пӧгерге чахсы хабасхан Хазна Думазының депутады Надежда Сергеевна Максимова.
Автор :
Георгий КУНУЧАКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде