ХУБАЧАР - ПИИ - АСХЫС ЧОЛДА АСФАЛЬТ ТӦЗЕЛЧЕ
24.05.2017
Хабарлар
ПУ НЕДЕЛЯДА «ДСП-11» ООО ХУБАЧАР - ПИИ - АСХЫС ЧОЛНЫҢ 1 - 18 КИЛОМЕТР АРАЗЫНДА КИЗЕКТИ АСФАЛЬТ ТӦЗИРІНҶЕ ТОҒЫСТАРНЫ ПАСТАБЫСТЫ. ТОҒЫСТАР ІКІ РАЗРЕЗ АХЧАЗЫНА ТОЛДЫРЫЛЧА: «АРШАНОВСКИЙ РАЗРЕЗ» ПАЗА «ВОСТОЧНО-БЕЙСКИЙ РАЗРЕЗ» ООО-ларның. АНЫҢ АЛНЫНДА АРШАННАР ААЛЗАР ПАРЧАТХАН ЧОЛДА ИЗЕЛЧЕТКЕН ОРЫННАР ИПТЕЛГЕН. ЧООХТИРҒА КИРЕК, САҒАМ АРШАННАРДАҒЫ РАЗРЕЗТЕҢ ХАРА ТАСТЫҢ ИЛЕЕДЕ ЧАРДЫҒЫН АВТОМОБИЛЬ ЧОЛЛАРЫНҶА ТАРТЧАЛАР. АННАҢАР РАЗРЕЗТЕР, ЧОЛЛАРНЫҢ ИЗЕЛЧЕТКЕНІ ӰЧӰН НАНДЫРЫҒЛЫҒ ПОЛЫП, ЧЫЛ САЙ АНЫ ТЫХТИРЫНА ХОРАДЫНЧАЛАР.
22 МАЙДА ХУБАЧАР - ПИИ - АСХЫС ЧОЛНЫҢ ПАСТАҒОХ КИЛОМЕТРІНДЕ ТОҒЫС ХАЙНАП ПАСТААН. ЧОЛ ПӰДІРІГҶІЛЕРІ ИҢ ТЫҢ ИЗЕЛГЕН ОРЫННАРДА АСФАЛЬТ ТӦЗЕЕННЕР, ХАЙДА, ТІЗЕҢ, ПОЛНЫЙ АСФАЛЬТ АЛТЫНДАҒЫ ЧАРДЫҒЫ КӦРІНЧЕТКЕН, АНЫ ТИКСІ ИПТЕП ТУРҒАННАР. ТОҒЫСТАРНАҢ УСТАП ПАРЧА «ДСП-11» ООО-ның ПРОРАБЫ ИЛГАР ВЕЙСАЛОВ. АНЫҢ ИСКІРИИНЕҢ, ЧОЛ КИЗЕКТЕРІНДЕ АСФАЛЬТ ТӦЗИРІНДЕ ТӦРТ ТЕХНИКА ПАЗА ОНҶА ТОҒЫНҶЫ АРАЛАСЧА.
Прай даа чол техниказы амғы технологияларға килістіре сығарылған. Кӧзідімге, Германияда сығарылған асфальт тӧзеҷең машина компьютернең тоғынча. Машина алнында ізіг асфальт бетонын урҷаң орын кӧріл парған, грузовик бетонны андар урған соонаң аза урылған чардыхты тоғынҷылар кӱрҷекнең салыбысчалар. Асфальт тӧзеҷең машина тибіреп пастапча, аның соонҷа иргі асфальт ӱстӱнҷе наа асфальт тӧзелче. Каток асфальт тӧзеҷең машина соонҷа хайынча. Ол наа асфальтты ныхти пасча.
- Пӱӱн піс чолның ікі кизек чирінде асфальт тӧзебістібіс, пірсінің узуны 300 метрге тиңнелче, ікінҷізінің - 200 метр, - чоохтапча прораб Илгар Вейсалов.
- Іди піске прай 1,5 километр чолны асфальтнаң чабызарға киректелче. Пу тоғысты «Аршановский разрез» чахиинаң ӱзінҷі чылы толдырчабыс.
Тоғыстарның толдырылчатханын сыныхтағда тутча Хакасавтодор. Хакасияның транспорт паза чол хонии министерствозы искіриинең, тиксі тоғыстарға 19,5 миллион салковай кӧріл парған. Оларның ӧӧн чардығын - 14 миллион салковайны - «Аршановский разрез» пирче, 5,5 миллионны - «Восточно-Бейский разрез».
Тоғыстар толдырылчатхан туста пу чолҷа чӧрчеткеннерге сизіктіг поларға кирек. Асфальт тӧзелчеткен туста чолның пір саринда ла чӧріс чарадылар.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде